गलाती

गलाती

गलात नगरीए विश्वासी टोली लै च़िठी

भेत

लिखणैं आल़अ: पल़सी

पहल़णैं आल़ै: गलात नगरीए दखण दिशा बाखा रहणैं आल़ै टोलीए विश्वासी

सन: 49

ज़ांऊं प्रभू ईशूए खुशीए समादो प्रच़ार यहूदी छ़ाडी होरी ज़ातीए लोगा मांझ़ै लागअ हंदअ, तिन्‍नां मांझ़ै हुअ इहअ सुआल पैईदा कि एक शुचै मसीही विश्वासी हणां लै एकी मणछ मोसा गूरे बधान मनणी ज़रूरी आसा कि नांईं? पल़सी बोला इहअ बी कि अह निं ज़रूरी आथी। सह बोला इहअ ई कि असली आसा मसीही ज़िन्दगी दी विश्वास ई एक पाक्‍की आथरी। विश्वासा ई करै ज़ुल़ा सोभ लोग परमेशरा संघै। पर एशिया मुल्खै गलात नगरी रहणैं आल़ी टोलीए लोग हुऐ पल़सीए खलाफ। तिन्‍नैं किअ इहअ दाऊअ कि परमेशरा संघै असली रिश्तै बणाणां लै लागा हरेकी मणछ मोसा गूरो बधान ज़रूरी पूरअ करनअ।

गलात नगरीए विश्वासीए नाओंए लिखी ती शधाणूं पल़सी अह च़िठी एते तैणीं कि तिंयां लोग ज़ुंण गलत शिक्षा करै कबाता पेठै तै, तिन्‍नां शुचै विश्वासा अर बभारा दी बापस आणी सके। पल़सी करा ऐहा च़िठीए शुरूआत ईशू मसीहो एक शुचअ शधाणूं हणें आपणैं हके गल्‍ल डाही करै। सह दैआ ऐहा गल्‍ला दी ज़ोर कि सह आसा शधाणूं हणां लै परमेशरै ई शादअ द नां कि कुंणी मणछ, अर इहअ बी कि तेऊओ मकसद आसा तिन्‍नां मणछा मांझ़ै खुशीओ समाद प्रच़ार करनअ ज़ुंण यहूदी निं आथी। तेखअ बोला सह इहअ कि सिधअ विश्वासा करै ई सका लोगो परमेशरा संघै नातअ बणी। खिरीए धैऊआ दी खोज़ा पल़सी इहअ कि मसीही विश्वासा करै पैईदा हुई झ़ूरी करै ई बझ़ा मसीही च़ाल-च़लण असली रुपै सारै दी।

पल़सी खोज़ा इहअ कि विश्वास ई आसा एक्‍कै बात ज़ेता करै हाम्हैं बच़ी सका। अह गल्‍ल आसा आबरामा करै पैहलै ई हई गई दी ज़हा तेऊ संघै किई परमेशरै करार किल्हैकि सह करा त विश्वास। पल़सी निं ऐहा गल्‍ला दी किछ़ै बैहम आथी कि तेऊए ज़िन्दगी बी आसा विश्वास करनै करै बच़ी दी:

“अह थिअ इहअ कि बधाने साबै गअ त हुंह मरी। अह हुअ एते तैणीं कि हुंह परमेशरे प्रतप्पा लै ज़िऊंदअ रहूं। ऐबै आसा मेरी पराणीं ज़िन्दगी मसीहा संघै क्रूसा दी छ़ड़ाऊई दी अर ऐबै निं हुंह ज़िऊंदअ रहअ पर मसीहा आसा मुंह दी ज़िऊंदअ। हुंह ज़ुंण देही दी ऐबै ज़िऊंदअ आसा, हुंह आसा सिधअ तेऊ विश्वासा संघै ज़िऊंदअ, ज़ुंण परमेशरे पूता दी आसा, ज़ुंणी मुल्है झ़ूरी किई, अर मेरी तैणीं आपणीं ज़ान दैनी।”

(2:19,20)

कताबे बांड

भेत 1:1-10

शधाणूंए रुपै पल़सीओ हक 1:11—2:21

परमेशरे झींण अर जशो खुशीओ समाद 3:1—4:31

मसीही आज़ादी अर ज़िम्मैंबारी 5:1—6:10

नचोल़ 6:11-18