Kulvi Outer Seraji Bible
गलाती 5
आज़ादी डाहा बच़ाऊई
मसीहा आसा हाम्हैं मोसा गूरे बधाना का आज़ाद किऐ दै, हर बगत रहा आज़ाद किऐ दै लोगा ज़िहै बणी। ऐबै निं भिई तम्हैं बधाना मनणे गलामीए जूँआं दी पल़ा।
मेरी गल्ला शूणां धैन दैई, हुंह बोला तम्हां लै इहअ कि परमेशरा संघै धर्मीं हणां लै ज़ै तम्हैं खतैर करे, एतो मतलब आसा इहअ कि ज़ुंण मसीहा किअ तेतो निं तम्हां किछ़ै फाईदअ हणअ।
हुंह बोला तम्हां सोभी लै एकी बारी भिई कि हरेक मणछ ज़ुंण खतैर करे तेऊ लागणीं बधाने सोभै गल्ला पूरी करनी। तम्हैं ज़ुंण मोसा गूरे बधाना मनी परमेशरा संघै धर्मीं हणअ च़ाहा, तम्हैं गऐ मसीहा का ज़ुदै हई अर तम्हैं गऐ तेऊ जशा का बी दूर हई ज़ेता करै परमेशरै तम्हैं धर्मीं बणाऐं तै।
हुंह सका इहअ बोली किल्हैकि हाम्हां आसा पबित्र आत्मां बाखा पाक्की आशा कि परमेशरा मनणै हाम्हैं धर्मीं किल्हैकि म्हारअ विश्वास आसा मसीहा दी। ज़ै तम्हैं मसीहा ईशू दी आसा, तै निं खतैर अर बाझ़ी खतैर किऐ दै जैंदरी किछ़ै भेद आथी। तेथ आसा सोभै गल्ला विश्वास ज़ुंण तम्हां होरी संघै झ़ूरी करनै आल़अ बणाआं।
तम्हैं थिऐ मसीहे आसरै बधिया बझ़दै लागै दै, तम्हैं निं सत्ता मनणै का कोही लोल़ी रोक्कै। एही सीख निं तम्हां शादणैं आल़ै परमेशरा बाखा का आथी। ऐहा गल्लो डाहै धैन किल्हैकि अह गल्ल आसा शुची ज़िहअ लोग बोला, “थोल़अ ज़िहअ सज़ेल़अ बणाआं सारै मुछ़ै दै पिठै सज़ेल़अ।” हुंह डाहा प्रभू दी थारै बारै भरोस्सअ कि तम्हैं रहे झ़ुठी शिक्षा का दूर, पर ज़ुंण तम्हां दी झाख पाआ सह च़ाऐ कोहै बी होए तेऊ भेटणीं परमेशरा का सज़ा।
पर भाईओ, मंऐं खोज़ी सोभी का खतैर करने बारै गल्ला कि अह खतैर करनअ निं ज़रूरी आथी, तैही दैआ यहूदी मुल्है कबल्लै दुख तकलिफ। ज़ै हुंह मसीहे क्रूसा दी मौते ज़ैगा सोभी का एही गल्ला खोज़दअ कि खतैर करनअ आसा ज़रूरी तै निं तिन्नां मुल्है दुख तकलिफ दैणीं ती। हुंह च़ाहा इहअ कि ज़ुंण तम्हां लै झाख पाआ तिन्नां लै हणअ त इहअ भलअ कि तिंयां आप्पू ई खास्सअ काटी दपुर्षै बणदै।
ए भाईओ, तम्हैं आसा परमेशरै आज़ाद हणां लै शादै दै अर ऐबै निं तम्हां मोसा गूरे बधाने गलामी दी रहणें ज़रुरत आथी, पर इहअ निं सोठा कि तम्हैं आसा देहीए पापी सभाबे साबै काम करना लै आज़ाद। एकी-दुजै संघै करा झ़ूरी अर च़ाकरी तम्हैं आसा एता करना लै आज़ाद। किल्हैकि सारअ बधान हआ ऐहा एकी गल्ला दी पूरअ, “तूह कर आपणैं साथी-संघी संघै आप्पू ज़ेही झ़ूरी।”1
पर ज़ै तम्हैं एकी-दुजै संघै खांदै कुक्करा ज़िहै झ़घल़दै लागा ज़ुंण एकी-दुजै लै दांदै दैई धेल़ा-च़िरा, एतो नतिज़अ हआ इहअ कि तम्हां करनअ एकी-दुजैओ बनाश।
पबित्र आत्में शगती दी ज़िऊंणअ
पर हुंह बोला तम्हां लै इहअ कि पबित्र आत्में साबै काटणी आपणीं ज़िन्दगी। तै निं तम्हां तिंयां बूरी गल्ला करनी ज़ुंण थारअ पापी सभाब च़ाहा करनअ। किल्हैकि ज़ुंण थारअ पापी सभाब करनअ च़ाहा तिहअ निं पबित्र आत्मां करनअ च़ाहंदी। ठीक इहअ ई ज़ुंण पबित्र आत्मां करा तेता निं म्हारअ पापी सभाब करनअ च़ाहंदअ। ईंयां दूई शगती करा कबल्ली एकी-दुजै संघै जुध। तम्हैं निं हर बगत भलै काम करी सकदै ज़ुंण हाम्हैं करनअ च़ाहा। पर ज़ै तम्हैं पबित्र आत्में ज़िन्दगी ज़िऊए, तै निं तम्हैं बधाने डरा हेठै रहै।
अह गल्ल आसा सोभी का शुझदी कि पापी सभाब किज़ै च़ाहा करनअ, मतलब कंज़रैई ज़िहै छ़ोतलै अर च़िल़्हखरै काम, मुहुर्ती पूज़ा, ज़ादू मत्र, ज़ीद, झ़गल़ै, होरीए च़िज़ो मांण, रोश्श, बरोध, फूट, कल़बिश, होरीए च़िज़ा आप्पू लै च़ाहणीं, शराबी हणअ। इना ज़िहै आसा कई च़िल़्हखरै काम, इने इहै कामें बारै दैआ हुंह तम्हां लै चतैनगी ज़िहै मंऐं तम्हैं पैहलै बी किऐ तै चतैन कि इहै-इहै कामां करनै आल़ै निं परमेशरे राज़ा दी बरासते हकदार हणैं।
पर ज़ेभै हाम्हैं पबित्र आत्में बशै रहा सह करा हाम्हां दी झ़ूरी, नंद, मेल़-ज़ोल़, भलाई, विश्वास, क्रिप्पा, सबर, शरीफी, सबर पैईदा इहै-इहै कामें खलाफ निं कोहै बधान आथी।
आजू लै आसा इहअ कि ज़ुंण मसीहा ईशूए आसा, तिंयां निं तिन्नां पापी सभाबे कामां ऐबै करी सकदै ज़ेता करनैओ हाम्हां पैहलै च़ाअ लागा त। किल्हैकि ईंयां कदुष्ट काम आसा हाम्हैं क्रूसा दी छ़ड़ाऊई करै मारी हेरै दै!
ज़ै हाम्हां लै पबित्र आत्मां नऊंईं ज़िन्दगी आसा हेरी दी दैई, तै लागा हाम्हां पबित्र आत्में बशै आपणीं सारी ज़िन्दगी ज़िऊंणीं। तै निं हाम्हां घमंडी हणअ, हाम्हां निं एकी-दुजै लै रोश्श झ़ैऊंणीं नां एकी-दुजै संघै ज़ीद डाहणीं।
Source notes (1)
- Cross-reference मोत्त. 22:39; लेब. 19:18
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.