Kulvi Outer Seraji Bible
2 करिन्थी 5
म्हारअ स्वर्गो घअर
किल्हैकि हाम्हां का आसा थोघ कि ज़ेभै पृथूई प्रैंदै म्हारी देहीओ डेरै ज़िहअ घअर ढोल़णअ, परमेशरा दैणअ हाम्हां लै स्वर्गै एक इहअ घअर, सह निं मणछै हणअ बणाअं द, पर सह आसा अटल़ ज़ुंण हाम्हां लै परमेशरै आप्पै आसा बणाअं द।1
ज़ेभै हाम्हैं ऐहा देही दी ज़िन्दगी काटा, तेभै हआ हाम्हैं तैहा देही भेटणां लै बझ़दै लागै दै ज़ुंण हाम्हां स्वर्गै परमेशरा संघै रहंदी भेटणीं। ताकि तैहा स्वर्गे देही बान्हीं म्हारी आत्मां नांगी निं शुझिए।
एऊ संसारे देहीए डेरै दी रहा हाम्हैं कबल्लै ई बोझ़ा करै दाभूई। किल्हैकि हाम्हैं निं ऐहा देही छ़ाडणअ च़ाहंदै पर हाम्हैं च़ाहा इहअ कि परमेशर हाम्हां लै स्वर्गे देही दैए ताकि अह देही ज़ुंण एकी धैल़ी खतम हणीं अह अमर देही दी बदल़े। परमेशरै आसा आप्पै हाम्हैं नऊंईं देही लै बणाऐं दै। तेऊ आसा हाम्हां लै पबित्र आत्मां दैई अह गल्ल पाक्की किई दी।
हाम्हैं डाहा सदा हिम्मत बान्हीं, अर हाम्हां का आसा थोघ कि ज़ेभै तैणीं हाम्हैं एऊ संसारे देही दी रहा, तेभै तैणीं निं हाम्हैं तेऊ घअरा लै डेऊई सकदै ज़िधी परमेशर रहा। किल्हैकि हाम्हैं निं तेऊओ रूप भाल़ी ज़िन्दगी ज़िऊंदै पर हाम्हैं ज़िऊआ परमेशरा दी विश्वास करी। तैही डाहा हाम्हैं हिम्मत अर देही का ज़ुदअ हई समझ़ा हाम्हैं प्रभू संघै रहणअ होर बी भलअ।
एता ई पिछ़ू च़ाहा हाम्हैं इहअ कि च़ाऐ हाम्हैं तेऊ संघा स्वर्गै रहे या हाम्हैं तेऊ का ज़ुदै पृथूई दी रहे, हाम्हैं परमेशरा खुश करे। किल्हैकि अह गल्ल आसा ज़रूरी कि हाम्हां सोभिए हाल लोल़ी मसीहे नसाफ राज़गाद्दी सम्हनै खुल्है, ताकि सोभी मणछा आपणैं-आपणैं भलै कदुष्ट कामों बदल़अ भेटे ज़ुंण तिन्नैं आपणीं देही करै आसा किऐ दै।2
परमेशरा संघै मेल़-ज़ोल़
इहअ करै समझ़ाऊआ हाम्हैं प्रभूए डरा दी रही लोगा कि सत्ता दी करा विश्वास। परमेशरा का आसा म्हारै बारै सोभी गल्लो थोघ। हुंह डाहा एही आशा कि तम्हां का बी आसा इना सोभी गल्लो थोघ। हाम्हैं निं आपणीं बड़ैई थारै सम्हनै करदै आथी, पर हाम्हैं दैआ तम्हां लै आपणैं बारै दी घमंड करनैओ मोक्कअ, ताकि तम्हैं तिन्नां लै ज़बाब दैई सके ज़ुंण दिला दी निं पर दखाऊटी गल्ला दी करा घमंड।
ज़ै लोग हाम्हां लै इहअ बोला कि ईंयां आसा बेगरै! हाँ ठीक आसा हाम्हैं आसा परमेशरा लै। पर ज़ै हाम्हैं सोठी-समझ़ी बोला तै तेता बोला हाम्हैं थारै फाईदे तैणीं। किल्हैकि मसीहे झ़ूरी करा हाम्हां आपणैं बशै। ज़ै हाम्हैं विश्वास करा कि मसीहा मूंअ हाम्हां सोभी लै, हाम्हैं करा इहअ विश्वास बी कि हाम्हैं सोभै बी मूंऐं म्हारी पराणीं ज़िन्दगी लै। मसीहा मूंअ एते तैणीं सोभी लै कि ज़ुंण ज़िऊंदअ आसा, सह निं आजू पोर्ही आप्पू लै ज़िऊई, पर तेऊ लै ज़िऊऐ ज़ुंण तिन्नां लै मूंअ अर बादा का हुअ ज़िऊंदअ।
मसीहा दी नऊंईं देही
एभा पोर्ही निं हाम्हां कोहिओ नसाफ मणछे सोठणें साबै करनअ। हाम्हैं किअ एकी बारी मसीहो नसाफ बी मणछे साबै पर ऐबै निं हाम्हां तिहअ करनअ। तै ज़ै ज़ुंण कुंण मसीहा दी विश्वास करा, सह आसा नऊंईं देही पराणीं गल्ला गई बिति भाल़ा, सोभै गल्ला हुई नऊंईं।3
ईंयां सोभै गल्ला आसा परमेशरा बाखा का, ज़ुंणी मसीहा करै हाम्हैं आप्पू सेटा लै मेल़-ज़ोल़ करी बापस आणै, अर परमेशरा सेटा होरी मेल़-ज़ोल़ करी बापस फरेऊंणे च़ाकरी आसा तेऊ हाम्हां लै दैनी। मतलब परमेशरै हेरै मसीहा करै आप्पू संघै संसारो बी मेल़-ज़ोल़ करी, अर ज़ुंण मणछै पाप बी किऐ, तेतो बी निं तिन्नां लै दोश लाअ आथी अर परमेशरै आसा हेरअ द अह मेल़-ज़ोल़ करनैओ समाद हाम्हां का सभाल़ी।
इहअ करै आसा हाम्हैं मसीहे राज़दूत, इहअ समझ़ा कि परमेशर करा हाम्हां बाती होरी मणछा का अरज़, हाम्हैं करा मसीहा बाखा अरज़, “परमेशरा संघै कर मेल़-ज़ोल़।”4
मसीहा निं किछ़ै पाप किअ, सह ई बणाअं परमेशरै म्हारै पापा दी साझ़ू ताकि हाम्हैं मसीहा करै परमेशरा का धर्मीं शुझिए।
Source notes (4)
- Cross-reference इब्रा. 9:11; आयू. 4:19
- Cross-reference इफि. 6:8; मोत्त. 16:27; ज्ञैन. 12:14
- Cross-reference ईशा. 43:18-19
- Cross-reference इफि. 6:10; मला. 2:7
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.