Kulvi Outer Seraji Bible
2 करिन्थी 4
माट्टे भांडै दी धन
एते तैणीं ज़ै हाम्हां लै परमेशरे एही झींण हुई कि तेऊ दैनअ हाम्हां लै खुशीए समादा खोज़णेंओ काम, हाम्हैं निं हैअ छ़ाडदै। पर हाम्हैं आसा हेरै दै इहै काम छ़ाडी ज़ेता करै हाम्हैं शर्मिंदै हणअ पल़े अर नां हाम्हैं आप्पू च़लाक बणदै अर नां परमेशरे बैणा दी मलाबट करदै आथी। हाम्हैं खोज़ा लोगा का मसीहे बारै सत्त। हरेक मणछ सका म्हारै बारै ऐहा गल्ला बोली कि हाम्हैं आसा शुचै।
ज़ुंण खुशीओ समाद हाम्हैं खोज़ा ज़ै सह कहा समझ़ निं एछदअ, अह आसा तिन्नां लै गुप्त ज़ुंण बरैबाद आसा च़ाल्लै दै हई। तिन्नें आछी आसा एऊ संसारा बश करनै आल़ै राख्सै कांणी किई दी कि तिंयां सत्त भाल़ी विश्वास निं करे। ताकि तिंयां मसीहे प्रतप्पा लै खुशीए समादा दी विश्वास नांईं करे। किल्हैकि अह आसा मसीहा ई ज़हा करै हाम्हां का थोघ लागा कि परमेशर किहअ आसा।
हाम्हैं निं आपणअ प्रच़ार करदै पर हाम्हैं करा ईशू मसीहो प्रच़ार कि सह आसा प्रभू। आप्पू लै बोला हाम्हैं इहअ कि हाम्हैं आसा तेऊ पिछ़ू थारै दास। एते तैणीं कि परमेशर ई आसा ज़ुंणी इहअ बोलअ, “न्हैरै दी लोल़ी प्रैश्शअ च़मकअ,” सह ई परमेशर दैआ म्हारै दिलै प्रैश्शै ज़ेही समझ़ ताकि हाम्हैं ईशू मसीहा दी परमेशरे प्रतप्पा भाल़े।1
हाम्हां का आसा ऐबै अह प्रैश्शअ म्हारै दिलै लागअ द च़मकदअ पर हाम्हैं आसा माट्टे भांडै ज़िहै ज़ेथ अह धन आसा डाहअ द, एता करै हआ अह गल्ल साफ कि अह नथहई शगती निं हाम्हां बाखा आथी पर अह आसा परमेशरा बाखा।
हाम्हां लै च़ऊ बाखा खरी, एछा, पर हाम्हां निं तेते परबाह हंदी। हाम्हैं कई बारी, झाखिआ पर आशा निं छ़ाडदै। हाम्हां दुख; हआ, पर हाम्हैं निं कल्ही आथी, हाम्हां दैआ लोग उंधै दाबणी पर हाम्हैं उखल़ा भिई उझै। हाम्हैं हआ हर बगत मौते खातरै दी ताकि लोग म्हारै कामां करै मसीहा ईशूए ज़िन्दगी भाल़े।
किल्हैकि हाम्हैं हआ ज़िऊंदी-ज़िता प्रभू ईशू पिछ़ू सदा मौते खातरै दी कि ईशूए ज़िन्दगी बी म्हारी ऐहा देही दी प्रगट होए ज़ुंण एकी धैल़ी खतम हणीं। मतलब हाम्हैं ज़िऊंदै हंदी बी आसा मौत हाम्हां नेल़। पर एतो भेटअ इहअ कि तम्हां भेटी परमेशरे नऊंईं ज़िन्दगी।
शास्त्र बोला इहअ, “मंऐं बोलअ, किल्हैकि मंऐं डाहअ परमेशरा प्रैंदै विश्वास।”2 विश्वासे तैहा ई आत्मां करै करा हाम्हैं बी गल्ला, किल्हैकि हाम्हैं करा विश्वास।
किल्हैकि हाम्हां का आसा थोघ कि ज़ुंणी प्रभू ईशू मरी करै ज़िऊंदअ किअ, तेऊ करनै हाम्हैं बी ईशू संघै ज़िऊंदै अर तेऊ करनै हाम्हैं बी तम्हां संघै कठा करी आप्पू सम्हनै खल़ै। किल्हैकि ईंयां सोभ गल्ला हुई थारै फाईदे तैणीं ताकि परमेशरो जश खास्सै मणछा सेटा पुजे। खास्सै मणछा करनअ परमेशरो शूकर अर परमेशरे लोल़ी होर बी खास्सअ प्रतप्प हुअ।
म्हारअ मन्न निं धिठअ हंदअ, ज़ेभै म्हारी देही बागा का हर धैल़ै पराणीं लागा हंदी, परमेशर बणाआं हाम्हां भितरा का म्हारी आत्मां दी हर धैल़ै नऊंऐं। किल्हैकि घल़ी-पलो हल़कअ ज़िहअ कष्ट करा हाम्हां लै ज़रूरी सदा रहणैं आल़ी ज़िन्दगी अर प्रतप्प पैईदा। हाम्हैं निं तिन्नां खरी दी धैन दैंदै ज़ुंण हाम्हां का एभै शुझिआ पर हाम्हैं दैआ तिन्नां च़िज़ा दी धैन ज़ुंण हाम्हैं भाल़ी दी निं आथी। किल्हैकि ज़ुंण हाम्हैं एभै भाल़ा तिंयां आसा थोल़ै धैल़ै लै पर ज़ुंण च़िज़ा हाम्हैं भाल़ी निं आथी तिंयां रहणीं सदा बणी।
Source notes (2)
- Cross-reference ईशा. 9:2
- Cross-reference भज. 116:10
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.