Kulvi Outer Seraji Bible
2 करिन्थी 3
नऊंईं करारे दास
हाम्हां निं दखाअ करने ज़रुरत आथी कि म्हारै काम आसा भलै। कई च़ाहा इहअ कि होर तिन्नां लै एही च़िठी भेज़े ज़ेथ तिन्नें कामें सर्राफी होए! हाम्हां निं तम्हां लै तेही च़िठी तम्हां सेटा दैणीं अर नां हाम्हैं आप्पू च़ाहंदै कि तम्हैं हाम्हां लै एही च़िठी लिखे। मेरै आसा तम्हैं ई च़िठी ज़िहै ज़ेता करै मेरै परमेशरा लै काम करनैओ थोघ सोभी का लागा। सोभै सका तम्हां पहल़ी अर म्हारै भलै काम सका तम्हां दी बछ़ैणीं। अह आसा शुझदअ कि थारी बदल़ी दी ज़िन्दगी आसा च़िठी ज़ुंण मसीहा आसा लिखी दी। तेऊए अह च़िठी लिखणी आसा म्हारै कामों फल। ईंयां निं सैही करै या पात्थरे तगती दी आथी लिखी दी पर ईंयां आसा ज़िऊंदै परमेशरे आत्मां करै मणछे दिले तगती दी लिखी दी।1
हाम्हैं डाहा मसीहा ई करै परमेशरा दी इहअ ई भरोस्सअ। हाम्हैं निं आपणैं बलबुतै दी किछ़ै करी सकदै। हाम्हां लै बल दैणैं आल़अ आसा परमेशर। तैही निं हाम्हैं बोली सकदै कि हाम्हैं आसा एता जोगी। सह परमेशर ई बणाआं हाम्हां आपणीं च़ाकरी करनै जोगी। ज़ुंणी हाम्हैं नऊंईं करारे दास हणैं जोगी किऐ, बधाने दास निं पर पबित्र आत्में दास किल्हैकि मोसा गूरै लिखै बधाना करै भेटा मौत पर पबित्र आत्मां करै भेटा नऊंईं ज़िन्दगी।2
परमेशरे शास्त्रा दी लिखै दै पराणैं बधाना करै एछा मौत अर तेऊ दैनअ सह पात्थरे तगती दी लिखी करै मोसा गूरे हाथै, तेता का थिअ इहअ झ़ामण लागअ द कि इज़राईली निं तेऊए मुंह भाल़ी सकदै तै। तेखअ अह आत्में करार होर बी प्रतप्पा आल़ी किल्है निं हणीं?
ज़ै सह दोशी बणाणैं आल़ी करार प्रतप्पा आल़ी थिई, अह धर्मीं बणाणैं आल़ी नऊंईं करार होर बी खास्सी प्रतप्पा आल़ी किल्है निं हणीं आथी? असली गल्ल आसा एही कि एऊ नऊंईं करारे प्रतप्पा सम्हनै निं पराणीं करारो प्रतप्प किछ़ै रहअ।3
किल्हैकि मोसा गूरे बधान ज़ुंण कबल्लअ घटदअ रहअ, ज़ै तेथ एतरअ प्रतप्प थिअ, तै सह नऊंईं करार ज़ुंण सदा बणी रहणीं, तेथ ता होर बी खास्सअ प्रतप्प हणअ?
इहअ करै बोला हाम्हैं एतरी आशा अर हैअ डाही करै। हाम्हैं निं मोसा ज़िहै आथी, ज़ुंणी आपणैं मुंहां दी पल्दअ थिअ पाअ द, कि इज़राईली मणछै निं लोल़ी सह घटणैं आल़अ झ़ामण भाल़अ।4
पर तिंयां हुऐ बेसमझ़, किल्हैकि आझ़ तैणीं बी आसा तिन्नां लै पराणैं बधाना पहल़दा बारी तिन्नें दिला दी सह ई पल्दअ पल़अ द। पर मसीहा दी विश्वास करी उझ़िआ सह पल्दअ उझै। आझ़ तैणीं बी ज़ेभै मोसा गूरे कताबा पहल़ा, तिन्नें दिलै रहा पल्दअ पल़ी अर तिंयां निं एता राम्बल़ै करै समझ़ी सकदै। पर ज़ेभै तेऊओ दिल प्रभू बाखा लै फिरी मसीहा दी विश्वास करे, तेभै जाणअ सह पल्दअ उंधै खुल्ही।5
प्रभू; आत्मां आसा अर ज़िधी प्रभूए आत्मां आसा, तिधी आसा बधाना का आज़ादी। पर ज़ेभै म्हारै नांगै मुंहां का प्रभूओ झ़ामण शुझिआ इहअ कि ज़िहअ हाम्हैं आर्शू दी भाल़ा। प्रभू संघै ज़ुंण आत्मां आसा, हाम्हैं रहा तेऊ ई च़मकिल्लै रुपा दी कणीं-कणीं हई बदल़दै लागी।
Source notes (5)
- Cross-reference लुआ. 24:12; जेर. 31:33; एज. 11:19-20
- Cross-reference लुआ. 24:8; जेर. 31:31; 32:40
- Cross-reference लुआ. 34:29-30
- Cross-reference लुआ. 34:33
- Cross-reference लुआ. 34:34; ईशा. 25:7
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.