Kulvi Outer Seraji Bible
2 करिन्थी 9
साथी-मसीही लै मज़त
मुंह निं असली दी एरुशलेम रहणैं आल़ै विश्वासी भाईए मज़त दैणें बारै लिखणे ज़रुरत आथी। किल्हैकि हुंह हेरा ज़ाणीं थारै मन्नां, ज़ेता पिछ़ू हुंह थारै बारै मकिदुनिया मुल्खै रहणैं आल़ै विश्वासी भाईए सम्हनै घमंड रहैऊआ कि तम्हैं अखाया मुल्खै रहणैं आल़ै विश्वासी भाई आसा एकी साला ओर्ही दान दैणा लै तैर्हुई रहै दै, अर थारी इना गल्ला शूणीं लागै एसी बी विश्वासी भाई ऐहा च़ाकरी लै आजू निखल़दै।
पर मंऐं आसा ईंयां चअन विश्वासी भाई एते तैणीं छ़ाडै दै कि ज़ुंण घमंड हाम्हैं थारै बारै आसा रहैऊअ द, सह निं लोल़ी ऐहा गल्ला दी बरैबाद हुअ। पर ज़िहअ मंऐं तम्हां लै बोलअ तम्हैं रहा तिहै ई एरुशलेम नगरीए विश्वासी लै ढब्बै दैणा लै तैर। इहअ निं लोल़ी हुअ कि, मकिदुनिया का कुंण विश्वासी मुंह संघै एछे अर तम्हैं बोले इहअ कि म्हारअ निं ढबैओ इंतज़ाम हुअ अर हुंह एऊ भरोस्सै करै शर्मिंदअ होए, पर तम्हैं हणैं होर बी शर्मिंदै।
तैही समझ़ी मंऐं तिन्नां सोभी विश्वासी भाई का अरज़ करनी ज़रूरी कि तम्हां सेटा लऐ पैहलै डेऊई, ज़ुंण ढब्बै दैणैंओ तम्हैं पैहलै ई त बाहिदअ किअ द तेता डाहै तैर। अह दान लोल़ी थारअ खुल्है दिलै दैनी दी बर्गत हुई।
दान किहअ दैणअ
पर गल्ल आसा एही कि ज़ुंण कृषाण थोल़अ फल़ बऊआ, सह लऊआ बी थोल़अ, अर ज़ुंण खास्सअ बऊआ सह लऊआ बी खास्सी फसला ज़ेही खास्सी बर्गत।1
ज़ेभै तम्हैं दान दैआ, तेभै ज़िहअ तम्हैं मन्नैं सोठे, तम्हैं करै तिहअ ई दान, धिठै मन्नैं अर दबाबा दी निं दैई। किल्हैकि “परमेशर करा तिन्नां संघै झ़ूरी ज़ुंण खुल्है दिलै दैआ दान।”2
परमेशरो जश सका तम्हां लै सोभ गल्ला थारी ज़रुरती का बी खास्सअ दैई, ज़ेता करै तम्हां लै हर गल्ल हर बगत ज़ुंण तम्हां ज़रूरी आसा सह तम्हां सेटा रही सके अर हर भलै कामां करना लै सका तम्हां सेटा सोभ गल्ला हई। ज़िहअ पबित्र शास्त्रा दी आसा लिखअ द,3
“सह दैआ रैनै-गरीबा लै खुल्है हाथै,
तेऊए धर्मीं काम डाहणैं सदा आद।”
ज़ुंण परमेशर बऊंणैं आल़ै लै बेज़अ अर खाणां लै रोटी दैआ, तेऊ दैणअ तम्हां लै बी तिंयां सोभै गल्ला ज़ेते तम्हां ज़रुरत आसा। तेऊ बढाऊंणीं थारी तिंयां गल्ला ज़ुंण तम्हैं बागै होरी लै दैणैं जोगी होए।4
परमेशरा बणाणैं तम्हैं कई गल्ला दी सेठ ताकि तम्हैं झणैल़ू बणें। हाम्हां करै किऐ दै एऊ कामां करै करनअ कई लोगा परमेशरो शूकर। हाम्हां ज़ुंण ईंयां ढब्बै भेटै, एता करै निं सिधी पबित्र लोगे गरज़ा पूरी हंदी आथी पर होर विश्वासी भाई बी करा एता लै परमेशरो शूकर।
किल्हैकि तम्हैं किई ढब्बै दैई होरीए मज़त करने एऊ महान कामें शुरूआत, एता करै जाआ थारै बारै थोघ लागी कि तम्हैं किहै भलै मणछ आसा। तम्हैं किअ परमेशरो अदर मसीहे खुशीए समादा दी खोज़ी दी हर गल्ला मनी। दान दैई गरीब विश्वासीए मज़त करी बी किअ तम्हैं तेऊओ अदर। तिन्नां करनी तम्हां लै परमेशरा का प्राथणां। तिंयां झ़ूरा तम्हां लै खास्सै, किल्हैकि तिंयां बी ज़ाणा ऐहा गल्ला कि परमेशरै किई तम्हां लै खास्सी झींण। परमेशरो आसा तेऊ दाना लै शूकर, सह दान ज़ुंण मसीहा आसा ज़ुंण एतरअ महान कि तेते बारै खोज़णअ आसा म्हारै बशा का बागै।
Source notes (4)
- Cross-reference सैणीं. 11:24; 22:9
- Cross-reference बधा. 18:10; सैणीं. 11:25; 22:9
- Cross-reference भज. 112:9
- Cross-reference ईशा. 55:10; होश. 10:12
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.