ኢዮባ

ኢዮባ ማጻፋ

ገሉዋ

ኢዮባ ማጻፋን ኑን በእያ ታርኪ፥ ዳሮ ቱጋይነ ባሻይ ጋኬዳ እት ኬካ ብታንያባ ኦድያ ታርክያ። ሀ ብታኒ ባረ ናናቱዋ ኡባፐነ ባረ ዱረተ ኡባፐ መላ አቴዳ አሳ። ሄዋ ቦላካ ቃይ ኢታ ማይን ሾጨቲደ ሳከቴዳ። ሄዋፐ ጉይያን ግንጹዋ ጻፉዋን ቆንጭሴዳ ሄዙ ሃሳያቱዋን ኢዮብ ነ ኢዮባ ላገቱ ሀ ሳኩዋን ባረንቶ ስሰቴዳዋ ሃሳዬድኖ። ዉርሰን ቃይ ጾሳይ ኢዮባዉ ቆንጬዳ።

ኢዮባ ላገቱ ኢዮባ ጋኬዳ መቱዋ ቦላ ቆፋ እሚደ፥ በንፐ ባረንቱ ኤርያ አማኑዋ ዎጋን ባሰቲደ እሚኖ። ሄዋ ድራዉ ኡንቱንቱ፥ “ጾሳይ ኬካ አሳዉ ሎኦባ እሜ፤ ሽን ኢታ አሳ ሙሬ። ሄዋ ማራን ኢዮባ ሀ መቱ ኡባይ ጋኬዳዌ፥ እ ናጋራ ኦዳ ድራሳ ግዳናዉ ኮሼ” ያጊኖ። ሽን ኢዮብ ጌሻነ ኬካ አሳ ግዴዳ ድራዉ፥ ሀዋ ማላ ሙሩዋ በስያ አሳ ግደና። ኡባ ቃይ ኤረተና ቃንእሸ ግዴዳዌ፥ አ ማላትያ ኬካ አሳ ቦላ ሀዋ ማላ ሙሩዋ ዎዳ። ኢዮባ አማኑ ሳኣፐ ደሸናን ዮፐካ፥ ልከ ፕርዳ ፕርዲደ፥ ባረና ሀ ሀርግያ ቃሹዋፐ ብላና ማላነ በን ደኦ ዛራና ማላ፥ ምንሲደ ዎስያዋ አግቤና።

ጾሳይ ኢዮብ ኦቼዳ ኦሻዉ እቶ እቶ ዛሩዋ እምቤናዋ ግዶፐነ፥ አ አማኑዋ ምኖተ ናሺደ፥ ባረ ጾሳተ ዎልቃነ ባረ አዳ ኤራ ማላልስያ ግንጹዋ ሃሳያን ቆንጭሴዳ። ሄዋፐ ጉይያን ኢዮብ ጾሳይ ዎልቃማ ግድያዋነ አዳ ኤራንቻ ግድያዋ ኤሪደ፥ ጻላንነ ሀንቁዋን ኩሜዳ ቃላቱዋ ሃሳዬዳዎ ካዮቲደ፥ ናጋራፐ ስሜዳ።

ዉርሰን ግንጹዋ ግደና የዳ ጻፉዋን ጻፈቴዳ ሳኣን ኢዮባ ደኡ በንሳ ስሜዳዋዋነ አቁዋ ባጋና ግዶፐ፥ ካሰዋፐ ዳኮ ዳሩዋ ደሜዳዋ በኤቴ። ኢዮባ ላገቱ አ ጋኬዳ መቱ ሀቃና ዬደንቶ ኡንቱንቶ ገልቤና ድራዉ፥ ጾሳይ ኡንቱንታ ምኖ ሴራ ሴሬዳ። ሜዘ አማኑዋ ቆፋፐ ጾሳይ ዎልቃማ ግድያዋ ኤሬዳዌ ኢዮባ ጻላላ።

ሸምፓቱዋ ኡባቶ እመቴዳ ቃን ቆፋቱዋ

እዮበ ፓጨቱሳ

ኢዮባነ አ ላገቱዋ ፓሉምያ

መና ጎዳይ ኢዮባዉ እሜዳ ዛሩዋ

እዮበ አንጁዋ ዛር ደሙሳ