Dawro Full Bible Ethiopic
ኢዮባ 18
ብልዳደ ላኤን ሃሳያ
ሄዋፐ ጉይያን፥ ሹሀ ቢታፐ ዬዳ ብልዳደ ሀዋዳን ያጊደ ዛሬዳ፤ “ኢዮባ፥ ኔን ሀ ሃሳያ አዉደ ዉርሳይ? አነ አኬካ። ያቶፐ ኑን ሃሳያና። ኑና አያዉ ሚዛ ከሳይ? አያዉ ኑና ዶንጭሎዋንታ ከሳይ? ኔን ነ ሀንቁዋን ኔና ቆሃሳ። ነ ሀንቁዋን ቢታይ መላ ግዳኔ? ዎይ ዛላቱ ባረንቱ ሳኣፐ ቆለታኔ?
“ናጋራንቻቱዋ ደኡ ጾምፒ ቶእያዋዳን ቶአናዌ ጌሻ፤ እ ላኤን ሙለካ ኤጸና።1 እ ጾምፒ ባይና ጎልያ ማላ፤ አ ማታን ደእያ ጾምፒካ ቶኤ። እ ታንግያ ታንጉካ ቃሜ፤ እ ሀራቱዋ ዞርያ ዞሪ አ ኡንጌ።
“አ ሀመታይ አ አፊደ፥ ጲርያን ገልሴ፤ ዲዛ ግዶን እ ሀመቴ። ጵሪ አ ግንድያ ኦይቄ፤ አ ቃዋ ድጌ። አዉ ዩርዶ ዎዶሩ ጌማን ሳኣን ሂጸት ኡቴ፤ እ ሀመትያ ኦግያንካ ግቲ ዎ ኡቴ።
“ዳጋማይ አ ዶዴ፤ አ ጉየናካ የደርሴ፤ አ ዎልቃይ ኮሻን ዳቡሬዳ፤ ባሻይ አ ማታን ናጌ። ዎያ ሀርጊ አ ቦላን ኡባን ዶዴ፤ አ ኩሽያነ አ ገድያ ዱሽሴ። እ ህርግ ባይናን ደእያ ባረ ጎልያፐ የደርሴቴ፤ ኡንቱንቱ አሳ ኡባ ሞድያ ሀይቁዋ ግያ ካትያኮ፥ አ አፊኖ። ሀርግያ የደርሳነው ዲንያ ላሎዋፐ ጉይያን፥ ኦንነ አ ጎልያን ደአና። እ ጻጱ ጋርሳና መልያነ ቃንካቱካ ቦላና ቆቆፈትያ ም ማላ ግዴ። አ ዎሪ ቢታፐ ዬ፤ አ ሱንይካ ሳኣን ሀሳየተናን አቴ። እ ፖኡዋፐ ማዉ የደርሰታና፤ አሳይ ደእያ ቢታፐካ እ ያና። አዉ ናአይ ዎይ ዛሪ ያና፤ እ ደኤዳ ሳኣን እት አሳይነ ፓጻ ደኤና። አዋይ ዶልያ ባጋ አሳይ አ ጋኬዳዋን ዳጋሜ፤ አዋይ ዉልያ ባጋ አሳይካ ያሻን ኮኮሬ። አዉደካ ኢታ አሳቱዋ ዉርሰይ ሄዋ ማላ፤ ጾሳ ኤረናዋንቱ ካጫይካ ሄዋ ማላ” ያጌዳ።
Source notes (1)
- Cross-reference ኢዮባ 21:17
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.