ኢዮባ 7

1“አሳ ደኡ ሳኣ ቦላን ዎልቃማ ባጸ ግደኔየ? አ ደኡዋ ላይይ ከራ ኦያ አሳ ደኡዋ ላይ ማላ ግደኔየ? 2ኩዋ አሞትያ ቆማዳን፥ ዎይ ባረ ድርጉዋ አካናዉ ናግያ ኦሳንቻዳን፥ 3ሄዋዳን ታዉ መላ አግናቱነ ቱጋ ቃማቱ እመቴድኖ። 4ታን ግስያ ዎደ፥ ‘አዉደ ቤጎታንድታሻ?’ ያጋይ። ሽን ቃማይ ታዉ አዱቄ፤ ሳአይ ዎንታና ጋካናዉ ሂጻን አ አ ዎይ። 5ታ ቦላይ ጉጹንያነ ፖቁዋ ማዬዳ፤ ታ ማዱፐ ጊሻይ ጎጌ። 6ታ ላይይ ሸማይንያ ሙኩካፐካ አ ኤሌሌ፤ አይ ህዶታይነ ባይናን ታ ላይይ ዉሬ።

7“አቤት ጾሳዉ፥ ታ ላይይ ሲያና ሸምፕያ እት ሸምፑዋ ማላ ግድያዋ ሀሳያ! ታ አይፊ ላኤን ኬካባ በኤናን አቴዳ። 8ኔን ታና ሀእ በኣሳ፤ ሽን ላኤን በአካ፤ ኔን ታና ኮዮፐ፥ ታን ያድ።

9“ሻሪ ፕስክ ጊደ ይያዋዳን፥ ዱፉዋ ዎዳ ኡራይ ስሚደ ከሰና። 10ባረ ጎለካ ላኤን ስሚደ ዬና፤ አ ኤርያ አሳይካ አ ዶጌ።

11“ሄዋ ድራዉ፥ ታን ጮኡ ጊከ፤ ታን ታ ቱጋ ድራዉ ሃሳያና፤ ታ ደኡ ጫሜዳ ድራዉ ዙዙማና። 12ሀዋ ኬሻ ኔን ታና አያዉ ናጋይ? ታን ነዉ አባ ዎይ አባ ግዶ ሀምባዝያ ጋድየ? 13ታን፥ ‘ታ ሂጻይ ታና ምንንዴ፤ ታ አልጋይካ ታና ዙዙንፐ ሸምፕሳንዴ!’ ያግያ ዎደ፥ 14ኔን ታና አኩሙዋን ያሽሳሳ፤ ሳጻንካ ታና ዳጋንሳ። 15ታን ሀ ሳክያ ቦላና ደአናዋፐ ሱለትያዋነ ሀይቂያዋ ዶራይ። 16ታን ታ ደኡዋ ካድ፤ ታን መናዉ ደአናዉ ኮይከ። ታ ላይይ ሲያና ሸምፕያ እት ሸምፑዋ ማላ ግድያ ድራዉ፥ ኔን ታና አጋ ባሻ።

17“ኔን አ ዎጋባዳን ጼላናዉ አሳይ አዬ? ኔን አባዉ አያዉ ቦንቾ ሳኣ እማይ?1 18ዎንታ ዎንታ ኔን አ ብዳሳ፤ ቃይ ዎድያን ዎድያን አ ፓጫሳ። 19ኔን ታኮ ጼልያዋ ሙለካ አግኪ? ዎይ ታን ታ ጩቻ ምትያ ዎድያካ ታዉ እምኪ? 20አቤት አሳ ዎችያዎ፥ ታን ናጋራ ኦዳዋ ግዶፐ፥ ኔና አያይ ቆሄዴ? ኔን አያዉ ታና ጫድ ካእያዋ ኦዲ? ነዉ ታን ዴጾ ቶኩዋ ግዳድታየ? 21ታ ባላፐ አያዉ ታና ማረናን እጻይ? ታ ናጋራካ አያዉ አቶ ጌናን አጋይ? ስም ታን ዱፉዋ ዎያ ዎዲ ጋኬዳ፤ ኔን ታና ኮይያ ዎደካ፥ ታን ቤትከ” ያጌዳ።