ኢዮባ 2

ኢዮባ ላኤን ፓጭያ

1ሀራ ጋላስካ ቃይ ጾሳ ኪታንቻቱ መና ጎዳ ስንን ቤታናዉ ዬድኖ፤ ሴጻናይካ ቃይ ኡንቱንቱና እትፐ አ ስንን ቤታናዉ ዬዳ። 2መና ጎዳይ ሴጻና፥ “ላ ኔን ሀቃፐ ያድ?” ያጌዳ።

ሴጻናይ መና ጎዳዉ፥ “ሳኣን ኡባን ያነ ሃነ ዩይያሳፐነ ስመረትያሳፐ ያድ” ያጌዳ።

3መና ጎዳይ አ፥ “ታ ቆማ ኢዮባ አኬካደ በኣድ? ሳኣ ቦላን አ ማላትያ ቶሺ ባይናነ ሱረ አሳይ ሙለካ ባዋ። እ ጾሳዉ ያይያ፥ ኢታባፐካ ሃኬዳ አሳ። ጋሱ ባይናን ታን አ ይሳና ማላ፥ ኔን ታና ደንናካ፥ ሀእ ጋካናዉ እ ባረ ሱረተን ምን ኤቄዳ” ያጌዳ።

4ሴጻናይ ዛሪደ ጾሳ፥ “ ‘ጋልባ ድራዉ ጋልባ አኮ!’ ያግያዋዳን፥ አሳይ ባረ ሸምፑዋ ድራዉ፥ ባረዉ ደእያዋ ኡባ እማና። 5ሽን ኔን ነ ኩሽያ የዳደ፥ አ አነ ሾጫ። ያትንቶ እ ኔና ቱሙ ነ ስንን ሸቃና” ያጌዳ።

6መና ጎዳይ ሴጻና፥ “ኤኖ፥ አ ዎፓፐ አትና፥ አ ቦላ ኔን ኮዬዳዋ ኦናዉ ዳንዳያሳ” ያጌዳ።

7ሄዋፐ ጉይያን፥ ሴጻናይ መና ጎዳ ስንፐ ከሲደ፥ ኢዮባ ገድያፐ ሁጲያ ጋካናዉ ኢታ ማዱይ አ ቦላ ከሳናዳን ኦዳ። 8ያትና፥ ኢዮብ ብድን ቦላ ኡቲደ፥ ኮንኣን ባረና ጎዴዳ።

9አ ማቻታ አ፥ “ሀእ ጋካናዉካ ኔን ነ ሱረተን ምና ኡታዲ? ጾሳ ሸቃደ ሀይቃ” ያጋዱ።

10እ ዛሪደ እዞ፥ “ኔን ቦዛ ማጫ አሳዳን ሃሳያዳ። ኑን ጾሳፐ ሎኦባ አክ አኪደ፥ ኢታባ አኮኮየ?” ያጌዳ።

ሀ ኡባንካ ኢዮብ ባረ ጌዳዋን ናጋራ ኦቤና።

ሄዙ ኢዮባ ላገቱ አ በአናዉ ዬድኖ

11ኢዮባ ላገቱ ሄዛቱ፥ ተማና ቢታፐ ኤልፋዝ፥ ሹሀ ቢታፐ ብልዳድነ ናእማ ቢታፐ ጾፋር ኢዮባ ቦላ ጋኬዳ መቱዋ ስሴዳ ዎደ፥ አዉ ቃረታናዉነ አ ምንናዉ ባረንቱ ሶፐ ባረንቱ ሶፐ ቃገቲደ፥ እትፐ አኮ ዬድኖ። 12ኡንቱንቱ አ ሃኩዋን ግዲደ ጼልያ ዎደ፥ እ ኢዮባ ግድያዋ ኤርበይክኖ። ጉየፐ አ ግድያዋ ኤሬዳ ዎደ፥ ባረንቱ ቃላ ቁ ኦደ ዬኬድኖ፤ ባረንቱ ማዩዋካ ፔደ፥ ባረንቱ ሁጲያን ባና ቆሌድኖ። 13ሄዋፐ ጉይያን፥ ኡንቱንቱ አናና ላፑን ጋላሳነ ላፑን ቃማ ቢታን ኡቴድኖ። አ ሳኩ ሎይ ዳሬዳዋ ኡንቱንቱ በኤዳ ድራዉ፥ አዉ አይ አሳይነ ቃላካ ቃትቤና።