Skip to content
BibleKenya

Dawro Full Bible Ethiopic

ኢዮባ 41

“ኔን ሌዋታና ግያ ዳዊያ ሞልያ ኦይቂያ ማንጻቁዋን ኦይቃናዉ፥ ዎይ አ እንጻርሳ ዎዶሩዋን ቃቻናዉ ዳንዳያይ?1 አ ሲያን ዳፉዋ ገልሳናዉ ዳንዳያይ? ዎይ አ ጋጩዋ ማንጻቁዋን ጫዳደ ኦይቃይ? እ ኔና፥ ‘ሀያና ታና የዳርኪ’ ያጊደ ዎሳኔ? ዎይ እ ነዉ ማልኦ ቃላን ሃሳያኔ? ኔን አ መናዉ ነ ቆማ ኦናዉ፥ እ ኔናና ጫቁዋ ጫቀታኔ? አሳይ ካፉዋና ካእያዋዳን፥ ኔን አናና ካአይ? ዎይ አ ቃቻደ፥ ነ ማጫ ቆማቶ ካአናዳን እማይ? ሞልያ ኦይቂያዋንቱ አ ጋትያን ፓሉመቲኖ? ዎይ ዛልአንቻቱ አ ቃንጸሬደ ዛልኢኖ? ኔን አ ጋልባ ማጫምያን፥ አ ሁጲያካ ጎማን ጫዳደ ቆሀናዉ ዳንዳያይ? አነ አ ነ ኩሽያን ቦቻ፤ ኔን አናና ባጸቴዳ ባጽያ ሀሳያደ፥ ላኤንደ አናና ባጸታናዉ ካጄላካ!

“ሄ ዳዊያ ኦይቃናዉ ካጄልያዌ መላ፤ ሀራይ አትና፥ አ በኤዳ ኡባይካ ያሻዉ ኮኮሬ። እ ግሴዳሳፐ አ ደንናዉ ኦንነ ጻለና፤ ያትና፥ ታ ስንን ኤቃናዉ ዳንዳይያዌ ኦኔ? ዛራ እማ ጋናዉ፥ ታዉ ኮይሮ እሜዳዌ ኦኔ? ሳሉዋፐ ጋርሳና ደእያባይ ኡባይ ታዋ።

“ሌዋታና ገደቱዋባ፥ አ ዎልቃማ ዎልቃባነ አ ሎእያ ቦላባ ሃሳይያዋ ታን አግከ። አ ጋልባ ቃራናዉ ዳንዳይያዌ ኦኔ? አ ዶና ብጻላና ዳንዳይያዌ ኦኔ? ያሽያ አቻይ ደእያ አ ጎጎጩዋ ፖቃናዉ ዳንዳይያዌ ኦኔ? አ ዞክያ ጋልባይ እቱ እቱዋ ቦላን ዶረቴዳነ ሹቻዳን ምኔዳ ጎንዳለቱዋ ማላቴ። ኡንቱንቱ እቱ እቶ ሎይ ማታቴዳ ድራዉ፥ ኡንቱንቱ ግዱዋና፥ ሀራይ አቶ፥ ጫርኩካ አናዉ ዳንዳየና። ኡንቱንቱ ኡባይካ እቱ እቱዋና ጋከት ኡቴዳ ድራዉ፥ ኡንቱንታ አያይነ ሻከና።

“እ ሄሽያ ዎደ፥ ጶልቁ ግያ ፖኡ ከሴ፤ አ አይፈቱካ ዎንታ ጻልቂያዳን ዞኢኖ። አ ዶናፐ ታማ ላጩ ከሴ፤ ታማይካ ፕሪደ ዎ። ፐንትያ ድስትያፐ ጋርሳ ባጋና ኤጽያ ማቃፐ ከስያ ጩዋዳን፥ አ ሲያፐ ጩዋይ ከሴ። አ ሲያና ከስያ ሸምፑ ጺጹን ቦንቂሴ፤ ታማ ላጩካ አ ዶናፐ ከሴ።

“አ ሞርግያን ዎልቃይ ደእያ ድራዉ፥ እ ሎይ ያሽያዋ። አ አሹ እትፐ ኑከት ኡቴዳ ድራዉ፥ አ ቦላይ ብራታዳን ምኔ። አ ዎዛናይ ሹቻዳን ምና፤ ጋጭያ ዎጻዳንካ ምና። እ ደንድያ ዎደ፥ ምኖቱካ ያዪኖ፤ ኡንቱንቱ ዳጋሚደ ባቃቲኖ። አኮ ጋክያ ማሻይ አይነ አላለ ከሰና፤ ቶራይ፥ ዎይ አዳይ፥ ዎይ ጎማይ አ አይነ ኦና። ብራታ እ ዳላዳን፥ ናሃስያካ ሙሴዳ ምዳን ፓይዴ። ዎንዳፍያ አዳይ አ ባቃትሰና፤ ያምባርሻን ኦልያ ሹቻይካ አዉ ሱላ ማላ። ዱላይ አዉ እት ቡጻ ማላ፤ ቶራ ጾንግያ ዎደ፥ ቅሊጪደ ሚጬ። አ ኡሉዋ ቦላን ደእያ ጋልባይ መኤረቴዳ ኮንኣዳን ቃራ፤ ኡርቃና እ ብያ ዎደ፥ ማራሻዳን ቢታ ጳልቄ።

“አባ ፐንቴዳ ሃዳን ቡኬ፤ ጻሩዋ ግዶን ፐንትያ ዛይትያዳንካ ቡልቡልሴ። ባረፐ ጉየና ጶልያ ኦግያ ከሴ፤ አባ ሃካ ቦ ሆሞ ላሜ። ቢታ ቦላን አ ማላ መት ባዋ፤ እ ያይ ኤረና መታ። ሎይ ዎልቃማ ግዴዳ መታቱዋ ኡባ እ ዝቂ ኦደ ጼሌ፤ ዶኣ ኡባቶ እ ካተ” ያጌዳ።

Source notes (1)
  1. Cross-reference ማዝ. 74:14፤ 104:26፤ ኢሳ. 27:1

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.