Alkitab Bahasa Ansus
Lukasi 6
Autang parari a we nyontarai Yaudi endupi wa.
(Matiusi 12:1-8; Markusi 2:23-28)
Na a we nyontarai Yaudi endupiwa, Yesusi kong ne manarua wauya enda na romi pasibu pei. Interi ne manarua wauya etetang pasibu bongbau enkiarai na embarami interi etang tarai wau. Mana nyontarai embe Farisi peaya etoyo, “Pitoi dona metorobang arera na kamang akama taneng wadi, mae metong piwe esuara na a sabati Yaudi endupi wa nai pai?” Yesusi doyo, “Miawo metato piwe Dauti dona na pampongpa to, i kong we etuaripa ya embawi paina, i yua na Sen ne Manu Tenda Mamarang wadi rarong, interi kio roti we etona we pikika we Allai mae dang. Interi dong roti pea tato wu ne weetuari wauya we etang. Mana na kamang akama we tata pai, imami ya pino etang roti wawaupe.” Interi Yesusi kewio naria doyo, “Kumai Nyontarai nei, ne paya we kiutu pitoai etona na a we Yaudi endupiwanai pai!”
Yesusi dong panang we nyontarai we warado watang penanang
(Matiusi 12:9-14; Markusi 3:1-6)
Na a we nyontarai Yaudi endupiwa nai pei ea, Yesusi ria denyau na manu esomi nai. Na yana nyontarai we waradowatang penanang pei. Kuru akama Yaudi paya engkong nyontarai embe Farisi peaya emparama Yesusi pampang, imbaro dong nyontarai pea empanang na a sabati Yaudi pai mamo, etona etimburi we dong sara pi. Mana Yesusi aneao esanetatuata wau. Impaina kewio we nyontarai we waradowatang penanang wadi doyo, “Towa ruama boana rabuangne!” Impaina nyontarai wadi tewa doa. Interi Yesusi kewio weya doyo, “Impaina Yutang mia, parari piwe na kamang akamapai mamo, pitoai tatona na a sabati Yahudi pai pa? Tatong wemai ete tatong amuna e? Tampata nyontarai waro embeng ete tatamei ya e?” Yesusi rewawaria weya engkai, inte kewio wu nyontarai wadia doyo, “Tuwa waramupai ma.” Nyontarai wadi suwa warang wadia, impaina na tantuma warang wadi penang. Mana kuru akama wauya engkayoua emati mae, engkawio tatuata we pitoai ingkai etona we Yesusi pa.
Yesusi diri ne nyontarai uraya kodu etuari wauya
(Matiusi 10:1-4; Markusi 3:13-19)
Na a yani Yesusi wieita na wi rewowai wau ei we tendau. Na yana I tendau we Allai na diru tantenang. Do deidea mamo, Yesusi yau ne manarua wau yama, interi diri esuraya kodu na ya, yatino Yesusi yau ya werasuripa. Ya mamo esanomi pei: Simoni we Yesusi yawi we Petrusi, Andariasi neta baba Simoni, Yakobusi, Yoanisi, Pilipusi, kong Bartolomiusi, Matiusi, Tomasi, Alpeusi ne kumai Yakobusi, kong Simoni (Nyontarai we demuna we Israel wau entori warui Roma wauya), Yakobusi ne kumai Yudasi kong Yudasi Iskarioti we ingkai wio Yesusipa.
Yesusi denyau kong dong panang we nyontarai
(Matiusi 4:23-25)
Interi Yesusi wiana wi rewowai wadi kong ne manarua wauya, embiama etoa na we tabora wau. Na yana tato kawasa tau weetuari wauya, etong pau tato enda na raora Yudea tantenang, na Yerusalemi, na bendari Tirusi kong na Sidoni weketua we kareng wau. Endama eto entarao Yesusi, imbaro Yesusi dong ya empanang warui ui we na yapa. We semi-semi yepopa ya wauya endama tato, Yesusi dong semi-semi sa emanaing warui ya. Nyontarai we empau endama embawo waweria we etakatui Yesusi, wo paya peai mati warui Yesusi netarai wadi, we dona engkai empanang.
We etadu we mai kong we etadu manaing pa
(Matiusi 5:1-12)
Interi Yesusi reoa we ne manarua wauya mae kewio doyo,
Nyontarai mene piea wa mia metadu wemaipa,
tutu mia mamo Allai ne nyontarai di mia!
We na nina tato membawi pa mia metadu wemai,
mia ingkai memoi waweria!
We mesai pa mia, metadu wemai,
wo mia ingkai memari!
Tutu metua Kumai Nyontarai ne dona mamo nyontarai entatipa mia, etampi mia, engkangkani mia kong entopang kawio maiwa we mia, metadu wemai! Nabi paya na pampompa tato etadu pi toyanapa. Impaina nyontarai etong mia toyana mamo memararising, wo ingkai metadu wiwai baba na rora-marising.
Mana mia we mene ra pa memanaing,
wo metadu mararising na nunei tato, impaina awe rama wane ingkai metadu mararisingwa.
Mia we memoi na nina pa memanaing tato,
wo mia ingkai membawi!
Mia wememaripa memanaing tato,
wo mia ingkai mesanerarong papea kong mesai!
Mia we nyontarai etaparanding mia pa memanaing tato, wo na pampongpa konta ene mandarong paya etaparanding nabi taraiwa ea toyana.”
Mesanewiwu we embateta we mia paya
(Matiusi 5:38-48)
Mana we mentarao Yau na nina ne mia, etopana we mia joyo, “Mesaneo mene marowa wanea, mae metong piboki wu nyontarai esaneung miawa. Metong muang we nyontarai ekangkani mia paya, kong matandau we nyontarai etosaepi we mia paya. Parari nyontaraipei biapa tarandei dowatang pai mamo, poweriaua biapa tarandei dowiri pai ea. Parari dewa nemu asung pampang pai mamo, bong nemu asung ea pa konta. Nyontarai pei dutang we piea we au pa mamo, bona wei. Mae nyontarai pei dewa pi nemupa mamo, remo butana we dona taweri we au eampe. Menari piboki we nyontarai peaya, parari mia mesane we nyontaraipea enari we mia pa.
Parari mesanewiwu we nyontarai we esanewiwu we mia pa mamo, mendeo mesanesara we Allai ingkai myuang mia pe, wo nyontarai embe sasari paya kong esanewiwu nyontarai esanewiwu yapa tato. Mae parari metong piboki wu nyontarai etong piboki we mia pa mamo, mendeo mesanesara we Allai ingkai myuang mia pe, wo nyontarai embesasari paya kong etong toyana pa! Mae parari metong nyaki pe we nyontarai mesanesa ya we ingkai etona taweri nariaea mamo, mendeo mesanesara we Allai ingkai myuang mia pe. Nyontarai embe sasari pa kong etong nyaki pe we nyontarai embe sasaripa, interi etona taweri naria ea! Mana toyana wa! Mia tato mesanewiwu we nyontarai embemarowa we miapa mae metong piboki we ya. Metong nyaki pe weya, mae mendeo mesane we metaduta naria ea pe. Parari toyana mamo, metadu awaweri baba mae mia ingkai mesau Allai we Tedaipai we mene Yai. Wo Allai wadi anerarong wepiboki wu nyontarai enduinariawa we etong piboki, kong wu nyontarai etong pi maiwa ya. Impaina mesanewiwu we nyontarai, parari mene Yai na rora ne anewiwu nyontaraipa!”
Remo bimbu nyontarai pe
(Matiusi 7:1-5)
Remo bimbu nyontarai pe, imbaro mia tato Allai dimbu mia wa. Remo mambabati nyontarai ea ya pe, imbaro mia tato Allai dong mambabati we mia wa. Metupirandeni nyontarai ea ya imbaro Allai tato dupirandeni mia. Metong pi pinoma we nyontarai ea ya, imbaro Allai dona pinoma we mia. Pi donapa wawokobu parari inang we entawani na rotang ra biatang pira. Parari we mentatuata we eaya, ingkai Allai dona taweri dintatuata we mia tato.
Interi Yesusi sopana weya na sosiau nini doyo, “Wawo nyontarai endekabe wauya eting endekabe wauya e? Toyana mamo ingkai asaru kuira untawa aya kambireipei. Kumaipei tedai warui ne kurupai wa. Mana kumaio dedu aniau na we mai ria ne kurupai ingkai perari kurui nempai.
Pitoai mendeo aikeang na nemeta nempai rekamipai, mana airape na rengkami mantaung menempa mendeoa wa? Topino mia mentopana we meneta menempa ya metoyo, ‘Netapa au ruama ekiapi aikeangpai warui rengkami nemu pai,’ mana airape na rengkami menengpa mendeoiwa? Nyontarai metong sambamboni ne mia! Mengkiapi airape nyai na mendekami pa pampong wo, imbaro mendeoa na wemai aikeang na menetapa endekamipa kong mengkiapira.”
Ai kong ne bongpai
(Matiusi 12:33-35)
Ai we piboki pai ne bongpai wieng, toyana tato ai bo moyawa pai ne bongpa moyawa tato. Aipai rearoani na ne bongpa. Wo papea pai piana webong ara wa, kong nanipung papea pa piana webong angguri wa. Nyontaraine tatawo tantoa peina. Nyontarai we meipai ingkai nyari piwe mai wo anerarong pai mei. Mana nyontarai we mioyawa ingkai nyari piwe moyawa, wo anerarongpai mioyawa. Tutu we mati na worengpai ra na anerarongpai.
Sosiau parari nyontarai kodu we unari manu
(Matiusi 7: 24-27)
“Pitoi mesau Yau pampang we mene Seni, mana piwe entopana we miapa metong pararia wa? Nyontaraipa we riama tarao neu anyaupa kong dong pararia na mai pai mamo, i perari sosiau nini pai. I perari nyontarai we na a we nyari ne manupai mamo, yirai kambirei pa berarong, interi sau manu amangpai na kami. Impaina na a we poa dutu kio manupai, manu medidouwa wo piana sau manupai amangpai na kami. Mana nyontarai we tarao neu anyaupa kong dong pararia wa, i perari nyontarai wenyari ne manu pai wiata na kakopa wawongpa tato. Impaina poapai riama teterapi manu pai, ingkai manupai metota kangkuna!”
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.