Alkitab Bahasa Ansus
Lukasi 7
Yesusi dong panang we Yewoi pei ne woming na Kapernaumi.
(Matiusi 8:5-13; Yohanesi 4:46-53)
Ra sisu Yesusi kewioa kai na kawasa tau endenawau, yua wu Kapernaumi. Na yana nyontarai yewoi Roma pei ne woming pai we aneoi mantaung, yui era kikeu we keda. Toyana yewoinei tarao Yesusi paina, demi nyontarai masa Yaudi peaya enda wuria. Etewara imbaro riama dong panang we ne woming wadi. Enda wu Yesusia, mae etewara kangkuna we dongpata ya, etoyo, “Yewoi nei mei, impaina wento anemoi. Tutu i wo aneo Yahudi ne ama, wo piana piwarang nyari tane manu tasomi nai pa.” Interi Yesusi ria kong ya enda engkikeu yewoi nei ne manu pai, yewoi nei demi neta neya imbaro entopana wei etoyo, “Tuane remo woseungpe, wo yau emaiwa we ruama wua na neu manunei. Wo mantau neu wemai peawa we era wu Au ma. Impaina topang kawio katea, mamo neu woming nei penang. Wo na yau tato etuang we mananu baba mae na warau wawa rai pe yati wane etong tuang we mananu we yaunei. Ingkai ekawio wu rai pei joyo, ‘Rua!’ Wo I ria; mae ingkai etopana we eaya weiya joyo, ‘Ruama!’ I tato riama. Mae ingkai etopang we warau wawa pai joyo, ‘Bong pinini!’ Mamo ingkai dona.” Yesusi arokutuya tarao Yewoi nei kewio wau, interi dedaiweri wu kawasa tau we etuari wauya, riuwara doyo, “Etopana we mia, sanesara we baba nina yeduta na ea wa, kong na nyontarai Israeli ya tato!.”
Interi nyontarai wedemi yapa ya entaweri wu ne manu paia, etadu woming wadi piana penang to.
Yesusi dong aimiomangpei tewa na Naini
Interi Yesusi ria wu bendari we anong pei Naini. Ne manarua enda kuira konti kong kawasa tau. Topiana ria kikeu aturarei bendari wadi mamo, nyontarai we keda engkori emati, aimiomang koiri i memeari, inyani we ina, kong nyontarai tau na bendari nei enda etua inanei.
Ma topiana Sen reo inanei, aneng dutani ma aneoi era, interi kewio awaru doyo, “Remo waipe.” Interi ria kikeu kubirinei, dongtui kubirinei, ma wewe enduti wau etoa weta. Inte kewio we aimiomang nei doyo, “Yo towa.” Interi aimiomang nei tewa meoi kewio, inte Yesusi doni wu nyania.
Kawasa pitau ematai esomi Allai etoyo, “Nyontarai nabi baba, Allai ne nabi piana riama nyai na tane pandura nei. Mae Allai piana periri tata we ne nyontarai!”
Interi emwuwu arera we Yesusi na raora Yudea, ra sisu nunei tantenang.
Yesusi kong Yoanis Pembaptisi
(Matiusi 11:2-19)
Na awe Yoanis Pembaptisi dedu arera parari pitau we Yesusi dona tawa tantuma na weetuari wauya, i yau ne manaura umbe kodu na ya, interi demi asaru urutang wu Seni uroyo, “Au mamo Mananu weperiri ingkai ruamapane ete ingkai amatamang nyontaraipei weiya e?” Impaina nyontarai ne asaru unda sisu Yesusi, ungkawio uroyo, “Yoanis Pembaptisi demi andu urutang we Au, Au ingkai ruamapane ete ingkai amatamang nyontaraipei weiya e?” Na a wawau Yesusi dong nyontarai madupei empanang na ene ui wepau pa kong dedawa semi-semi mae I dong nyontarai tau we endepipu endena ea. Inte Yesusi riuwara we asaru doyo, “Mundara muntopana we Yoanis Pembaptisi, pitoai mundeoa kong muntaraoa nina: Nyontarai endepipu endenaria ea, nyontarai empaya etoa enda, nyontarai esui pado empanang, we emparo entaraoa, nyontarai we engkada esuwi, mae nyontarai enepie wa, embuwu Arera Weweng na Senpai weya. Mae piboki we nyontarai weesaneriru wa we Yau kong we entampi Yau wa. Toyana Yoanisi Pembaptisi ne nyontarai we demi asaru wau, untaweri mamo Yesusi kewio we kawasa taupai parari Yoanisi Pembaptisi. Doyo, “Pitoi donane menda wu we mapang1 wane ampa? Mendeo atodidowi we wanang yowaweri towana tonina e? Ete menda mendeo pio? Mendeo nyontarai we yesung asung remimoma e? Wereria, nyontarai we yesung asung weweng mae nepi, i mamo nu nempei manu mananu baba. Impaina pitoi dona mamo mendampa? Mendeo nabipei e? Tarai, mana' etopana we mia, nyontarai we menda mendeoi pai, i beba raweina warui Nabi wauya. Tutu Yoanisi Pembaptisi nini andi Allai kewio parari na Weraung Mamarangpai. Weraung Mamarang wadi riotu topinina,
‘Mendema, Yau yemi i pempong Au,
i ingkai nyari nemu rang wadi2.
Etopana we mia joyo, na nyontarai we wawing wauya etawingya na nunei, ei beba raweingna warui Yoanisi Pembaptisi wa. Mana katu we meia raweina na Allai ne maring wane rarong andi beba raweing Yoanisi Pembaptisi pa. Nyontarai tau kong we esau wiwai paya entarao piwe Yesusi sopana wau. Nyontarai nisati piana endoao Allai wo wepitarai, impaina Yoanisi Pembaptisi piana webaptisi ya. Mana nyontarai embe Farisi kong kuru akama Yaudi paya emba piwe Allai daoa we ea wau, tutu emaidai Yoanisi Pembaptisi webaptisi yapa. Yesusi kewio naria ea doyo, “Na pitoi yoni yintatua nyontarai na a nina ne? Ya emparari pitoi pa? Ya wo emparari kumai we emayoi na manu awayang, madupei esau waweria weya etoyo,
amandora pindotu amandoi rarung mararising we mia
mana memaidai memayai pe!
Amandoi rarung wekada,
mana mesai wa!
Yoanisi Pembaptisi riamapa, apea mamo I dampi wa kong dunung angguri wa, mamo metoyo I semi-semi esapopari! Kumai Nyontarai riama, I dampi dunung, mamo mia metoyo, ‘Mendeo nyontarai wanei! I dampibarui, meeru, pendura kong we esau wiwai kong nyontarai we embesasari. Mana Allai ne wemai pa dea na wepitarai na nyontarai tau we endoaoi paya.”
Yesusi na Simoni ne manu
Nyontarai embe Farisi we ano Simoni, dewa Yesusi dampi konti. Yesusi ria to manu nyontarai nembadi interi meoi dampi. Na bendari yani pai tato nyontarai wawing we ne sasari pei. Na awe taraoa Yesusi dampi na nyontarai embe Farisi ne manu wadi, i ria wu Yesusi ma, kong kio botori pualami pei donung na maning weairowu. Doana Yesusi karupui kikeu aeng wau mae yai pampang, rekaru wau tawa na Yesusi aeng wau. Interi kiapi Yesusi aeng wau na duangdau wau mae wopeoa kong yeraru na maning weyeirowu wadi. Impaina nyontarai embe Farisi we dewa Yesusi wadi reo we towawau. Kewio na anerarong doyo, “Parari nyontarai nini nabi dina keto, reo mateidi wawing nini we dongtuiri kong reo wawing wawadi wieng na sasari rarong!” Interi Yesusi kewio we Simoni doyo, “Simoni, pieai yo yaoa we au.” Impaina Simoni doyo, “Yai Kurue! Topana ki.” Yesusi doyo, “Nyontarai pe kodu umbenyaki we nyontarai we piata asaru na pe pea. Ei wenyaki pe piaura we kodu ea piaring (500), ei ea ne nyaki pe piakodu ea ura (50). Asaru kuira umbaita kai wa une nyaki wau, tutu wenepe wadi dupi randenia. Impaina na nyontarai wau asaru, mateidi aneo raweina nyontarai we piata na pe wadi pa?” Simoni doyo, “Yorato nyontarai we ne nyaki pau raweina kong biai baruira wai!” Yesusi doyo, “tarai! We anemuaopa toapeina.” Inte Yesusi reo wawing wadi mae kewio wu Simonia doyo, “Remo wawingnei e? Erawu manu nemunei ma, bong maria pea bindoi aeune wa, mana wawing nini piana dupi aeune na rekaru wau, kong kiapira na duangdaungwau. Au bomang wompemo yauwa, mana wawing nini wopeo aeune taweriwa na katepe ma sisu nina. Au wi maning na dukaminei wa, mana wawing nini piana wiowu maning we yeirowu na aeune. Tarai! Dosaiwara baba yana denyawa topino ne sasari we paupa piana Allai dupirandenito! Impaina nyontarai we dupirandeni katea, i ingkai dosaiwara katea tato.” Interi Yesusi kewio wu wawing wadi doyo, “Nemu sasaripa piana yupirandenia.” Nyontarai we emayoi etampi kong Yesusi wauya engkawio na esanerarong etoyo, “Mateidi nyontarai nini, wo dupirandeni sasari wau?” Impaina Yesusi kewio wu wawing wadia doyo, “Au roao Yau, impaina bodu paririto. Toweri na wemai.”
Source notes (2)
- Footnote Raora wekekawiri we woroi, wero maria kong nyontarai pea enai naiwa.
- Footnote Maleaki 3:1
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.