Skip to content
BibleKenya

Alkitab Bahasa Ansus

Lukasi 8

Wawing we endupata Yesusi

Woroi wami mae, inte Yesusi ria wari bendari wu bendari pa, na awapei wu awapei ya, imbaro wiuwu Sen ne kawio marising we Sen Allai riu we Mananu. Ne nyontarai esura ea kodu enda konti. Kong wawing peaya, we dosa empanang na ene uipa kong semi-semi. Parari Mariai wawing Magdala we Yesusi dedawa semi-semi boitu warui. Yohanai awani Khusai we riupi we Herodesi, Susanai kong wawing peaya ea. Wawing nisa ya endupata Yesusi ne marandang nei na piwe enempa.

Sosiau parari nyontarai we riayang pikami

(Matiusi 13:1-23; Markusi 4:1-20)

Na awe kawasa enda pampang wu Yesusi ma na bendari wau, empandura kong Yesusi, inte sopang sosiau pei ma doyo, “We dong romi pei ria riayang ne pikamipa. Ne eai tawa rurang rangnei impaina nyontarai entatara, kong aya etang nakai. Eai tawa na kakopa we wekami, tawa mana mamaa, wo dedu maria peawa. Pikami peai tawa na papea we aisasinai rarong, kamamai kuira mana kepang waweri paina kada. Ma eai tawa na kakopa weweng, impaina kamamai mae we bong, bong pa mamo piaring raweina. Kewioa ra kai toapeina, interi Yesusi kewio doyo, “We tarangkambirei mamo taramoa.”

Ne manarua wauya etutani, sosiau nei sopino. Interi Yesusi riuwara weya doyo, “Sen Mamarang dong mia metaoa piwe anyuing we Sen Allai riu we Mananupa. Mae we nyontarai peaya, pitau wawau tambuwua na sosiau, imbaro 1esayora mana endeoa wa, entaraoa mana esaneaoa wa. Sosiau nei soapei nina, pikami wadi mamo Allai ne Arera pina. Pikami we tawa rurang rangpai mamo, nyontarai we piana entaraoa Allai ne Arera pa, interi Nyombatang wadi riama kio kawio pa, warui esanerarong, imbaromi endeo endoaoa pe kong etadu paririwa. Pikami we tawa na kakopa we wekami mamo, nyontarai we entaraoa Allai ne Arera pai, engko na marising mana kawio wau wewoa na esanerarongba, endoaoa kateaki, na a we piea dauya mamo esutopui. Pikami we tawa na papea aisasinai mamo, nyontarai we piana entarao kawio wau, mana esaneaeraya we embeng tutu esaneko piwe ene kong mararising na nunei. Tutu tau wawau kepang ya impaina etong bong weweng peawa. Pikami we tawa na kakopa weweng, parari nyontarai we entarao Allai ne Arera pai, mae anekakepana na anerarong weweng ma we mai. Yati etong pararia sisu embawiong.”

Sosiau parari padamara

(Markusi 4:21-25)

Nyontarai pei kiai padamara pei interi kewuni na babeu pei wa, tutu doni wiata na pata pei wawa wa. Mana ingkai dong padamara wadi yawa na rerawuani imbaro nyontarai esua endeoi dea wau. Pitau we anyuing ingkai ra taparera kong we mawa wa ingkai tantaraoa ra dea kong tasayau wa. Toyana Neu anyau we mentaraoa mendetatuata aiwara, wo nyontarai we piana etadu anyaupa ya ingkai etaduta pau raweina ea. Mae nyontarai we emba anyaupa ya, maidau we wata ko yapa ingkai engko warui ya tato.

Yesusi nyani kong neta mantaung muang paya

(Matiusi 12:46-50; Markusi 3:31-35)

Yesusi nyani kong neta mantaung muang pa ya endawuri ma, mana etadutiwa wo kawasa empau kapara. Interi nyontarai pei kewio wu Yesusi ma doyo, “Yaie, nyamui kong nemeta mantaungpa ya enai riri etoyo esane we etadu au.” Mana Yesusi kewio weya doyo, “Nyontarai weentarao Allai ne Allai ne Arera wau mae weetong pararia, yati neu inani kong neu neta mantaung.”

Yesusi dong wanang dowara medori

(Matiusi 8:23-27; Markusi 4:35-41)

A peana Yesusi wieita to wa rarong kong ne manarua wauya, interi kewio weya doyo, “Mendama tantampira to ruru dowani.” Interi etapai. Inte etapai mamo Yesusi dena, interi dowara wia tantuma wu ruru wadia. Impa mamo maria yua na wa rarong wadi mae wa etawira. Interi we etuari wauya endama embauni etoyo, “Kuruie, Kuruie tangkadarai!” Interi Yesusi tewa, piayao wanang kong tarowa we dauya wadi. Interi wanang kong tarowa umadori impaina ruru wadi medoria keda. Interi Yesusi kewio weya Doyo, “Pitoi donane mendoao Yau wa pa?” Impaina ematai mae esarokutuya inte engkawio waweri weya etoyo, “Nyontarai pa matei sonini, wo wanang tutu tarowa untaraoi pa?”

Yesusi dedawa semi-semi warui nyontarai Gerasa pei

(Matiusi 8:28-34; Markusi 5:1-20)

Yesusi kong we etuari wauya etapai topong ra sisu raora Gerasa na ruru Galilea dowani. Na a we Yesusi wia wu reireiya, nyontarai muang pei we semi-semi esua nai, ria wu Yesusi ma, i na bendari wadi. Piana manyonapei amakakawiri mae meidai nyai na manu wau, aneweng nyai na i' we na aisata wau. Semi-semi neya piana enai nai paina, nyontarai etawi warang aeng na wai asaneng, mana pio kakutu waiwau interi semi-semi wauya engkori wu we mapang kakawiri. Nyontarai nei reo Yesusi, interi suang yomi na Yesusi renawau impaina Yesusi dedawa semi-semi wauya warui. Impaina nyontarai nei doyo, “Yesusi, Allai we tedai mantaung Antung, ingkai bong nyau topino? Yewara remo bong nyau eyui kapara pe. Yesusi dutang wu nyontarai nei, “Anomu pe?” Nyontarai nei kewio doyo, “Anou pei, ‘Legioni,’” wo semi-semi empau esua nai. Semi-semi wau ya etewara kangkuna, imbaro Yesusi reo dedawa ya wu pampeng we kada wa. Kikeu na raora wawau, tapui we eserai pi we etang na wi pei. Impaina semi-semi wauya, etewara kangkuna we Yesusi, imbaro Yesusi demi ya esua na tapui wauya. Interi Yesusi rioa oa. Impaina semi-semi wauya emati warui nyontarai wadi esua na tapui wauya, interi tapui nea etapaiya esaro wu ruru wadi, impaina esarewa engkada.

We embido tapui wauya endeo pi we toyana pa, impaina etapai interi embuwu kawio wawau na bendari wu awa na raora yana. Interi nyontarai taupa ya emati, imbaro endeo pi yana. Enda wu Yesusi ma, na yana etadu nyontarai we semi-semi piana endawarui pai, yesuni ea meyoi kikeu Yesusi aeng wau. Piana nyontarai nei anetatuatapa weng eanto, impaina ematai. Nyontarai we endeo pi wawau embuwua pi we dona mamo nyontarai nei penang. Interi nyontarai na Gerasa wauya etewara kangkuna, imbaro Yesusi ria warui raora wawadi. Wo ematai kapara. Impaina Yesusi wieita na wa pai inte teweri. Nyontarai we semi-semi endawarui dewara imbaro dua Yesusi, mana Yesusi demi ria, doyo, “Toweri to! Mae wuwu pitau we Allai dona we aupa.” Interi nyontarai wadi ria wiuwu pitau we Yesusi dona wei na raora bendari yana tantenang.

Yesusi dong Yairusi ne kumai tewa mae dong wawing we yui penang.

(Matiusi 9:18-26; Markusi 5:21-43)

Interi Yesusi teweri na ruru arawa dowani, nyontarai tau etanoni etamani na mararising. Interi we anong Yairusi riawu Yesusi ma. I mamo wedung na manu Yaudi esomi nai pei. Impaina suang na Yesusi aeng wau, mae dewara konti imbaro Yesusi riawu ne manu wanei, tutu ne kumai wawing nei, i mamo we memeari. Kumai nei tatua puda uraya kodu yuia kikeu keda. Na rang rarong wura to Yairusi ne manupai, nyontarai we pau esambui Yesusi mae embatitetari. Na yana tato wawing peana we piana puda uraya kodu, yui dawing ria2 mana dedu panang na ei eawa. I sara kikeu Yesusi na karupui, dontui Yesusi asung wopepa mamo, ui ria ne tato manaingpa. Interi Yesusi doyo, “Matei dontui yaupa?” Mana ei we raupuiwa pa, mamo Petrusi doyo, “Kuruie nyontarai we empau esambura Au mae embatiteta Au.”

Mana Yesusi doyo, “Ea andi dontui Yau, tutu eruradiduing paya ea tori na neutarai nei.” Interi wawing wadi reoa topino piwe dona wau piana dea to. Paina riama mana didora, suang na Yesusi renawau. Inte sopana pararia wu nyontarai wempau endenawau, pitoi donane dekatui Yesusipa, mae ne ui wau panangna peina to.

Inte Yesusi kewio wuria doyo, “Neu kumai pau roao yau paina ponaang, ruana we piboki.”

Topiana Yesusi kewio rai, mae nyontarai we etami na Yairusi ne manu pai, kewio wu Yairusi doyo, “Nemu karawingpai kedato, remo woseung Yai Kurui eampe.”

Mana Yesusi taraoa mamo, kewio we Yairusi doyo, “Remo motaipe anemusaraki, mae nemu karawing pai ingkai wiengki.”

Ra sisu Yairusi ne manu wadi, Yesusi doni yua konti wa wo mae Petrusi, Yoanesi, Yakobusi kong inyani, tamani ya ki. Nyontarai engkai esai mae etaidu we kumai wadi, mana Yesusi doyo, “Mendeo mesaipe, i wo kedawa mae dena.” Mana emari Yesusi tutu endeo we kumai wadi piana kedato. Interi Yesusi riu kumai nei warang wau mae doyo, “Aiwawingpe, towa to.” Interi kumai nei ne aseng teweri naria ya, ainato tewara doa. Interi Yesusi demi ya etoni dampi. Inyani tamani esarokutuya kia, mae Yesusi yuara doyo, “Mendeo membuwu kawio ninape.”

Source notes (2)
  1. Footnote Yesus weroana na weraung Yesaya 6:9, daoa pangpongpa piana parariato
  2. Footnote Ui nini parari wawingbau eneta rababaeara.

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.