Lukasi 9

Yesusi woretuwa nyontarai uraya kodu we etuari pa ya

(Matiusi 10:5-15; Markusi 6:7-13)

1Yesusi yau ne nyontarai ura ea kodu we etuari wauya ma, interi dong paya weya imbaro etintandawa semi-semi kong etong weesui empanang. 2Interi demi ya enda etong weesui empanang mae emberoang parari Allai riu we mananu. 3Yesusi kewio weya doyo, “Mengko piea na mene rang rarongpa wa, mengko aisoipe, kaketape, roweangpe, pe kong asung kodupe. 4Na totoi ea etewa mia menai na manu yani, menai kio memati warui bendari yani. 5Mae na nupa totoi entampi mia mamo, na a we memati warui bendari yani, mentatai wawu na mesaebampa imbaro we kamang weya“. 6We etua Yesusi etonta, interi enda wu awa pea embuwu Kawio Mararising we rana Sen Allai, kong na paya etadutapa etong we esui empanang.

Herodesi kong Yesusi

(Matiusi 14:1-12; Markusi 6:14-29)

7Na awe Herodesi we mananu riu na maring Galilea, tarao pitau we Yesusi dona tawa tantuma wau, wekaeng wo ea yati etoyo, Yoanisi pembaptisi piana wieng naria ea. 8Nyontarai pea etoyo, nabi Eliai denyawi ea, ea yati etoyo, nyontarai pei na nabi pampongpa we suwi naria ea. 9Herodesi doyo, “Woreutuwara paina Yoanisi raukanangpai entekutui to, mana nyontarai pa matei nini ea? Piana tarao kawio madu pei nai.” Toyana Herodesi yera pampang do imbaro reo Yesusi.

Yesusi dong nyontarai piaura we ura etampi

(Matiusi 14:13-21; Markusi 6:30-44; Yohanesi 6:1-14)

10Yesusi ne nyontarai uraya kodu entaweri ma entopana we Yesusi pitau we etonapa. Yesusi peraya interi enda kuira mameari wu raora kikeu pea na bendari Betsaida. 11Mana interi nyontarai tau entarao ya paina, endawu yara. Na wana Yesusi demasa, interi kewio wea topitotoi Sen Mamarang riu we mananu. Mae I tato dong we esui wauya empanang koya.

12Wo wadi ria do sawa kikeu to, interi Yesusi ne nyontarai esura ea kodu we enda konti wauya, engkawio wei mae etoyo, “Yaie, raora nini menanopi kapara. Impaina bomi nyontarai nea enda imbaro eserai roweang pea we etang, kong manu we etenana na raora we kikeu ninane to“. 13Mana Yesusi doyo, “Miati metongsa etampi pa!” Yesusi ne nyontarai urayakodu wauya etoyo, “Ama amane roweang peawa we amatong dakamitau nini dampi, amane rotipe boring tutu diang kodu. Ingkai amanda amambori roweangbe dakami tau nini e?” 14Muang meari wauya wo empiaura ea piaura we ring (5000). Yesusi demi ne manarua uraya kodu wau ya doyo, “Metami ya emayoi pandura takakutui, madu koiri mamo empiakodu ea ura.” 15Yesusi ne manarua uraea kodu wauya etong parari we Yesusi sopana wau. 16Interi Yesusi riu roti bo ring wau, diang kodu wau arota rora peidi, deparanding Mamarang peidi. Sopang piboki we Mamarang peidi interi piobabau roti boring wau tutu diang kodu na warang wau. Interi dona wu ne manarua wauya etingbiwo nyontarai we piau wadi. 17Dakamitau wadi dampi kuira mioiwaweria. Interi ne nyontarai uraea kodu we enda konti wauya etongkui roweyang we wata wau. Dedu bayai uraea kodu.

Petrusi rioa we Yesusi

(Matiusi 16:13-28; Markusi 8:27-9:1)

18A peana Yesusi we tendau mameari, nyontarai we etuari wauya enaikonti kikeu Yesusi dutang ya doyo, “We empau wane ya etoyo Yau wo matei di Yau?”

19We etuari wau etoyo, “Ea entopana etoyo Yohanis pembaptisi. Ea ya tato etoyo Eliai, ea ya nariaea etoyo Nabi pampong peana ea andi wieng taweri“.

20Yesus dutang doyo, “Mae mia mamo metoyo matei di Yau?” Petrusi doyo, “Auwo mananu we periri Allai derekamana“.

21Interi Yesusi kewio kangkuna we weetuari wauya doyo, “Mendeo memberoang pi nina we matei eampe.”

Yesusi kewio na ne kaidawau

(Mat. 16:21-28; Mrk. 8:31--9:1)

22Yesusi tato doyo, “Kumai Nyontarai 1 impaina yedu we moyawa. Mananu wauya mae we embedung we imami wauya sisu kuru akama Yaudi wauya I emuni, mana pira a pe toru ingkai tewa taweri.”

23Interi Yesusi kewio we kawasa weenai wauya doyo, “Nyontarai we eto etua Yaupa ya mamo, empika pitau we enempa mae mantau esado aitaba enempa anemai, mamo esane taweri we esaseung engkadapa wa mae etua Yau. 24Tutu we eto etarara embengpa, ingkai embeng pa nai. Mae weetompinong weembempa we Yau ingkai embengki woroi-woroi. 25Pitoi ingkai nemuipa, boyo nemu nunei kiai mana donane dumuainunung wadi nyai? 26Meto memamaya tutu Yau mae anyau neu wau, Kumai Nyontarai ne Yau tato ingkai emamaya yao miana awe erama wane, tutu paya Yai nempa kong sisu paya mampang we emamarang! 27Mentarao topino na mia we na nina imbe ea yati engkada wami mae endeo Mamarang riu we mananu.”

Yesusi ne tarai dea ra wieria na wi pei

(Matiusi 27:1-8; Markusi 9:2-8)

28Yesusi denyau pitau wa waua kai wepira a pe boitu, kio Petrusi, Yoanisi, kong Yakobusi enda embeita kuira wu wi pei, inte Yesusi tendau na wana. 29Yesusi tendau na yana, rekami weiyaea, asung we yesuna ra bua waweria. 30Na tantuma nyontarai kodu, nabi Musai kong nabi Eliai ungkawio konti. 31Unda na rora marising, umbaweria ungkawio kong Yesusi we ne kaida kikeuto na Yerusalemi. 32Na a wawau Petrusi kong we empanduya itorena mana na tantuma entawa, endeo Yesusi dea kong nyontarai kodu uroa konti. 33Na a we nyontarai ne asaru uro untaweri warui Yesusi pa, Petrusi kewio we Yesusi doyo, “Yai Kuruie, ninane weng we tata. Toyana mamo antonari yawa pe toru, koiri we Au, koiri we Musai, koiri we Eliai.” Petrusi kewio towawau aneaiwara ao pi we sopanapa wa. 34Toyana Petrusi kewio rai, mandipi wiama wido ya impaina ematai. 35Interi na mandipi wadi rarong, entarao nyondaupui we kewio doyo, “Neu Kumai we yiri pina, mentaraoi.” 36Interi nyondaupui nei menaing, endeo Yesusi memeari. Yesusi ne nyontarai toru ne itoru aidin itoru na pitaupa, mana piwe endeoa yanapa embuwua we nyontarai pei wa kio Yesusi nyai kosa wa.

Yesusi dong panang we kumai we dedu semi-semi

(Matiusi 17:14-21; Markusi 9:14-29)

37Ayari wadi Yesusi kong weetuari wau itombetoru embia na wi wadi, mae kawasa we empau endawu Yesusi ma. 38Muang koiri na kawasa we empau waya yau doyo, “Yai Kuruie, anemberia tutu remo neu kumai nei, i neu kumai koiri pina! 39Aoa semi-semi etoni paina, denanaboa mae netarai wadi tepapari mae worekowowuai. Semi-semi wau etameiri pampang mae emaidai endawaruipe. 40Piana yewa we nemu manaura paya we etadawa semi-semi, mana ene paya pea wa.” 41Yesusi doyo, “Mia topitotoi pa! Tutu miawo nyontarai we metompampinong mia mae mendoaoa wa! Rasisu totoi Yau enai kong mia mae yemang aiwara we mia? Ko nemu kumaipai ma!” 42Interi kumai wadi ria wu Yesusi, semi-semi wau engkai mae doni netarai wadi tepapari. Mana Yesusi miarang semi-semi wadi riatori paina kumai wadi penang. Interi Yesusi dong kumai wadi teweri wu tamania. 43Dakami wauya esarokutuya endeo Allai ne paya we baba wau.

Yesusi kewio nariaea parari ne kaida wau

(Matiusi 17:22-23; Markusi 9:30-32)

Na awe dakami wadi ria wekaeng endeo piwe dona wau, Yesusi kewio we ne manarua wauya doyo, 44“Mendekakepang aiwara mae mendeo memparandeng kawio neu ne pe: “Kumai Nyontarai ingkai empikari wu nyontarai we emamunapa embara rarong.” 45Mana we etuari wauya esane aiwarao we sopana wau wa. Tutu pitau wawau Allai denyuina wea imbaromi embekaenawa. Impaina yawo embarui we etutang werieao Yesusi, piwe sopana yana.

Matei beba raweina

(Matiusi 18:1-5; Markusi 9:33-37)

46Yesusi ne weetuari pa ya engkayou waweria tutu mateidi beba raweina na ya pa. 47Mana Yesusi rebau esanetatuatapa, impaina kio kumai antitui pei mae doni doa rurani. 48Interi kewio we weetuaripaya doyo, “Nyontarai matei demang we kumai nini na wemai tutu anuopa mamo demang we Yau tato. Mae nyontarai we demang we Yau, demang tato we wedemi Yau pai. Impaina nyontarai we metoyo meia na miapa mamo ingkai andi beba raweina, na Sen renawaupa!”

Nyontarai dua Yesusiwa dedawa semi-semi

(Markusi 9:38-40)

49Yoanisi doyo, “Kuruie, amandeo nyontaraipei dedawa semi-semi na anomupa, interi amasua nyontarai wadi, wo i dua tata wa.” 50Yesusi kewio we Yoanisi doyo, “Mesuari wa, wo nyontaraipa matei biateta mia wapa, i dongtutu mia.”

Awa pei na raora Samaria emaidai etamang we Yesusi

51Na awe ra kikeu we Yesusi wieita wu rora-marising pa, I mantauni kiutu we riato Yerusalemi, 52impaina demi mampaing peaya empamponi. Ya enda, interi esua to awa pei na Samaria imbaro etong pitau we etonapa we Yesusi. 53Mana nyontarai we na awa pai emaidai2 etamang we Yesusi, wo piana esaneaoa to tutu Yesusi ria taterapi Yerusalemi. 54Impaina na a we Yesusi ne manarua wauya, Yakobusi kong Yoanisi, piana usaneao pi wawau to, impaina ungkawio we Yesusi uroyo, “Sen, bo muaya mamo, tatewa adia pei, wia na rora imbaro dang baboa nyontarai neya e?” 55Yesusi dedaiweri interi miarang Yakobusi kong Yoanisi. 56Interi enda wu awa pea naria.

Nyontarai we esane we etua Yesusi

(Matiusi 8:19-22)

57Impaina Yesusi kong ne weetuari enda pampang wu Yerusalemia, nyontarai pei kewio we Yesusi doyo, “Yai aneu we eyua Yai Au to nupa totoi ea.” 58Yesusi daoa wei doyo, “Serigala ne kambirei, mae aya embe ene karaini, mana Kumai Nyontarai nei ne nu pea we wiana wa.” 59Interi Yesusi kewio we nyontarai pei eya ea doyo, “Bua Yau.” Mana' nyontarai wadi kewio we Yesusi doyo, “Worentuwa yau etaweri pampong wu manu wanea, imbaro yata iyai wo.” 60Yesusi daoa wei doyo, “Mempika nyontarai we endoaoa wa etata we ingkai engkadapa ya. Mana au, rua mae wuwu kawio pa parari Allai do riu we mananupa.” 61Nyontarai pei tato kewio doyo, “Yai, yau aneuwe era kong Au, mana worentuwa yau etaweria imbaro yewara we erane. 62Yesusi kewio we nyontarai wadi doyo, “Nyontarai we piana do dua Yau, mana retaweri we pitaubai ne we moyawapa mamo yuna wa na Allai riu we mananu wau.”