Alkitab Bahasa Ansus
Lukasi 10
Yesusi demi ne nyontaraipa ya embe piatoru ea ura
Toyana Yesusi diri nyontarai piatoru ea ura, interi demi ya embe kai kodu enda pampong I, wu bendari pea kong awa pea we do ria reoa. Yesusi kewio weya doyo, “Pi romi wau wo madupei, mana we engkutua empau wa. Impaina buewara we weneromi pai, imbaro demi weengkutu piromi wau empau ea.” Yesusi doyo, “Mendanto! Yemi mia membuwu neu Kawio mararisingne mamo, memparari domba antung we niai na Serigala we emamuna ene madukuira pa. Mendeo mengko biningkeni pe, kaketa pe mae sapatu pe. Mendeo metoaweta na rangpai we mentopang tabea we nyontaraipei wa. Mae mesua na manu pei mamo, mengkawio metoyo, ‘Madori pibokipai we mia kuira na manu rarong nini pai.’ Impaina na yana nyontarai we esane we madori, mamo kawio madoripa wata ko ya. Mae mene madoripa emaidaia mamo, mene madoripa ingkai taweri wu mia ma. Menai na manu yani pai kio mia menda warui awa yani. Metampi kong metunung piwe nyontarai yasa etona we miapa. Wo nyontarai we meriwa mamo ingkai dedu awaweri pei tato. Mendeo menda waweriape. Mae metoyo mesua wu bendari pei, nyontarai na bendari yani etamang mia na we mai, interi metang roweang etona we miapa. Mae metong we esui na yanapa empanang, mae mentopana we ya metoyo, ‘Allai ne riu we mananupe kikeu we miato.’ Mana menda mesua na bendari pei mae nyontarai na yana endu mia wa, na yana mamo mendawu rang baba na bendari yani mae mesayau metoyo, ‘Wawu na bendari menempa wetata' na amasaemi ne amangkapa titetara na amandenawau, mae imbaro mendekamang nina ne, Allai riu we Mananupa piana kikeu to.’ Yesusi kewio we ne nyontarai piatoru ea ura wau ya doyo, ‘Na a we nu ria niai wane, mambabati nyontarai Sodomi etadutapa, tapia raweina warui mambabati we nyontarai na bendari nini etadutapa.’ ”
Bendari we endoawa we Yesusi
(Matiusi 11:20-24)
“Nyontarai Khorasimi kong nyontarai Betsaida mia mengkai memanaing rai! Impaina na Tirus kong Sidoni na a we rampa, Yau yong piwe tawa tantuma parari mene rabuangpa nina weya, piana esanetaweri warui ene sasari pa kong etadori. Mana ingkai na a we nu ria niai wane, nyontarai Tirusi kong Sidoni ene mambabatipa ra tapia raweina warui mambabati menengpa. Mae au Kapernaumi metorato ingkai weita sisu rora-marising pai e? Wereria, au ingkai empi au ra sisu do Karuari. Matei tarao mia mamo tarao Yau, mae matei sampi mia mamo sampi Yau kong sampi wedemi Yau pai.”
We etuara empiatoru ea ura entaweri
(Matiusi 11:25-27, 13:16-17)
Toyana we etuara empiatoru ea ura wauya, entaweri na mararising mae etoyo, “Sen, semi-semi ya tato entuang we ama tutu amatadawa ya na Anomupa.” Interi Yesusi kewio weya doyo, “Erewo Nyombatang wadi sawa parari kewiewari na rora. Piwe etopana nina ne we pitarai! Piana yong paya we mia to, impaina mentakepang piara kong aiyoai mana mentoyanea wa kong mempokai Nyombatang ne paya pa, mana dong we memoyawa pea we mia wa. Mana toyana mendeo memararising wo semi-semi wau entuang we mia. Mana memararising wo piana Sen soi mesanomipa na rora-marising.
Kawio mararising kong piboki
(Matius. 11:25-27, 13:16-17)
Na a' yani, Yesusi merarising raweina tutu Duainunung Mamarang yumaoi, interi kewio doyo, “Yai eyomi we Au, Sen Au we ru na rora kong na nunei! Wo bonyuing taubai yana warui nyontarai we esanekurayang. Mana bonyawa we nyontarai we etadu anyau pea wa. Yai, piana pa waua anemurarompa. Pitaupai piana Yai bona kai wu Yauma to. Mae nyontarai pei wa rearoang Kumai wadi, wo Yai mantauni. Kong nyontarai pei rearoang Yai pa wo mantau Kumai wadi. Kong nyontarai matei Kumai wadi diri we denyawi Yai we ya pa. Interi Yesusi reweria wu ne manarua wauya mameari mae doyo, “Piboki we nyondekami we endeo piwe mendeoa nina pa. Wo ekawio we mia joyo, “Na pampongpa, nabi pe pitau kong mananu pitau, esane we endeo piwe mesaneoa na nina ne, mana endeoa wa. Mae esane we entarao piwe mentaraoa nina ne, mana entaraoa wa.
Nyontarai Samaria we anewiwu
Kuru akama Yaudi pei. Anemai mamo wiuwu kamang akama.1 Doa dutang tou Yesusi doyo, “Kurue, bonyau paina pipa totoi andi yoni mamo eweng piboki kio woroi-woroipa?”
Yesusi riuwara wei ma doyo, “Pitoi entoi na kamang akama wadi pa, pitoi botora na wana pa?”
Nyontarai wadi kewio we Yesusi ma doyo, “Bosaiwa Sen peidi, Allai aunemui pa na anemurarong tantenang, na dumuanunungpai tantenang, na nemu paya pa tantenang, na we anemutatuta pa tantenang, kong bosaiwa kawasa pandura kuira parari mantaung au.”
Yesusi doyo, “We buaoapa mai, bompararia mamo wueng ki woroi-woroi.”
Mana nyontarai nei do andi mei paina, dutang weri Yesusi ea doyo, “Matei di pandura kuira pa?”
Inte Yesusi riuwara wei ma doyo, “Muang pei wia na Yerusalemi wu Yerikho, ria aya nyontarai we emamuna wau embarararong, endorai, etawa piwe kiopa warui, interi empikari wiata, endawarui do keda wau kikeu. Sen ne woming wau ei iwo Imami2 dina tato, riana rang wawadi, reoi mana riawarui. Nyontarai wau ei iwo nyontarai Lewi3, itato riana rang siri wadi, dondeoi mana riawarui. Interi nyontarai Samaria pei dondama, riama reoi mana aneoi kapari paina.
Ria wuria, yi angguri wau dindoipi kapapo wau, interi dong maning wau to apawau, interi pepati riuwari wu keledai4 we yanai wadi, interi kiori wu manu we endama embai etena nai wadi, interi riuwai. Ayari wadi, dong pe5 kodu wu wene manu wadia doyo, ‘Ruwai nyontarai nei mae bowayang raweing nina, mamo ingkai yona taweri na a we etawerima wane.’ ”
Yesusi yui arari nei doyo, “Matei di na nyontarai toru ne itoru ma boyo, pandura kuirapa na nyontarai we yua aya we emamuna wauya pai.”
Kuru wadi daoa we Yesusi ma doyo, “We dosaiwari pai.”
Yesusi doyo, “Ruanto! Bomparari we topanapa.”
Yesusi riama wu Marta kong Mariai
Interi Yesusi kong ne weetuari pa ya enda topong ra sisu na awa pei. Na yana nyontarai wawing pei, anong pei Martai, dewari wu ne manu wadi. Martai neta wawing pei anongpei Mariai. Mariai wo meoi kikeu Sen Yesusi mae tarao ne anyau wau. Mana Martai yemupa tutu ra pitau we doyo donane dimbe sarawiri wau. Ria wu Yesusi interi doyo, “Sen impaina tui Mariai pika yau emariwa mameariki e? Bomie riupata yauwa e!” Sen kewio doyo, “Martaie, Martai wo! Au wekaeng kong womupa anemutatua pinini kong piwani. Mae we pitaraipe katu koiriki. Impaina Mariai piana diri to, we ingkai ei kiori waruiwa.”
Source notes (5)
- Footnote Weraung we Musai soi Hukum Taurat
- Footnote Imami wadi mamo na mandarong Lewi we kio piwe etona o Manu Mamarang.
- Footnote Lewi wemananu we riupata imami wauya na manu mamarang.
- Footnote Keledai mamo pieung we eting kopi.
- Footnote Pe Dinari wadi mamo pe Parenta Romawi. Dinari kodu mamo wiwai mariwa a kodu.
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.