Lukasi 11

Yesusi denyau parari tantandau

(Matiusi 6:9-13, 7:7-11)

1A' peana Yesusi tendau na nupei. Tendaua kai mamo, ne manarua wauya koiri sopana we Yesusi doyo, “Sen bonyau ama tatuata amantandau parari Yoanisi denyau ne we etuari pa ya entandaupa“.

2Topiana Yesusi daoa weya ma doyo, “Meto mentandau mamo mentopana topinina.

‘Yai,

Sen Allai Au mueari kawawuru.

Au amasomi we Au ma amataparanding Au.

Amane mananu di Au pa.

Imbaro Au we mananu na nunei.

3Bona we ama na anemai roweang we maiyato.

4Bupipira amane sasaripa,

tutu ama tato amatong warapi we etong we maiwa we ama pa,

mae remo tui amape na amasanesara ne naipe na a we pianea sou amapa.’ ”

5Yesusi kewio we weenda konti wau ya doyo, “Parari nyontarai koiri na mia ria wu we umpandu asarupei na diru rabuang, doyo ‘Manetaiye! Bong rotipe botoru we yauwo, 6tutu neu neta pei we riama, inte yua kong nyau mana neu roweangpea wei wa!’ 7Interi nemeta we rua wuriambadi doyo, ‘Remo woseung yaupe! Yau kong neu kumai piana amatenato. Aturarei amasuiri impaina etawa yong piwe buewarapa wa.’ ” 8Yesusi kewio topong doyo, “Interi topino? Yau joyo! Auwo munpandura, mana meidai tewa dong piea we aupe. Mana momaya wa mae buewara pampang, impaina ingkai tewa mae dong piwe buewarapa.

9Impaina etopana we mia, buewara mamo ingkai dona, mesera mamo ingkai metaduta, mento aturarei mamo ingkai aturarei yepari we mia. 10Tutu weetewara ingkai ea etona, weesera ingkai etaduta, mae weento mamo ingkai esepa aturarei we mia. 11Yai matei na mia andi antungpai dewa diang mae dong piara wei pa? 12Mae dewa aya newong mana dong ayoai wei pa. 13Impaina miawo nyontarai memamuna, mana mia tato metongpi weweng we mene kumai wauya, ea mamo Yai na rora dong weweweng raweina we mia! Ingkai I dong Duainunung Mamarang wu we etewara wuria“.

Yesusi kong Beelsebuli

(Matiusi 12:22-30; Markusi 3:22-27)

14Na a peana Yesusi dedawa semi-semi pei meti warui nyontarai we woretamung wadi, semi-semi nei meti mae nyontarai wadi kewio. Dakami ria dekakaworeng, 15mana ea etoyo, “I dedawa semi-semi na paya Beelsebuli,1 semi-semi ene mananu pina“.

16Ea yati etoyo entou Yesusi, impaina etewa Yesusi doyao piwe denyauwa topino I riana Allai ma. 17Mana Yesusi ruradiduing pi we esane tatuata na esanerarong. Impaina Kewio weya doyo, “Parenta pei tebabau mae enta kakutui mae embe marowa mamo dandiruwa kong wemunamunai. Mae mandarong we tababau embemarowa waweria weya mamo, mandarong wadi dandiruwa kong wemunamunai. 18Toyana tato na Beelsebuli ne mananupa. Ne we etuari wauya etoamuna we eaya mamo, ene mananu wau tababau manaing. Metoyo yedawa semi-semi na Beelsebuli ne paya pa. 19Toyana mamo, we etua mia pa ya etadawa semi-semi na matei ne paya pa? We etua mia pa ya mantau yati engkamang parari memai wa pa! 20Mana Yau mamo yedawa semi-semi na Allai ne paya pa. Impaina Allai do Riu we mananupa piana naina mene rabuangpato.

21Nyontarai wepiaya pei, kong ne pimamuna we mai, dong wido ne manupai mamo, pinempa wata mai. 22Mae we piaya raweina pei riama miungtatiri doni kiara mamo, wepiaya wadi dewa ne pimamuna we anesara na ne manu wadi, interi wiwo wekiara wadi pi ne wau. 23We engkong Nyau wa, embemarowa we Yau mae endupata Yau wa, etonane mariwa neune moya wa!”

Semi-semi entaweri eya

(Matiusi 12:43-45)

24Impaina semi-semi pei ria warui nyontarai pei, ria yera raora we kekawiri imbaro nyai nai, mana dedu nu pea wa. Topiana doyo, ‘Ingkai etaweri wu manu we piana epikari wanei!’ 25A we ria sisu pai dedu nyontarai nei parari manu kekawiri kong wana we mai. 26Interi ria kio semi-semi embe itu we emoyawa raweina, interi esua na nyontarai nei enai nai. Impaina nyontarai nei mioya wa raweing we pampongpa.

Nyontarai we empiboki

27Yesusi kewioa kai, interi wawing pei na nyontarai we empaupa ya kewio we Yesusi doyo, “Tarai! Wawing we dawing Au, dong u we Au pai, wieng kia.” 28Mana Yesusi kewio doyo, “We embeng raweina naria ea pa mamo, nyontarai we entarao Allai ne Arera pai we sopana mae etong pararia!”

Nyontarai etewa Yesusi doyao piwe denyauwa we I riana Allai ma

(Matiusi 12:38-42)

29Na a we kawasa esambu Yesusi pai, kewio topong weya doyo, “Kawasa na a wepui ninane emoyawa kia. Etewa joyao piea imbaro esanesa Yau, mana imbe joyao piea wa mae parari we joyaoa tawa na nabi Yunusi pa.” 30Parari nabi Yunusi we kamang we nyontarai na bendari Niniwe, toyana tato Kumai Nyontarai ingkai we kamang we kawasa na a pui ninane. 31Na a we nunei ria ki menai na wane, wawing mananu2 we riana wope wana sai ingkai tewa kong kawasa a ninane, ma i tato subakepang ya we etong we moyawa. Wo mananu wawing wadi ria woroi kia na nunei wope wanei, imbaro tarao anyau na Salomoi we ane kurayang. Mana na ninane eandi beba raweing Salomoi mana mentaraio wa. 32Impaina na awe nu ria menaingna wane, we enai na Niniwe ingkai entawa kuira kong nyontarai na a pui ninane, kong entubakepang weya. Wo nyontarai Niniwe nea esanetaweri warui ene sasaripa, wo Yunusi wiuwu Sen ne kawio wea. Mana na nina eandi beba raweing Yunusi mana mentaraoi wa kong mesanetaweri warui mene sasaripa!”

Rengkamipa wo parari padamara we deao nentaraipai

(Mat. 5:15, 6:22-23)

33“Nyontarai peiwo kiai padamara pei interi kewuni na babeu pei wa. Mana i dong padamara wia na piwe etoni suranai wadi, imbaro nyontarai we esua endeo wedea wadi. 34Rengkami wauwo parari padamara we nentarai wadi. Mae rengkamipa mamarang, nentaraipai dea tantenang. Mana rengkamipa pipapa mamo, nentaraipai tentenang tato berorang. 35Impaina bosaiwa pi, imbaro dea wenyaina aupai berorangwa. 36Impaina nentaraipai kiai dea, mae ea berorangwa, mamo nentaraipai dea tantenang parari padamara wewieriao au.”

Yesusi yua nyontarai Parisi kong kuru akama

(Matiusi 23:1-36; Markusi 12:38-40)

37Yesusi kewioa kai, nyontarai embe Farisi pei dewara we Yesusi imbaro dampi konti na manu nempai. Interi Yesusi ria dampi na yana. 38Nyontarai embe Farisi wadi arokutuya reo Yesusi dampi mae rioi warang pampong wa parari kamang akama Yaudi pai. 39Interi Sen kewio we nyontarai embe Farisi wadi doyo, “Nyontarai embe Farisi miawo metupi pirapi paruai ri wadiki, mana paruai rarong wadi keraria ma mia mentoyana pa. Meserai we nyontarai peaya etorato mia wo memai, mana mesanerarong wau wemoyawa. 40Miawo mentata kia! Metaoa we Sen Allai niari riwadi pai, I kong nyari rarong wadi tato. 41Mana pi nai na paruai rarong wadi, metona we mempata nyontarai ene pieawa ya. Na toyanapa pi menempa kai ingkai kakawiri kong Sen Allai aneoa pa. 42Nyontarai embe Farisi ne mia, memanaing rai! Pi maiyeapa parari metong perpuluampa we Allai pai na pitantanang menempa ne bompa, metona na we mai. Mana pi baba pa parari mesanewiwu Allaipai kong mengkutu kawio na maipa, metong pararia wa. Impaina ne weweng raweina mamo, metong pi baba yana na mai kong menari ne mayeawa tato. 43Nyontarai embe Farisi ne mia, mia wo memanaing rai! Mia mesane we memayoi na karapesa na pong na manu esomi nai pa, kong mesanewe nyontarai enduwa mia na kawasa tau endenawau parari na nu manu awayang pa. 44Manaing wemia, wo mia memparari aisata we dedu kamang wa3, nyontarai endana wawongpa mana enduinariawa wo ne rarompa kangkong.” 45Nyontarai kuru akama Yaudi pei kewio we Yesusi doyo, “Yai Kuruie!, Na kowio toyana pa mamo, Yai totipa ama tato!” 46Yesusi doyo, “Kuru akama Yaudi ne mia, mia tato memanaing rai! Metatura we nyontarai enari aseung pinini, enari piwani. Metong ami we memba we nyontarai kong metatura we etong pararia pa, mana mantaung mia tato memaidai mempataya na piwe etona yana. 47-48Mia memanaing! Wo mene woriaipa ya na pampong yana emung nabipa ya mae na pui nina menari nabipa esane wawongpa. Pi menari we nabipa esane wawongpa toyana, we kamang we mantaung mia, mendeoao mene woriai pa pi etona na pampong yana pa. 49Aidona Allai ne anekurayang pa na pampong yana doyo, ‘Yau ingkai yemi nabipa ya kong rasuripa ya we nyontarai Yaudipa ya, mana eaya emungsa kong eaya etamei ya!’ 50Allai do nina imbaro nyontarai a' nina na mia tutu nabi tau nyontarai emungsa pa, na a' nunei retenangpa. 51Weretenang na Habeli sisu Zakariai4, we emuni na Allai ne Manupai kong mesbah pai unerabuangpa. Mendoaoa! Nyontarai a' ninito ingkai deduami tutu tau ninapa. 52Kuru akama Yaudi ne mia, memanaing rai! Miawo mesaneaoa anyau we Musai soipa, mana mantau mia metong pararia wa. Kong metombawido nyontarai we eserai esaneaoapa ya!” 53Interi Yesusi riawarui nu yani, kuru akama yaudi paya kong nyontarai embe Farisi etoya kangkuna we Yesusi. Ya esua Yesusi imbaro kewio pampang parari pitaupa. 54Na yanato endekakepani na wemai imbaro entapu pitau we kewio arara pa.