Skip to content
BibleKenya

Alkitab Bahasa Ansus

Lukasi 12

Anyau we weetuaripa ya

(Matiusi 10:26-27)

Toyana nyontarai tau enduraidora ya impaina ra ea yati entakakepang esaemipa. Na nyontarai esamburi, Yesusi denyau weapi ne weetuari wauya doyo, “Mesaneapong aiwara we nyontarai embe Farisi ene piwe etona unawa, aino etosajara we etong we mai wau.” Mana piwe anyuing wau ingkai nyontarai endeoa kong piwe pora wau ingkai nyontarai etanyawa. We mentopana na diru, ingkai entaraoa na raida, mae we mesoremaniniwa na nyontarai entarakambirei na mandarong we anyui ingkai esayauwa we kawasa tau.

Memataitapi Sen Allaiki

(Matiusi 10:28-31)

Ekawio we mia, neu pandura pa mia! Mendeo mematai weemung menetaraipa mae ingkai ene paya we etong pianea we mia tato wa. Impaina yenyauwa we mia matei di memataitipa. Memataitapi Sen Allai mantauni. Wo I ne paya we miung mia mae dingkai mia wu rawanang adia rarongpai. Impaina pitarai etopana we mia, I memataitipa. Aya sumisumi embering, embo ya na manu awayang pe rekami we maiya wiri kodu. Mana toyana koiri ki Allai perandeni wa. Dumuandaung na dungkami wau tato piana Allai detora kuira, impaina mendeo memataipe, wo mia mentadai raweing aya sumisumi wauya.

Mendeo mematai we mendoao metua Yesusi pe

(Matiusi 10:32-33, 19-20)

“Mesaneaoa aiwara pi ninane, nyontarai we na kawasa endena wau rioao we i tato dua Yau, mamo Kumai Nyontarai tato rioa oi na Allai ne mampang endena wau. Mana nyontarai we rioao Yau wa na kawasa endenapa, ingkai Kumai Nyontarai rioa oi wa na Allai ne mampang endena wau. Mae nyontarai we engkangkani Kumai Nyontarai nei, ne sasaripa tato ingkai Allai dupipira. Mana nyontarai matei di kengkani Duainunung Mamarang pai, ingkai Allai dupipira ne sasaripa wa.

Impaina nyontarai engko mia to manu akama Yaudi, imbaro etutangsaera mia na Kuru akama ete na we endu wang mananu pa ya tutu mendoao metua Yau, mendeo mesaneaera parari pitoi metonapa kong pitoi mentopana we metingba miawa pe. Na yanapato ingkai Sen Duainunung Mamarang denyau mia na piwe ingkai mentopanapa.”

Sosiau parari nyontarai we nepi mana teta

Nyontarai koiri na weempau pa ya kewio we Yesusi doyo, “Yai Kuruie, topana we neu neta mantaung wanei, imbaro dong pi amanempa ea we yau na pi iyai dona wata we andu pa.” Mana Yesusi kewio ma doyo, “Netapa aune, matei di riuwa Yau we ekutu kawio ete ewe madukuira we maru e?” Interi Yesusi riuwara we kawasa tau we enpandura pa ya ma doyo, “Mesaneapong kong metamamang, mendeo mendewe mene ra pe.” Wo topitotoi nyontarai pi nempa pau raweina, mana dong weweng wei wa.” Interi Yesusi kewio na sosiau nini doyo, “Nyontarai wenepi pau pei. I ne kakopa we dong bong we pau. Nyontarai we nepi pau nei anetatuata na anerarong doyo, ‘Piana nu peawa to, we yimbi neu roweangne na kakopane, Pipatotoi yoni naria eampa'. Interi anetatua ea mae kewio waweria wei, “Oh! Anetatua piea, yemi nyontarai entota neu manu we yingtong pi romi imbaro enari we beba era pei. Na yana yingtongkui neu pasibu wau kong piea wau. Imbaromi etopana we mantau yau joyo, “Neu pitaubai kia, impaina yedu wewengpato kong pitaubai neu ne kai wa, wata we puda dediru. Interi ingkai erupiwa mae yampi, yunung emararising kia.” Mana Allai kewio wei doyo, “Aoa nyontarai we tota! Diru nini paito ingkai koda, interi matei di dedu pitaubai bong kuiri weau wadi. Toapeina tato we nyontarai yerai we riuri ra pau wei na nunei, mana na Allai renawau i tato yerai we riuri ra wei wa.”

Mendoaoa we Allai

(Matiusi 6:25-34)

Interi Yesusi kewio we manarua wauya doyo, “Ai donane Yau joyo, mendeo mesaneriru we mene aseng waupe ete we menetarai waupe, we pitoai ingkai metang kong pitoi ingkai mesasuna waupe.’ Wo membeng wau tadai raweina warui roweang wau kong menetaraipa tadai raweina warui asung mesasuna pa. Mendetuwa aya wawai wauya! Ya wo entantanangba kong etetang pianeawa kong ene manu pea wa we etisoni roweang, mana Allai deung ya! Miawo mentadai raweing aya wau ya. Na mia tato, mateidi na ne we aneriru wau piang ne aseng wau katea konta pa? Piana piwe antitui wawauki mene paya pea wa we metonapa, pitoi mesaneaera mia tutu piea wau pa? Mendea parari pibopu na mapang wau wawa, endupi wa kong menyayang wa. Mana mananu Salomoi wenepi era tato, ne asung we yesuna wau weng wa parari pibopu wau pa. Nanimpung we wawa na mapang wawa na anei mae kamai mamo enunumia kiai, mana Allai deung naningpung wadi impaina wiengkia. Mia tato Allai ingkai deung mia, we mendoaoa kairawa ne mia. Impaina, mendeo meseneriru kong mesanekaeng we piwe metang kong metunung waupe. Nyontarai endearoang Allai wa, ea yati etadawa pampang we pi wawau. Mana Yai na rora-marising piana anemao piwe mia mesaneaoa kuira. Mana meserai kangkuna imbaro Allai we mananu na mia, ingkai pitau eapa Allai dona we mia tato.’

Ra na rora-marising

(Matiusi 6:19-21)

Interi Yesusi kewio naria doyo, ‘Mia mentamami pai na anerarong merising riuwa mia we ne nyontarai na ne Riu we Mananupa. Impaina maidau we mempau wa ni mia mendeo memataipe. Metawayang pitau menempa, metong pe' yana pa wu nyontarai ene pianea wa wauya. Toyana mamo menari biningkeni we mai na rora-marising we mia. Biningkeni wawau emananapi engko wa kong pue etang kakarawa. Wo na totoi mene rapa wa na yana, na yana tato mesanerarongpa nai na yana.”

We riupatara we demang pampang

(Matiusi 24:43-44)

Yesusi kewio doyo, “Metamamang, mesarota pitaupa. Memparari mesasung mia pampang kong mene padamara mengkai dea pampang. Mai pararia we endupatara we piana etamamang ene tuan wadi teweri na munara didau wadi ma so aturarei wadi, ingkai entawa kaparia esepa aturarei wadi. Piboki kia we weendupata, we piana etamamang ene tuani na a weriama wane. Mesane sara kia, tuang wadi piana demamang mae ingkai demi we endupatara wau ya emayoi interi tuanei mantauni ingkai wesarawiri ya. Piboki kia we weendupatara wau ya wo ene tuanei reo ya etamani na ria ma wane, na diru rabuang ete kikeu we ayarie. Mesaneao ninane! Parari tuani we ne manu wadi, rekamang a we mananapiri nei ingkai riama wane, impaina peduawido ne manu wadi imbaromi we mananapi nei reo yua wu ne manu nei apuipe. Toyana mia tato, metamamang pampang, wo Kumai Nyontarai ingkai riana a we menduinaria wa.”

Wepiata nukepana kong wepiata we nukepana wa

(Matiusi 24:45-51)

Petrusi dutang doyo, “Sen ne Au, anyau nini Au boni we mantau amameari ete boni tato we nyontarai pea ya e?” Sen kewio wei doyo, “We riupatara matei di dong parari ne tuanei ne kawiopa na wemai kong anekurayang, ingkai ne tuanei riuwari we mampata we beba we mampata eaya pa, imbaro dong roweang we ya na a wane pa?. Piboki we mampata wadi, wo na a wane ne tuanei teweri naria ema deduti we riupi rai. Ekawio we au joyo, “Wo tuang wadi ingkai riuwa wepiata wadi we dosaiwa pitau we tuang wadi nengpa. Interi we riupata wadi mioyawa impaina kewio na anerarong doyo, ‘Neu tuang wanei woroi pi interi teweri mape, interi miungtati we endupata tau wauya engkai mae dampi dunung tutu meeru. Interi tuang nei teweri na awe rekamana wa, impaina tuang nei ingkai miung tatiria keda kong doni parari nyontarai we entaraoi wa entuang we Allai wa. Wepiata piana aneao ne tuang nei pi we anewea wau, mae demamani kong dong parari piwe tuanei dona pawa, impaina riorai era membabati memba kangkuna. Mana wepiata wadi riuinaria wa we dong parari tuang nei aneweapa wa, interi dosara pi impaina tuan wadi rioatatiri katea. Wo nyontarai we piana Allai dong pitau pa wei, impaina nyontarai wadi dona pau tato. Kong nyontarai we piana Allai rioaoi na pitaupai, ingkai i tato Allai dewa pi pau pea konti.”

Yesusi kio marowa

(Matiusi 10:34-36)

“Erama nina imbaro etatuwa adia mamo marowa na nunei. Aneukangkona we marowapa piana tawato parari adia we dang! Mamambati baba pea ingkai yeduta to. Piyana tawa wa ingkai aneurarong nei dutang nyau pampang weya. Mana metorato yau erama we eko wemadori to nunei e? Wereria, eko wemadoriwa, wo eko marowa. Na a nini pai topong, mandarong pei embering mamo ingkai embawaweria, itombe toru itombe marowa we umbe kodu tato, umbe kodu umbe marowawe itombe toru. Yai ingkai embawari ne kumai muangpai kong kumai wadi ingkai embawari tamani. Nyani ingkai embawari kong ne kumai wawing pai kong kumai wawingpai ingkai embawari kong nyani. Neoni ingkai embawari kong rewang wadi, rewang wadi ingkai embawari kong neoni wawing wadi.”

Tandetatua kamang na awapui nina

(Matiusi. 16:2-3)

Yesusi kewio tato we nyontarai weempau wauya doyo, “Impaina mia mendeo nyontarai we deto mandipi weita na do wanangmarai, menduwara metoyo, ‘Ingkai miuna mamo taraie miuna pararia. Mae mia menduradiduing wanang sai pai wia, metoyo, ‘Ingkai wo riata, ‘Tarai wo riata pararia. Mia nyontarai we metong sambamboni we metong we mai! Mia metao mering, miuana, wanang kong wo riata pa, mendetatua pararia na rora kong nunei. Mana pitoi dona we kamang na awapui nina mendetatuata wa pa?”

We wemarowa wemiapa mempiboki wei

(Mat. 5:25-26)

Topitotoi peino mengkutu kawio na wemai wa pa?. Mae Nyontarai pei dimbu au to manu we etingkutu kawio, werai kangkuna we imbaro bong kawio wau kai kongti na mune rang rabuangpa. Wo wereria mamo, ingkai kio au wu weendu wangka engko auwu purisi interi purisi etong au wua bui. Ekawio we au joyo, “Au ruatori warui bui wa kio buai wiwaiwau ara kai.”

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.