Lukasi 13

Mesane taweri warui mene sasari wauwa mamo ingkai memanaing rai

1Na a wawau nyontarai peaya endama engko arera we Yesusi, parari nyontarai Galilea we Pilatusi miungya pa ya. Pilatusi miungya na a we engkutu ene pieung we pikika we Allaipa. 2Mana Yesusi kewio weya tonina, “Impaina metorato nyontarai Galilea wawau ya, etadu kaida towawa wau mamo, ene sasari baba raweing nyontarai Galilea eaya e? 3Wereria wiria! Mae mesanekakepana, wo mesanetaweri wa na mene sasaripa mamo, ingkai mengkada tato parari ya. 4Topitotoi tato na nyontarai esura ea injatoru we embe bemuna na Siloami, na a we kamoung pai tekai dedau kepang ya pa? Memananai na wawau subakamana we ene sasaripa baba raweina warui nyontarai tau we enai na Yerusalemi wau ya e? 5Wereria! Mae etopana we mia naria ea. Mesanetaweri warui mene sasaripa wa mamo, ingkai mia kuira tato mengkada parari ya.”

Sosiau parari ai ara we wewiong wa

6Interi Yesusi sopang arari pei we sosiau topinina doyo, “Nyontaraipei ne ai arapei na ne romi angguri pai. Apeana ria yera ne bongpai na ai wadi, mana dedu koiripara wa. 7Impaina kewio we weriupi na ne rominei doyo, ‘Remoa, pudape toruto erama eyera ara bongpai na ai ara nei, mana yedu koiripara wa. Rowang ai ne ki! Wo mantau doa pinoma na kakopanei dang pinong roweang na kakopanei!’ 8Mana we riupi na romi wadi kewio wei doyo, “Tuane! Tuntui doa puda koiri nini eambo, ingkai etara kakopanei wari mae yong pupuki pea oi. 9Imbaromi pitau yona oi ninane donane wewiong na puda we riaema neipe. Mae wereria mamo, interi bomi ya endowani ki!”

Yesusi dong panang we wawing we karubu na a' we nyontarai Yaudi endupi wa

10Na apeana a we nyontarai Yaudi endupiwa nai pai, Yesusi denyau na manu esomi nai pei. 11Na yanapa wawingpei, we piana pudape uraya injatoru yui, wo semi-semi esapopari. Wawing wawadi karubu mae doatera wa. 12Toyana Yesusi reo wawing wadi, yawima kewio wei doyo, “Na nina piana ponang warui nemu uipa.” 13Interi Yesusi dong warang wau wata na wawingnei waradarawau, na wawau to doatera ma deparanding Allai. 14Mananu na manu esominai wadi keyou, wo Yesusi dong nyontarai empanang na a we nyontarai Yaudi endupi wa pai, impaina kewio we nyontarai tau wauya doyo, “Ape bowonang we tandupi, impaina menda na a we yana ma we Yesusi dong mia mempanang. Mana mendeo na a we Yaudi endu piwa nai nei pe.” 15Yesusi daoa weya doyo, “Nyontarai metosajara ne mia! Na a we Yaudi endupiwa nai pai, pitoi memati mae mene pieung sapi kong keledaipa ya metong ya etampi kong etunung. 16Mana, na ninane wawingpei na mandarong Abrami, we piana manyonapei pudape uraya injatoru, nyombatang dawiti. Impaina i mamo epikari warui ne uine na a we Yaudi endupiwa tato e?” 17We Yesusi daoa wau donara we emarowa we Yesusi wauya emamaya kia, mana nyontarai ea wauya engkai emararising we endeo pitantuma Yesusi donapa.

Sosiau kodu parari piana Sen riu we Mananu wau

(Matiusi 13:31-32; Markusi 4:30-32)

18Interi Yesusi dutang doyo, “Na a we Allai riu we mananupa mamo topitotoi, pitoi andi Yoni we yintatua pininane pa? 19I parari pikami we engkoria endayani na ene romipai. Pikaminei kirinti kangkuna warui pi na romi, mana kemamaia we ai mae ayane esapoma engko enekaraini na arawang wau.”

20Mae Yesusi kewio naria doyo, “Na pipatotoi di yoni we yintatua nari Sen riu we mananupa ne? 21I wo perari ragi we wawing engkori etingpau tepung rotang maserere pe toru na bokori baba pei donane weita mai tokoiri.”

Aturarei we kiepang

(Mat. 7:13-14, 21-23)

22Interi na awe Yesusi ria wu na bendari Yerusalemi pai, ria denyau na bendari pei to bendari pei eaya kong na awa pei to awa pei eaya. 23Nyontaraipei dutang Yesusi doyo, “Nyontarai maidau nisati ingkai etadu wengki woroi-woroi pa ne?” 24Yesusi kewio wei doyo, “Mesera kangkuna imbaro mesua na aturarei we kiepang wanei. Etopana we mia! Madupea yati esera kangkuna we esua, mana etaduta wa.” 25Mae parari tuani wene manunei tewa peremang aturarei wanei mamo, ingkai mento metewara, Tuane wepa aturareinei we amawo, mana wene manu wadi riuwara we mia ma doyo, ‘Yau eruinari mia wa na menda na pa wa. 26Impaina ingkai metoyo, ‘Piana amatampi amatunung kong au mae rua bonyau na rang na bendari amanene to'. 27Mana ingkai riuwara we mia doyo, ‘Erui nari menda naima pa wa. Mendawarui yau, we menari we moyawa mia!’ 28Na a we mendeo Abrami, Isaki, Yakupi kong nabi pitau emayoi emararising na Sen ne riu we Mananu na wane mamo, mesai mengkarikakapa menderemi tutu miati memeari engkai mia toripa. 29Mae ingkai nyontarai pitau we endama, na do wanang ba, na do wanang sai, wope murang kong wope wanang marai. Etong anani baba na Sen ne riu we mananu rarongpa. 30Impaina nyontarai we empipui yati empampong mae nyontarai we empampong wauya ingkai empipui ea.”

Yesusi anengyai we Yerusalemi

(Matiusi 23:37-39)

31Na a wawau tato nyontarai embe Farisi pea ya enda wu Yesusi ma engkawio wei etoyo, “Remo nuai na ninape! Rua wu nu pea weiya ra, wo Herodesi anewe miung Au.” 32Yesusi daoa doyo, “Menda mentopana we nyontarai wemei wa pai, a nini kong kamai yedawa semi-semi kong yong nyontarai we esui empanang, mae na a we botoru piwe erama yonapa ingkai yonara kai. 33Mana topiyana era pampang, anei, kamai, ayariaea, wo moyawa we nyontarai nabi pei emuni na Yerusalemi riwane. 34Yerusalem, Yerusalemi! Au mung nabipaya. Nyontarai we Allai demi ya we aupa ya, woya na kamia engkada. We bototoi aneu we eruwa nemu nyontarai paya, parari mangkuei wawingpei warakepang ne kumai paya na warapemapa wawa, mana muayawa.

35To wawau mamo Allai derara miawa to. Mesanekamana, na nina tato ingkai mendeo Yau eawa ra sisu awe mentopang metoyo, “Piboki we I, we ria na Sen anompai.”