Lukasi 14

Yesusi dong we yui pei penang

1Na apeana, a we Yaudi endupi wa, Yesusi ria wu nyontarai we mananu we nyontarai embe Farisi paya pei to ne manupaia we dampi konti. Na yanapa nyontarai pitau endetatua Yesusi na pitarai, na piwe ingkai dona wau. 2Interi nyontarai we warang aeng babara pei ria wu Yesusima. 3Interi Yesusi dutang wu kuru akama Yaudi paya kong nyontarai embe Farisi we enai na yana paya doyo, “Parari kawio we Musai soipai mamo, tampika nyontarai empanang na a we Yaudi endupiwa nai nei ete wereria e?

4Kuru akama paya kong nyontarai Farisi wauya aidisa. Interi Yesusi riu na nyontarai we yui wadi warangwau, doni penang interi demi ria. 5Impaina Yesusi kewio weya doyo, “Topitotoi, na mia nyontarai pei ne kumai ete ne sapi pei, sawa wu parigi pei rarongpa na a we Yaudi endupi wa, mamo ingkai merarua riuwari warui parigi rarompai maei rai.

6Mana parari pi wawau nyontarai pei dao pianea we Yesusi wa.

Yesusi denyau nyontarai imbaro esane aiwaya kong esanewiwu

7Na yana Yesusi reo we esau ya wauya, etiri nu we piboki we emayoinai. Impaina dong anyau nini weya doyo, 8“Nyontarai esau mia wu munara didau peia mamo, mendeo metiri kadera wepiboki we memayoi nai pe. Wo nyontarai ne munarapai donane yau nyontarai baba pei ma pe. 9Imbaro we ne munara yau maru kuira wadi, riama sopang we au doyo, ‘Aune! Nu piboki nini empikari we nyontarai eyauwi yani pai'. Mana mumaya kia, kong boa rua to wapui wanei. 10Wo toyana parari etewa mia, metiri nu we naina wapui wiri wane, imbaro tuani we ne manu wadi ingkai riama kewio we au doyo, Netai ye! Ruama moyoi na nu we piboki nina. Towawau mamo, nyontarai etuang we mia na nyontarai tau we esau ya ne endena wau.

11Wo nyontarai matei di doyo tedaipa ingkai rianyaung, mana we ria nyaung pai ingkai ria tedai ea.

12Interi Yesusi kewio we tuani we ne manunei doyo, “Impaina wau nyontarai peaya we metampi kuira na raida ete na diru mamo, remo wau nemeta paya, ete nemu aririrapa ya ete nemeta mantaung paya ete manu kiria we ene ra pau paya pe. Wo yati ingkai esau au ea, mamo na toyana au boduta taweri na piwe bonapa to. 13Impaina parari bo bong munara pei mamo, wau nyontarai we engkiaripi, nyontarai we netarai maiwa, nyontarai we empaya kong nyontarai we endepipu. 14Au ingkai bodu muang na Allai, wo nyontarai yasa embai weri nemu wewengpa wa. Nemu weweng wau ingkai Allai mantauni biaita na a we nyontarai we embeng entawa taweri na ene kaida pa.

Sosiau parari munara we beba

(Matiusi 22:1-10)

15Na a we nyontarai pei dampi kuira na wawau tarao Yesusi kewio wau, inte kewio wu Yesusia doyo, “Myuangkia nyontarai we ingkai dampi kong Allai, na a we riama we we mananupa!”

16Mana Yesusi kewio we nyontarai wadi doyo, “Na apei, nyontarai pei dong munara we beba mae yau nyontarai tau. 17Toyana na a we munara wadi ne ape mai we etonipa, nyontarai ne munara wadi demi ne patarapei ria wu dakami tau we yau ya pa mae doyo, ‘Mendama to, pitaupe piana manyena to!’ 18Mana ya engkai, koiri, koiri etoyo emaidai endamape. We retenang wadi kewio we patara wauya doyo, ‘Yau katene ewori kakopa rabuang pea, impaina yo era ereutatuata. Koyou yau pe.’ 19Eandi na ea kewio doyo, ‘Katene kai ewori rembupe embe ura impaina yo aneu we era yongtatua ya wo. Piana koyou yau pe.’ 20Eandi na ea kewio doyo, ‘Katene kai edidau impaina imbe eramantu wa.’

21Patara wadi teweria mae sopang pitau yana we ne tuang wadi. Impaina ne tuang wadi keyou kia, inte kewio we patara wadi doyo, ‘Rua moraru wu rang baba kong rang maiya na bendari wane. Ko kuiyama nyontarai we engkiari pi, nyontarai we enetarai meiwa, nyontarai we endepipu kong nyontarai we empaya wa. 22Interi patara wadi kewio we ne tuanei doyo, ‘Tuane, worentuwarapa piana yonato, mana nu madu peai ne rai.’ 23Interi tuang wadi kewio ea doyo, ‘Rua wu rang baba pa kong rang saora we wana na bendarinei riwane, imbaro neu manunei donung na kawasa'. 24Mesane kakepana! Wo nyontarai pitau eyau ya pampongpa, koiri tato wa dang roweang munara neu nei wa.”

Pitau we nemupa pikara mae bua Yesusi

(Mat. 10:37-38)

25Interi nyontarai madupei enda kuira etua Yesusi. Yesusi reweria interi kewio weya doyo, 26“Impaina nyontarai pei riama do derua Yau, mana aneokapa inyani, tamani, ne wawing, ne kumai paya, neta paya kong mantau waweri, mamo i berui we dua Yau wa. 27Nyontarai we meidai yedo ne aitabapai1 mae dua Yau wa, mamo i meiwa we dua Yaupe. 28Parari na mia, nyontarai pei nyari manu we tedai pei mamo meyoi deto parari pe bototoi ingkai nyari ne manu wane nai pa, imbaro ane kamang we ne pe' maiatone ete wereria raie. 29Wo pararia deto na we mai wa mamo, nyari manu amang wadi mameari mae piaya we nyari manu wadi kiai wa, wo pe wau maiya wa. Mamo ingkai nyontaraipa endeo pi wawau ingkai emari. 30Kong ingkai engkawio etoyo, ‘Eh, Topitotoi! Nyontarai nini piana ne paya we nyari manu amangnei mameari, mana ne paya wa we nyari manupaia kiai wa'.

31Parari mananu baba we wedung na nupei we ne raipe piaura weura (10.000), eto emamuna we mananu pei ea ya. Mananu yani ne raipa embe piaura weura wekodu (20.000). Mamo mananu wadi ingkai meyoi anetatuata parari ne rai wauya, we empaya emamuna we mananu ne raipa empau pa ya ete wereria e? 32Mae parari mananu pai anetatuata we piaya wa mamo, na a we ne marowa wane ya enai woroi rai, ingkai demi ne mampaing peaya imbaro etutana we pitoi etona we epandurapa kong endu na embarami pa.” 33Yesusi kewio kai toyana, mae sopang doyo, “Topiyana tato na mia kuira. Nyontarai pei na mia, doyo dua Yau, piana anetatuata aiwara. Wo pika pinempa kuira wa, kong perandenia wa mamo, meiwa we dua Yau.”

Ai we maria

(Matiusi 5:13; Markusi 9:50)

34“Ai wadi wieng, mana parari ria yeiwe maria, ingkai na pitoi kai ria yei masuasung naria eampa? 35Ne weweng pea ea wa to, weng we etingpau pianea ea wa. Impaina ingkai engkai pinomi. Mentarangkambirei pea mamo mentaraoa!”