Alkitab Bahasa Ansus
Lukasi 15
Sosiau parari Domba we nyai
(Matiusi 18:12-14)
Na a peana, nyontarai esau wiwai we mananu Kaisari kong nyontarai etong sasari endawu Yesusi ma entarao denyau wau. Impaina nyontarai embe Farisi wauya engkong kuru akama Yaudi etoya we Yesusi etoyo, “Pendu nyontarai wesasari wauya dampi kong sa!” Interi Yesusi kewio na sosiau wauei wea doyo, “Na mia matei di ne piaung domba empiaring (100) interi koiri nyai, mamo pika piamanua ea uraya injatang (99) enai na mapang mae ria yerai we nyai wadi kio dedutipa? Mae deduti mamo merarising kia riuwari yedowi kiori teweri.
Ria sisu manu wane mamo yau we empandu ya wauya kong yau we manu wararei wauya mae sopana weya doyo, “Mendama tamararising kuira, wo neu domba we nyaipi piana yeduti taweri to. Impaina etopana we mia, na rora-marising tato mararising baba we nyontarai sasari koiri we pika ne sasari wau, baba raweing warui empia manua ea uraya injatang we etoyo ya wo embe sasari wa.
Sosiau parari pe we nyai
“Wawo wawing matei ne pe minape ura. Toyana mamo koiri nyai impaina pitoi doni pa? I ingkai kiairao padamara mae dira aerai yerai na we pitarai kio deduti. Yeraia deduti mamo yau we empandu ya kong aiwaiwari paya inte doyo, ‘Memararising kong nyau, wo neu pe mina koiri we nyai pi yeduti to'. Impaina etopana we mia, toapeina tato nyontarai wesasari koiri teweri warui ne sasari wau impaina Sen Allai ne mampang wau emararising kia.”
Sosiau parari kumai we nyai
Yesusi kewio sosiau pei naria ea doyo, “Paituang pei ne kumai muang pe kodu. Kumai maiya wadi kewio we tamani ma doyo, ‘Yaie, wiwo piwe tanempa to imbaro bong neupa ma. Impaina tamani wiwo piwe enempa we ne kumai wau asaru. Apeasaru kumai wayangpui wadi wio pitau we nempa interi donta to nu we woroi. Na yana demei pe nempa na deinunung kong dong pi wemai wa ma denakong wawing we emamota tutu anetatuata aiwarawa. Interi ne pe wau piana kai kuira, mamo piwawi baba deduta na raora yani pai. Na peinato dedu pikatu yanei wa. Interi ria riupi kong we ne nupei we demi wu raora we eteung tapui wau yanai wadi, imbaro deiwai ne tapui wauya. Mana wewi kapara paina, anekangkong we dang roweang tapui wau, wo nyontarai pei tato dong roweang pea wei wa. Sisu yana aneaiwari ma doyo, ‘Nyontarai we endupi kong iyai esarirang roweang, mae na nine wawinei dona kia yo ekadane kikeu. Yau interi etawa mae era wu yaia ekawio wei joyo, “Yaie, yau piana yong sasari we Allai kong yai au pa. Yau wo emaiwa we wau yau we nemu kumai wa. Bong yau parari nyontarai we erupi we au“. Interi tewa mae ria wu tamania. Toyana na woroi tamani reaoi mae anengyai, impaina depai mamani. Interi tamani tepuri mae wopeoi.
Kumai wadi kewio wu tamania doyo, “Yai piana yong sasari we Allai kong we yai au, neu wemaipea wa we wau yau we nemu kumai pa wa“. Mana' tamani yau weendupatari wauya mae doyo, “Memararu! Mengko asung wewengpei ma metoni yesuna. Metong sarakapei na warakeapai kong sapatu na aengpa. Toyana mengko sapi antung we piung pei, mengkutui mae mendama tatampi kong tamararising. Wo neu kumai nei piana kedato mana wieng ea! Piana nyaito mana yeduti taweri naria ea. Interi etong munara wau kia. Toyana kumai retenangpi nyai na romi wane. Na yana teweri riama kikeu manu wau, interi tarao endoi emayai. Yau nyontarai wepiata pei ma, interi dutani doyo, “Pitoi ai naina manupe nina?” Wepiata wadi kewio wei doyo, “Nemeta maiya pai interi teweri ma ne. Impaina tamamui demi ama amangkutu sapi antung wepiung, wo i piana dedu ne kumai we nyai pai teweri na wepiboki“. Kumai retenang wadi keyou era, impaina meidai yua wu manu wau ampe. Interi tamani meti ria kewio ayari imbaro yua wu manupui ya. Mana kewio we tamani doyo, “Puda dediru taupa erupi pitarai we iyai au. Kowio piea we yau mamo ebateta au wa, mana pitoi iyai boni we yau pae? Bong kambing pei we yau wa, imbaromi yomararising kong neu aririra nea. Mana nemu kumai wadi dong pitau paiya menaing kong wawing emamota, mae toyana teweri ma iyai kutu sapi antung we piung pai wei'. Tamani kewio wei doyo, ‘Kumai pa au,’ nuai pampang kong nyau. Pitau we neu nina pi nemu pina tato. Mana nina ne, nemeta nei piana parari keda, mana wieng taweri ea, nyai mana tataduti ea, impaina topitotoipa tatong munara kong tamararising.”
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.