Alkitab Bahasa Ansus
Lukasi 16
Mampata we menyayang
Yesusi kewio we ne manarua wauya doyo, “Nyontarai we ne ra pau pei, ne mampata pei. Nyontarainei riuwari we deiwai ne pe kong pi we neng wau. Mana na a' pei taroa we mampatanei yemboing ne pe wau. Impaina nyontarai we ne ra paunei yau mampatanei ma kewio wei doyo, ‘Piwe tarawoa we aune moyawa na mariwa we bonapa. Bonyawa we yau tarai parari mariwa we rupa. Na a ninito, au monaing warui neu mariwa we yona rupa'. Impaina mampata we riu pe wadi anetatuata doyo, “Ingkai pitoi yona pa? Neu tuanei doyo, dong nyau emanaing. Etara kakopa, epaya wa, yeiwiewa, emamaya. Oh! Neu manyayang pea to, imbaro na awe dong yau emanaing warui neu mariwanei mamo, nyontarai pea empandu yau na ene manupa ki. Impaina mampatanei yau nyontarai we embenyaki we ne Tuane ema. Kewio we nyontarai we pempong nei doyo, Nemu nyaki pe bototoi we neu tuangnei? Nyontarai nei daoa wei doyo, ‘Maning saituni babeu piaring.’ Interi mampatanei kewio wei doyo, ‘Nemu weraung nyaki dinini. Moyoito mae toi kaparia na yana, piakodu ea ura'. Toyana mampata nei kewio ea wu nyontarai we kodu wadi doyo, ‘Netapa au ne, nemu nyaki bototoi?’ Nyontarai wadi daoa wei doyo, ‘Potang kadu piaring we ura (1.000)'. We riu pe nei kewio wu ria doyo, ‘Toi we piaring we injatoru (800)'.
Impaina tuang nei deparanding ne mampata nei tutu ne anekurayang wau. Wo nyontarai nunei embe kurayang raweina na etong pi eneng wau warui nyontarai endea wauya“.
Interi Yesusi kewio nariaea doyo, “Mentarama! Ra Sen dona we mia na nunei nini, menari na wemai we mempata nyontarai eaya, imbaro parari mene ra nini nyai mamo, metadu nu wemai yuwi na rora-marising. Nyontarai we nyari piwe we maiya na wemai, ingkai esanesari we nyari piwe baba pa na wemai konta. Mana nyontarai nyari piwe mayea na wemoyawa mamo, ingkai esanesari wa we nyari piwe baba pa wa. Impaina parari na piwe mene na nunei, piana metadu aminduya pea wato, matei di doyo dong aminduya we mia na piwe na mamarang waupa? Mae parari nyontarai peaya ne rapa anesara we mia metona na wemai, mana metosaiwara wa. Toyana mamo Allai dong ra mene na rora-marising pawa impaina membengki woroi-woroi wa.
Nyontaraipe koiri meriwa we tuanpe kodu wa, wo nyontarai wadi ingkai aneweng tuang pei mae meidai asaru ei. Toyana parari mia tato, memariwa we Allai kong we pe wa.
Kawio Yesusi sopanapa
(Matius 11:12-13, 5:31-32; Markus 10:11-12)
Nyontarai embe Farisi wauya entarao piwe Yesusi sopana yana kia. Mana emari Yesusi tutu yawo nyontarai endekami baba we pe diya. Mana Yesusi kewio weya doyo, “Miawo nyontarai meserai we nyontarai peaya etaparanding mia, mana Allai rebau mesanerarongpa. Tutu piwe nyontarai meto tadai na nunei, Sen Allai aneunawa kong taubai we mai wa.
Weraung we Musai soi pai kong anyau nabi paya, ne paya enduti ma sisu a Yoanes Pembaptisi pai. Na a yani topong, Arera Mamarang parari pipatotoi Allai riu we mananupa, yati nyontarai ne etintanyaua pampang. Kong nyontarai etamuna kangkuna we esua na Allai ne mananu rarongpa. Mana rora kong nunei wo mawa we nai mae kamang antintui na weraung Musai soipa ea nai wa.
Muang mateidi dedawa wawinia menaing interi riau wawing peiea mamo dong tata mamota. Mae muang we didau kong wawing we awani meidai pai mamo, dong tata mamota tato“.
Nyontarai we ne ra pau kong Lasarusi we kiaripi
Interi Yesusi tato deniau ya na sosiau nini: “Nyontarai we ne ra pau pai anemai mamo yesung asung weuna, mae yerandiki. Anemai mamo merarising na ne ra wau. Mae nyontarai pei we ne pieawa anong pei Lasarusi. A nemai mamo wiata dewiewa na nyontarai we ne ra pau wadi ne aturarei manu wadi repong. Netarai wadi donung na kapapo we remananing wemoyawa. Lasarusi wewi kapara impaina dodampi, mana demangpi roweang kangkenai we nyontarai wadi keiaya wau. Mana piwe meidia naria ea, ne kapapo wau wona endama endare.
Interi nyontarai we kiaripi wadi keda, mampang wauya endama engkori to raora we tadai kikeu Abrami na rora-marising. Nyontarai we ne ra pau wadi tato keda interi esirai. Na maring karuari, nyontarai we ne ra pau nei yeseung yui mambabati kia. Na woroi reo Abrami kong Lasarusi meoi na raora wetadai kiria Abrami. Nyontarai we ne rapau wadi yau we Abrami doyo, ‘Yai Abrame!’ Anemo yau, yau eyui kapara na adianei! Bomi Lasarusi yoang warangpa na mariapai rarong riama dona wawao woreupanei. Wo eyui na adianei rarong paina“.
Mana Abrami kewio wei doyo, ‘Kumaipa aune anemuaoa! Wuengpa piana bodu wewengpato, mae Lasarusiwo dedu we moyawa. Impaina i merarising na nina, mae au wui na yana. Tutu berarong baba pei dawe ama kong au, imbaro nyontarai pa matei ea na nina emberawa na ninipa sisu wani kong nini.’ ‘Nyontarai wene ra pau nei kewio we Yai Abrami doyo, ‘Toyana mamo, Yai, Yau yewara kongtau Yai bomi Lasarusi wu neu yai ne manu paia. Wo netaneu pe embering yati enai yanapa. Bomi Lasarusi yuaya, imbaro endeo entawa wu raora ui nini pe'.
Abrami kewio wei doyo, ‘Piana ene anyau na weraung Musai soi kong nabi entoi pa. Impaina ya etong parari piwe enduru na weraung pa. Mana nyontarai we ne ra pau wadi kewio we Abrami doyo, ‘Yana maiya wa, Yai Abraham. Nyontarai we keda pei wieng taweri interi riawu yara, mamo ya entaweri warui ene sasaripa'. Abrami doyo, ‘Ea endoaoa wa anyau we Musai soi kong we na nabi paya, ya ingkai endoaoawa tato, nyontarai we keda wieng taweriea.’ ”
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.