Alkitab Bahasa Ansus
Lukasi 17
Piwe donane nyontarai etong sasari
(Mat. 18:6-7, 21-22; Mrk. 9:42)
Yesusi kewio we ne manarua wauya doyo, “Pi pau donane nyontarai nea ingkai enari sasari. Mana manaing we weetona nyontarai enari sasari paya! We dong sasari toyana pai, piboki wei mamo engkae kamipei na raukanangpai mae engkai to rawanangrau. Imbaro donane koiri na we etua Yau ya, ei piaya wa esanesa Yau wa pe. Impaina mempapi miaki!
Parari menetapai dong sasari mamo mesuari, mae do anetaweri warui ne sasaripa mamo metupirandenia. Mae parari dong sasari we mia we boitu na a koiri kong anemai ma ria wu miama kewio doyo, ‘Yau yewara metupirandeni yau,’ mamo metupirandeni.”
Parari sisara
Rasuripaya engkawio we Yesusi etoyo, “Sen, bong amasanesarane paya“. Yesusi kewio doyo, “Parari mendoaoapa baba parari sawi kami nei mamo, mengkawio we ainei tepating warui reine mae ria suwa na rawanangdau, mamo ainei ingkai rioao mia“.
Tuani kong woming
“Tuanpe koiri na mia ne womingpei, i deiwai ne pieung tutu ne romipa sisu rawandeng imbaromi teweri to manupa. Pipatotoi ne tuang wadi ingkai nyari roweang wei we dang rai e? Wereria rai! Mana ingkai kewio we ne woming wadi doyo, ‘Moraru wosung asung weweng, interi nuari roweang we yau. Imbaro au tato buampi ea. Woming wadi dong parari piwe ne tuang wadi doyoa wei wau na wemai, mana ne tuang wadi deparandini wa. Wo woming wadi pine riupa toapeina to. Parari mia tato piana metong pitau we etami mia weapa, mamo mentopana metoyo, ‘Ama wo woming di ama paina, amatong parari piwe amatonapa kuira'“.
Nyontaraipe esura, Yesusi dosa empanang
Yesusi kong ne weetuari paya enda wu Yerusalemi na raora we dawe Samaria kong Galilea. Na a we esuana awapei mamo nyontaraipe esura, weesui pado endawu Yesusi ma. Mana etoana woroi. Interi esau Yesusi etoyo, “Yesuse! Tuanie! Anemoao amawo!”
Na awe Yesusi reo ya pa, kewio weya doyo, “Menda metanyau menetaraipa we imami paya. Enda rai mae na rang rabuang ene uipa panang warui ya. Nyontaraipe koiri na ya reoa we penang to, impaina teweri na mararising mae deparanding Sen Allai. Interi nyontarai nei riama suang yomi na Yesusi renawau kong sopang piboki wei, nyontarai nini mamo nyontarai Samaria dina. Impaina Yesusi kewio doyo, “Nyontaraipe esura yati yong sa empanang to? Embe injatangpe yatino? Pitoai donane nyontarai Yaudi wa nini memeari tewerima dong piboki we Allai nina?” Interi Yesusi kewio we nyontarai wadi doyo, “Towato, mae rua. Wo anemusara we Yau, donane wueng.”
Awe Allai riama riu we mananu
(Matiusi 24:23-28, 36-41)
Nyontarai embe Farisi wau ea ya etutang Yesusi we apatotoi Allai riama riu we mananu pa. Yesusi daoa doyo, “Allai do riu we mananu ne kamang pea wa we mendeoapa, Impaina nyontarai ingkai entopana wa etoyo, ‘Mendama mendeo, andi nini!’ Ete, ‘Andi wani!’ Wo Allai piana riu we mananu wau ainai na menerabuampa kuira.”
Interi Yesusi kewio we ne weetuari wauya doyo, “Ingkai rama a we na mia mesane kangkuna metoyo mendeo a koiri na Kumai Nyontarai riama wau mana mia metadutawa.” Ingkai nyontarai peaya engkawio we mia, ‘Mendea I nyai wana!’ Ete, ‘Mendema I nyai nina!’ Mendeo menda ampe. Wo mai parari kewiewari we dea wieria na mandipi na wope koiri wu wope eaya, toyana tato na a we Kumai Nyontarai nei riama wane. Mana pi yanapa tawa tantuma wami mamo, ingkai Kumai Nyontarai deiwau kong nyontarai na a we pui nina ingkai entampiri. Na a we Kumai Nyontarai teweri nai pai, parariapi na a we tawana Noaki a pampongpa. Nyontarai etampi etunung, endau waweri ya, ra sisu awe Noaki yua wu ne ta weria baba mantaung we nyari pai rarong, interi poa baba pai dutu nu wadi mae miung nyontaraipaya kuira. Nina tato parari a na Loti pa. Nyontarai etampi etunung, etawayang kong entantanang mae enari manu. Mana awe Loti meti riawarui Sodomi, na a yanito adia kong kami adia wiana mandipi dosa emanaing kuira. Toyana tato we a yana parariapi na awe Kumai Nyontarai riama wane.
Na a yani nyontarai we enai na manu wawuang paya, endeo embia we engko pi enei we wa na manu rarongpa pe. Kong we enai na romi paya tato endeo entaweri we engko pi enei we wa na manu rarongpa pe. Mesaneao piwe dedu Loti wawinipa! Nyontaraipa matei di yemupa we derara wiengpa, ingkai wieng pa nai warui. Mae nyontaraipa matei di wengpa nai warui ingkai dedu wieng ki woroi-woroi. Impaina etopana we mia: na dirupa nyontarai kodu urena kuira mana koiri engkori mae koiri wiata Nyontarai wawingpe kodu untuta potangpai kuira, koiri engkori mae koiri niai.” [Nyontaraipe kodu tato unai umariwa na romipa, koiri engkori mae koiri niai.”]
Weetuari paya etutang we Yesusi etoyo, “Na nu totoi pei pi nina ingkai denyauwapa? Yesusi doyo, “Na totoi wekadapa embatapa mamo aya wawai pa enai na peina.”
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.