Alkitab Bahasa Ansus
Lukasi 18
Sosiau parari mananu wedong wemaiwa
Yesusi denyau ne weetuari wauya na sosiau nini, imbaro entandau pampang we Sen Allai kong endeo emadope. Kewio doyo, “Na bendari pei mamo nyontarai wekiutu kawio pei, iwo metai Allai kong suang we nyontarai pei ea wa. Interi na bendari wadi mamo wawing kabong pei, andi na a nemai ma ria wu wekiutu kawio wadima mae kewio doyo, ‘Bong wido pineune warui weembemarowa we yaune.’ Manyona katea wekiutu kawio wadi deini. Mana interi kewio na anerarong doyo, Yauwo ematai Allai wa mae etuangbe nyontarai pei eawa. Mana kabong nei ria pampangma reoria yaupa mamo, yong parari ne awapa, ekutu ne kawio pa na wemai imbaro reoria yau naria ea wa.”
Seni kewio doyo, “Mesanena pitoai mananu we meiwa nei sopanapa! I wo nyontarai we kiutu kawio meiwa mana piata kabongpai, mamo Allai ne weweweng wau raweing we kiutu kawio pai. I ingkai piata nyontarai we diri ya pa, we esauwei pampang diru raida. Seni piana ingkai pika a ne warui ya we piata yapa. Mendoaoa! Wo Allai ingkai meraru piata ne nyontarai paya warui ene kawiopa! Mana a we Kumai Nyontarai nei ria wu nunei ma, piana ingkai dedu nyontarai peaya endoaoa we I ete wereria e?”
Sosiau parari nyontarai we riuri pe
Yesusi sopang sosiau nini we nyontarai we endetatua nyontarai peaya we etadu pi katuyanea wa, mae etoyo yati embengpa. Yesus kewio doyo, “Nyontarai umbe kodu undawu Allai ne Manu we untandau. Eiwo nyontarai embe Farisi, eia iwo nyontarai weyau wiwai. Nyontarai embe Farisi pai doa tendau mameari doa woroi warui ea wauya doyo, Sen Allai, yau yeparinding Au tutu yauwo eparari nyontarai tau eaya wa, we eserai we ene ra pa, yongamunawa, yona we ei ne wawing pei wa kong eparari weriuri wiwai nei wa. Yau ewe puasa we kodu na ari mingku pei, kong na pi we yedutapa, yong perpuluampa we Au. Mana we riuri wiwai nei doana woroi, iwo metai kong ne barui pea we reto rora peidi. I dipu arokawei anetaweri mae doyo, ‘Sen Allaie, anemo yau nyontarai we yong sasari ne yau.’
Yesusi doyo, “Anemusara, na awe entaweri to manu wane pa mamo, weriuri pe wadi Allai anewenipa mae nyontarai Parisi wadiwo wereria. Nyontarai pa matei deparanding mantauni ingkai Allai piritoung, mae nyontarai pa matei saubaborai ingkai Allai riuwaria tedai.
Yesusi myuang kumai wauya
(Matiusi 19:13-15; Markusi 10:13-16)
Interi nyontarai we endama paya engko ene kumai mararia paya wu Yesusi, imbaro warawawu ya. Mana ne manarua wauya endeo piwawau paina esua nyontarai wauya. Mana Yesusi yau kumai wauya interi kewio we ne weetuari wauya doyo, “Mempika kumaipa ya endawu yauma! Mae mendeo mesua yape. Tutu nyontarai yasa yati embe kawasa na Allai ne mananu rarongpa. Ekawio kangkuna! Nyontarai mateidi demangwa we Allai ne mananu ne parari nyontarai kumai mararianei pa, i piana yua wa to Sen Allai ne mananu rarompa.”
Nyontarai we nepi pau kong Allai ne mananu wau
(Matiusi 19:16-30; Markusi 10:17-31)
Mananu Yaudi peandina dutang Yesusi doyo, “Kuru wuengpa au, pitoai yona imbaro yedu weweng piboki kio woroi-woroi wane pa?”
Interi Yesusi dutang taweriea doyo, “Pitoai wau yauwe ewengpa? Ei wiengba mantau Allaiki. Piana remuaroang Allai ne anyau wauto, “Remo buena kong wawing pampinoma pe, remo mung nyontarai pe, remo monanapipe, remo weangkakaripe, mae tuang we tamamui kong nyamui.”
Nyontarai wadi kewio doyo, “Arera tau wawau piana yong pararia na ewaworupa ma sisu a nina.”
Yesusi tarao towawau paina doyo, “Pi koiri andi imbere bonie ampa: Bowayang pitau we nemupa, bong pe pa we weengkiaripi paya, imbaro bodu ra wemai na rora-marising. Interi ruama bua yau. Mana na a we nyontarai wadi taraoa kawio we Yesusi sopana toyanapa mamo, anerarong papea tutu i wo ne pi barui paina.
Yesusi reo nyontarai wadi anerarong papea, tutu ne pi barui pa, wo sopang doyo, “Nyontarai ne pi pau pai, mawa wa we yua to Sen ne riu we Mananu rarong pa! Mawa kia we untape koiri yuana wairui ne kambirei, warui nyontarai we nepi barui pei yua to Sen Allai ne riu we Mananu rarongpa“.
Nyontarai we entarao Yesusi kewio towawau ya etutang etoyo, “Toyana mamo mateidi ingkai dedu pariri pa?”
Yesusi doyo, “Pi mawa wa we nyontarai etonapa, we Allai mamo mawa kia.”
Interi Petrusi doyo, “Yai e remuma! Ama piana amanda warui mandarong amane we amatua Au.”
Yesusi doyo, “Mendoaoa! Nyontarai we piana pika ne manupai, ne wawingpai, inyani, ne kumai paya tutu piata Allai, nyontarai yani ingkai Allai dona taweri wei pi pau raweina, na a nina kong na awe rama wane dedu wieng ki woroi-woroi.
Yesusi kewio wetoru parari ne kaida wau
(Matiusi 20:17-19; Markusi 10:32-34)
Yesusi penduikui nyontarai esura ea kodu we etuari wauya emeari, interi kewio doyo, “Mentaraoa! Tata nina tanda wu Yerusalemi. Na wana pitau we nabipaya entoi pararia we Kumai Nyontarai, ingkai tawa paraia. I wo ingkai empikari wu nyontarai we embe Yaudi wa ya, ingkai engkawioi, entatipari, kong engkanyukikai. Ya ingkai etong pampinomi kong emuni, mana a wetorupai ingkai tewa warui kaidapa. Mana weetua Yesusi paya esanekaeng kawio we Yesusi sopana wau. Ya enduinaria we aneaoapa wa. Kawio kapung wau denyuina wea.
Werepipu wadi Yesusi doni penang
(Matiusi 20:29-34; Markusi 10:46-52)
Awe Yesusi ria kikeu we bendari Yeriko pai, werepipu pei meoi dewiewa na rang wadi arawapa. Na yana tarao kawasa we empau wau enda engkawio impaina dutang doyo, “Pieape?”
Nyontarai na yana pei kewio doyo, “Oh! Yesusi nyontarai Nasaretipai piana ria na nina pa.”
Topianapa werepipu wadi yeau doyo, “Yesuse, Dauti ne kumaipa Au, Anemo yau“.
Nyontarai we na pong wauya empapayaoi mae etami aidini. Mana denana kangkuna ea doyo, “Dauti ne Kumaipa Au anemo yau!”
Yesusi doa weta, interi demi nyontarai pa engko werepipu wadi wuria. Ria kikeu Yesusi dutang doyo, “Pitoi anembea yona we au pa?” Werepipu wadi rioa doyo, “Tuane, yau aneuwe erewoa.”
Interi Yesusi doyo, “Toyana mamo remoa! Tutu au roao Yau pa au ponang.
Na a peinato i reoa. Interi dua Yesusi mae deparanding Sen Allai. A we nyontarai tau paya endeoa pi we Yesusi nyari yana pa, eaya kuira etaparanding Sen Allai tato.
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.