Skip to content
BibleKenya

Alkitab Bahasa Ansus

Lukasi 19

Zakeusi kong Yesusi

Yesusi yua na bendari Yerikho, ria rire rang na bendari yani. Na yana nyontaraipei anong pei Zakeusi, iwo mananu weyau wiwai kong ne ra barui. I ane we reo Yesusi, mana nyontarai paya empau mae mantauni wo tedaiwa, impaina dosaera we reo Yesusi mana reoi wa. Impaina depai pampong nyontarai we empau paya, interi wieita na aipei, imbaro reo Yesusi we ingkai riakutua na peina ma. Interi Yesusi ria kikeu ai wadi, reaeio Zakeusi, kewio wei doyo, “Zakeusie! Wia moraru maweu, wo yo erama eyua konta au na nemu manu pai.” Impaina Zakeusi wia warui ai wadi, interi demang we Yesusi na mararising. Kawasa tau we endeo we toyana paya engkawio uara mae etoyo, “Ye! Pitoi dona, ria yua to nyontarai we sasari ne manu pai pa?”

Mana Zakeusi tewara doa kewio we Yesusi doyo, “Yai Sen e! Piwe neu ne, eai ewiwobaua we kodu we engkiari pi paya, mae parari ea yati eweangkari ya na a we rangpa ingkai yona taweri wemanua weya.” Interi Yesusi kewio doyo, “Na a nei au kong mandarong nemu nei, Allai riuwa mia warui ne moyawa pa, tutu autato Abarami tapung diau. Wo Kumai Nyontarai nei, riama we yera kong riuwa nyontarai etong sasaripa warui ene sasaripa.

Sosiau parari woming we embeng kong woming emoyawa

(Mat. 25:14-30)

Na yana nyontarai we empau eto entarao Yesusi kewio wau rai. Tutu I piana kikeu Yerusalemi, impaina nyontarai ne etorato Allai riu we mananu na nunei piana kikeu to. Impaina Yesusi kewio nariaea na sosiau pei. Yesusi kewio doyo, “Nyontarai nyapong peana i riato nu weworoi we enduwari we mananu, interi teweri ea. Donta wami mamo yau ne we empatari pe esura, interi i dong pe mina pa koiri-koiri tate ya. Doyo, ‘Metawayang na pe nina kio etaweri ema.’

Mana kawasa we enai na nu yani esane uniwa. Na a we donta rampai, etanatu nyontarai peaya enda tuwari imbaro entopana we mananu na yana pai etoyo, ‘Ama, amamaidai nyontarai ninipai we mananu we amape.’ Mana nyontarai nyapong wadi enduwari we mananu baba, interi teweri wu nu nempai ema. Demi nyontarai esau ne woming etawayang ne pe pa, ma esarotari tutu pe we dona weya pa, imbaro dutang ya we pe bototoai etadutapa. Woming we pempongma pai doyo, ‘Tuane, pe mina koiri we bonipai yoni wedaya pe minape ura.’ Mananupai kewio wei doyo, ‘Piboki kia, auwo woming we bosaiwa pi di au. Impaina piana muaya na piwe maiyapato, topiyana eruwarau rukui bendari ura ne.’ Woming bokodu wadi ria ema doyo, ‘Tuane, pe mina koiri we bonipai eyoni wedaya boring.’ Mananunei kewio we nyontarai wadi doyo, ‘Auwo rukui bendari boring.’ Interi woming wetorunei riama doyo, ‘Tuane, pe mina koiri pai anini, ekawuni na asung rabuang. Tutu yau wo ematai tuani au, tutu auwo nyontarai we nemu kawio paya. Auwo ko piwe mantau nemuwa peawa kong ruri piwe mantau tuanang peawa. Mananu wadi kewio doyo, ‘Auwo woming we moiwa! Yau ingkai yong mambabati we au parari kawio we topanapa. Auwo piana anemuaoa yau wo nyontarai ekawio paya, yau eko piwe mantau neu peawa kong eruri piwe etanangwa. Toyana mamo na a yani neu pe pa bona wana banki, imbaro na a we etaweri manina eko pe yani kong ne we dawing eampa. Interi mananu wadi kewio we nyontarai we etoa na yanapa doyo, ‘Mengko pe mina koiri yanipai warui mae metoni we nyontarai we ne pe urapai'. Mana nyontarai paya engkawio wei etoyo, ‘Tuane, i piana ne pe ura.’ Mananu wadi kewio doyo, “Etopana we mia joyo, ‘Nyontarai we dosaiwa piwe etona weipa mamo ingkai etona pau raweina ea wei. Mae nyontarai we dosaiwa pi nei we dedutapa wa mamo, piwe wata kontipa ingkai engko warui. Mae na ninato mengko we embe marowa we yau paya ma we eto emaidai ewe mananu pa. Memungsa engkai na reunane!’ ”

Kawasa na Yerusalemi etamang we Yesusi na mararising

(Mat. 21:1-9; Mrk. 11:1-10; Yoh. 12:12-15)

Yesusi kewio sosiau pei weya, interi ria topong to Yerusalemi. I ria pampong na wapong, mae ea paya etuari. Ria kikeu awa Betfage kong Betania na wi Zaituni, demi ne manarua pa kodu unda pampong. Yesusi kewio doyo, “Munda wu awa we na musaropong na wane, munda musua na wana mamo, ingkai mundeo keledai menanang pei wai kei. Keledai yani nyontarai esanai wami. Mungketu waipai mungkorima. Parari nyontarai pei dutang maru doyo, ‘Pitoi dona mungketu keledai yani pa?’ Muntopana muroyo, ‘Seni aneweipa.’ ” Interi nyontarai kodu we demi asaru, uraduta parari pitau we Sen sopana we asarupa. Uro ungketu keledai wadi mamo, we nei wadi kewio we asaru ma doyo, pitoi dona mengketu keledaipai pa? Interi asaru uroyo, “Seni anewei.” Impaina ungko keledaipai wu Yesusia. Interi umporare une asung baba pa urona wana keledai karupuang wadi, mae undupata Yesusi wieita nai. Na yana Yesusi yao keledai pai mae riatuturi, interi nyontarai paya emboi ene asung baba pa na rang rarong pa. Piana ria kikeu we Yerusalemi, na rang we depai toung na wi Zaituni pai, marandang we duaripai emararising mae esomi Sen Allai na endaupui wuwara tutu pitau we donapa rama endeoapa. Interi endoa etoyo, “Amataparanding Au, mananu we rua na Sen anongpa! Madori na rora-marising kong amasomi we Allai au na raora wetadai!” Nyontarai embe Farisi peaya etua we empau pa ya engkawio etoyo, “Kuruie, wua nemu weetua Aupa ya aidisa.” Yesusi kewio weya doyo, “Etopana we mia, nyontarai nea aidisa mamo ingkai kamine etanana.” Interi Yesusi ria kikeu na Yerusalemi, I reo bendari wadi interi yai wei. Yesusi kewio doyo, “Aroo! Piboki keto na a nei mamo au remuaroang we kio we madoripa! Mana ninawo piana we madori anyuing warui auto. Ingkai a wau rama, na yana we embemarowa we au etariwari au ya etong ami wari au. Ya ingkai etong amuna topong na kapungpa kai. Yerusalemi! Ya ingkai etong aua wemunamunai, mae emung kawasa nemu paya kuira, kong empika kami pa koiri entauwi na duenang pai wa. Nina denyauwa tutu au remuaroangna wa, a we Allai riama we periri aupa.

Yesusi yua to Sen ne Manu pai

(Mat. 21:12-13; Mrk. 11:15-18; Yoh. 2:13-16)

Interi Yesusi yua to Allai ne Manu pai mae I dedawa nyontarai we etawayang na manu wararei pai. Yesusi kewio weya doyo, “Na Weraung Mamarang pai entoi tonina, Allai doyo, ‘Neu Manu wadi wo Manu we entandaunai dina. Mana mia metoni we manu mananapi.” Anemai mamo Yesusi denyau na Allai ne Manupai. Na yana we embedung na imami kong kuru akama Yaudi, we embe mananu we Yaudi esanewe emuni. Mana ya etadu rang peawe etimung Yesusi wa, wo nyontarai we empau enai kiriari paya esanewe entarao kawio we sopanapa.

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.