Lukasi 20

We embe mananu we Yaudi paya etutang parari Yesus ne paya pa.

(Matiusi 21:23-27; Markusi 11:27-33)

1Na a pei, Yesusi denyau kong wiuwu Kawio Mararisingpa we kawasa na Allai ne Manupai. Denyau toyana ma we embedung we imami paya, kuru akama Yaudi paya, kong mananu Yaudi paya, enda wu Yesusia 2mae engkawio wei etoyo, “Topana we ama, na matei anongpa nuari pitau ninipa? Matei di dong paya we Aupa?”

3Yesusi daoa weya doyo, “Yau tato yo yutang mia. Mentopana we Yau, 4na awe Yoanesi webaptisi kawasapai, na paya matei? Na paya Allai ete na paya nyontaraipei e?”

5Impaina etutang waweriya wea etoyo, “Tatoyo, ‘Na paya Allai,’ I ingkai doyo, ‘Toyana mamo, pitoai mendoaoawa wei pa?’ 6Mana parari tatoyo, ‘Na paya nyontarai, mamo kawasa tau ingkai eso tata na kami, wo endoaoa we Yoanesi nabi dina.” 7Impaina endeoa we Yesusi etoyo, “Amasaneaoa wa.”

8Interi Yesusi kewio weya doyo, “Toyana mamo Yau tato etopana we miawa, na paya matei enari pitau nini pa.”

Sosiau parari we etong romi angguri

(Matiusi 21:33-46, 22:15-22; Markusi 12:1-17)

9Yesusi sopana we nyontaraipaya sosiau nini, doyo, “Nyontaraipei sanang ne romi angguri pei.

Interi doni wu nyontarai peaya we etawuti kio romi we tarai mamo, ingkai tambiwo bau tarai wau. Impaina donta to raora peaya kong nyaina yana woroi kia. 10Na a we etetang angguri wadipa, tuanio wene romi wadi demi ne mampata pei donta wu we etawu ne romipai ya we kio ne tuani wadi nempa. Mana weetawu romipai ya endora wepatara wadi mae etami teweri na warakakawiri. 11Interi weneromi wadi demi mampatara koiri naria ea, mana endorai konti mae ekangkani kangkuna interi etami teweri na warakakawiri ea. 12Weneromi wadi demi mampata wetoru pai naria ea. Mana mampata yani tato endorai kangkuna kong engkabariri tori warui romi pai. 13Interi weneromi pai doyo, ‘Yong pitotoi naria ea pa? Yemi mantau neu kumai we aneuweni nei. Ingkai esomi wei rai!’ 14Mana weetawu romipai ya, endeo weneromi nei ne kumai pai, impaina entopang waweriya etoyo, ‘Kumai we ingkai dedu tamani pinengpa andi nini, tamunia keda imbaro tatadu pine ne.’ 15Impaina entapuri engkori tori warui romipai mae emunia keda.”

Interi Yesusi dutang doyo, “Impaina, weneromipai teweri ma, ingkai dong pitoi weya pa? 16I ingkai riama miung weetawu romipai paya, mae doni we ea embeiya ea.”

Kawasa na yana pa entarao pi Yesusi sopanapa, impaina entopana we Yesusi etoyo, “Topitotoio wengki!”

17Yesusi reo ya interi doyo, “Toyana mamo, Sen ne Weraung Mamarang ne rirang we riotu tonina pa, parari pitoi?

‘Kami weenari manu paya engkaipiri pai, ria ea we kami retenang to.’ 1

18Kawasa tau we entawa to kamipai ingkai embe munamunai. Kong matei di kamipai sawa miuni pa, i ingkai tepapesing ea we wawu.”

19Kuru akama Yaudi paya kong we embedung we imami paya, endeaoa we sosiau yani riotu weya. Dona mamo eto entapu Yesusi na a' yani pato, mana ematai kawasa tau paya. 20Impaina eserai a' we mai we etintapuri. Embai nyontarai we etosayara parari nyontarai we empiboki, mae etami nyontarai yasa we etutang autang pea we Yesusi. Imbaromi kewio arara mamo etimburi wu Mananu Gubernuri. 21Interi nyontarai embaiti pai kewio we Yesusi doyo, “Yai Kuruie! Amasaneoa we pitau Yai topanapa kong bonyawapa pi wetarai pina. Amasaneoa tato we Yai bonyau na mai parari pi Allai daoa we nyontarai neya pa, wo Au kowio mamo tou nyontarai wa. 22Impaina Yai topana we ama, parari arera na akama tanempai mamo, tambai wiwai2 we Kaisari ete wereria e?”

23Mana Yesusi rebauo ene wasireripa. Aidonapa sopang doyo, 24Metanyauwa we Yau pe mina pei, interi I dutang taweri weya doyo, “Matei enduruwi nini kong anong peo?” Etoyo, “Kaisari dina.”

25Yesusi doyo, “Toyana mamo, metona we Kaisari pi Kaisari nempa, kong we Allai pi Allai nempa.”

26Mae na kawasa renawau etaduara piea wa we etimbu Yesusi. Impaina aidisa mae esarokutuya we Yesusi ne daoa wau.

Nyontarai embe Saduki etutang parari nyontarai esuwi warui kaida wau.

(Matiusi 22:23-33; Markusi 12:18-27)

27Nyontarai embe Saduki peaya, enda wu Yesusi ma. Ea mamo endoaoa we nyontarai engkada paya esuwi wa. Etutang Yesusi etoyo, 28“Yai Kuruie! Musai soi kawio nina we tata doyo, ‘Muangpei didau, mana dawing kumai pei wa mae keda, mamo netapai riau ne kabongpai imbaro dawing kumai pei we neta baba we piana keda pai.3

29Netape embeitu. Neta baba pai riauti, interi keda mana ne kumai pei wa. 30Impaina kabongpai riau neta kodupai ea, mana neta yani tato keda mae ne kumaipei wa. 31Pi towawau dedu neta toru pai ma sisu neta itu pai. 32Interi wawing wadi keda tato. 33Na a we nyontarai engkada esuwi na ene kaida pa, na mambeneta itu paya, matei di ne wawing pai pa? Wo wawing wadi riau neta embeitu ya pa.”

34Yesusi daoa weya doyo, “Nyontarai enai na nunei nini ya endidau, 35mana na awe ramapa toyana wa. Wo nyontarai we Allai anesu yapa, ingkai esuwi kong enai na nu we riama yani pai, ea tato endidau wa. 36Emparari mampang, kong engkada wa. Yatino Allai Antung diya, wo piana esuwi warui ene kaida pa to. 37Parari nyontarai eyuwi warui kaida wau, Musai denyawa na kawio soi parari papea dangpai, i yau Sen pai we Allai Abrahami, Allai Isaki kong Allai Yakupi'.4 38Toyana mamo denyawa we Allai wadi, Allai na nyontarai weengkeda wauya wa, wo Allai we nyontarai we embengpa ya! Wo Abarami itoru itorarang itomayoi na rora-marising pai to. Tutu we Allai, nyontarai nea tantenang embeng.

39Kuru akama Yaudi peaya etoyo, “Yai Kuruie! Kawio topanapa piboki kia.” 40Impaina ene paya peawa we etutang Yesusi naria ea.

Kawio parari Yesusi, Mananu Pariri dina.

(Matiusi 22:41-46; Markusi 12:35-37)

41Yesusi dutang weria weya doyo, “Topitotoi pa nyontarai etoyo Mananu Pariri nei mamo Dauti ne Kumai dina? 42Mana Dauti mantauni sopang na ne Arera Masmuri doyo,

‘Sen Allai kewio we neu Senpai doyo,

Moyoi na warau dowatangne,5

43kio Yong nemu marowa paya

etuang esomi na renawau.”'

44Impaina Dauti yau Mananu Pariri pai we ‘Seni', topitotoi pa etanyauwa we I ria na ne woriai Dauti pa?

Arera we esaneapong we Kuru Akama paya.

(Matiusi 23:5-7; Markusi 12:38-40)

45Kawasa tau entarao Yesusi kewio wau ma, I sopang we ne manarua wauya doyo, 46“Mesaneapong we kuru akama Yaudi paya. Ea mamo esane we esasung asung pampang pa enda na nu we kawasa empau pa, imbaro kawasa esomi weya. Ea kong esane we emayoi na kadera pong pa na manu esomi nai pa kong na manu munara pa. 47Embe angkari kabong paya we engko pi enengpa. Engkawung ene sambamboni pa na entandau woroi kia! Nyontarai entoyasa ingkai etadu we mambabati raweina na Seni warui ea ya.”