Lukasi 21

Pikika na wawing kabong

(Markusi 12:41-44)

1Na Sen ne Manu Mamarangpai, Yesusi reo nyontarai we ene pi wepau paya esoni pikika enempa na kayang pikika pai. 2I tato reo wawing kabong we nepiewa pei yoni pe kobang kodu na kayang pai. 3Interi Yesusi kewio doyo, “Pitarai, ekawio we mia joyo, wawing kabong we ne pieawa nei, we donapa wake pau raweing warui nyontarai tau wasa kuira. 4Tutu ya kuira etong pikika na piene wepaupa, mae wawing kabongnei dona na ne piea wa pa, kong dong piwe nempa kuira.”

Yesusi kewio kamang Sen ne Manu ingkai metota

(Matiusi 24:1-2; Markusi 13:1-2)

5Na yanapa nyontarai pea yati etaparanding Sen ne Manu pai ne wiengpa. Etoyo, Manu Mamarangpai wieng antumba, emarandini na kami we waweria kong pitau we weanong etona we pikika we Allai pa. Mamo Yesusi kewio weya doyo, 6“Na a' wane pitau we mendeoi nini ingkai nyontarai entotaia menaing, mae andi kami koiri wiatiana kamipei wawong nea wa.

Yesusi kewio parari piwe tawa na a we pui wana

(Matiusi 24:3-14; Markusi 13:3-13)

7Interi Yesusi ne weetuari etutani etoyo, “Kuruie! Apa totoikai we toyana ingkai tawa pararia pa? Kong pitoai we kamang parari we toyana tawapa?” 8Yesusi kewio doyo, “Mesaneapong kong metamangki, wo donane ea embeangkari miape. Nyontarai empau endama embo anoune, mae etoyo, ‘Mampariri we metamamanipi di Yau!’ Kong a nei maito.’ Mana mendeo mendoao ya pe. 9Mae mentarao arera parari kawasa emusa kong embemarowa waweria weya mamo mendeo memataipe. Taubai nina andi tawa pampongwo. We toninane mentaraoa mana nunei menaing peina wami.” 10Interi Yesusi kewio naria ea doyo, “Ingkai, mandarong pea engkong mandarong pea ea emung waweria, kong negara pea kong negara pea ea emung waweria. 11Na wana nina ingkai mundi baba weriu, piwawi kong ui miung kawasa tau. Ingkai na rora tawa kamang baba we dong nyontarai ematai kia. 12Mana tau nina tawa pararia wami, ingkai entapu mia kong etamei mia. Mae ingkai etutang aera mia na manu nyontarai Yaudi esomi nai kong etong miato wangka rarong. Nyontarai ingkai engko miato mananu paya kong we endu wang mananu paya, tutu mia metua Yau. 13Wetopiana pa we rang we mia imbaro membuwu Arera we Mai na Allai pa. 14Mengkutu na mesanararong we mesanekaeng wa we pi mentopana we memati warui we etimbu miapa. 15Tutu mantau Yau ingkai yong kurayang we mia we mengkawio, imbaro we embemarowa we mia enebarui pea we etimba kawio we mentopana pa wa. 16Mae ingkai mene paituang paya, menetapaya, mandarong meneng paya kong we mempandu mia paya, embo mia wu nyontarai weembemarowa we mia pa, kong ingkai eaya na mia emung ya. 17Nyontarai ingkai esaneung mia tutu metua Yau paina. 18Mana menduandaungpa koiri na mendukamipa nyai wa. 19Impaina mia mempaya na mendoaoapa na menduenang aiwaraki, mamo ingkai mia membempa.”

Yesusi kewio kamang parari bendari Yerusalemi menaing wau

(Matiusi 24:15-21; Markusi 13:14-19)

20“Na awe mendeo Yerusalemi we pimamuna paya esoriwari, mamo piana mesaneaoa we a wawau kekiu we bendari wadi we munamunai. 21Na a yani, we menai na Yudea membawu to raora wewipa. Mae mia we menai na bendari Yerusalemi andi memati warui bendari yani. Kong mia we menai na bendari ripai, mendeo mesua taweri eampe. 22Tutu a yani pai mamo, a we Allai ingkai dong mambabati wu Yerusalemi pai yana, imbaro taubai we nabi pa entoi na arerapa tarai pararia to. 23Na awe didiwapa tawa tantuma pa, wemoyawa pitarai we wawing we etaiyoa kong we etong u we ene kumai paya! Ya ingkai etaiwau tutu emawa we etapaiwa. Nu nini ingkai dedu aseung we baba, tutu Sen ingkai denyau ne kayoupa we rai wadi. 24Madupei yati ingkai emusa na sondu, mae madupei tato engko ya we endukepasa to raora nyontarai we embe Yaudi wa. Interi kawasa yasa tato we endeweroan Seniwa ya ingkai embido Yerusalemi kio a we Sen derekamana weya wau kai.”

Kamang we Kumai Nyontarai riama wane.

(Matiusi 24:29-31; Markusi 13:24-27)

25Ingkai na wo pai, yembai pai kong na piori pa, tandeo kamangpea nai. Mae kawasa engkai na nunei, ematai kong esaneao we esarota tarowa rawanang we baba uira ingkai rotu parari kaidu. 26Nyontarai ingkai ematai kia tutu esane riru we piwe tawa tantuma na nunei, wo we embe mananu enduwai papusi na rora ingkai we ampamponia. 27Na a yani nyontarai na nunei endeo Kumai Nyontarai ne Yau, erama na mandipi rarong, kong donung na paya mae kong dea mamarang ria wieria. 28Mae na awe pi yana pa do tawa tantuma, mentawa mae mesanerarong maitui, tutu woroiwa mae Allai periri mia!”

29Interi Yesusi kewio na sosiau nini doyo, “Mendeo ai ara nei kong ai totoi eampa. 30Mamo mia mendeoa ai weraungpa tendu mae diana ea yana mamo, mantau mesaneaoa we maring wadi doriama kikeuto. 31Yanapa mamo mia mendeo kamang yana tawa', menduradiduing a we Allai ne mananu na nunei piana kikeuto. 32Piwe etopana nina wepitarai: Nyontarai na awa pui nina ne engkada engkai wami, mae kamang we tonina tawa pampong. 33Rora kong nunei ingkai nai, mana Sen ne anyau ne wata we yuwisopisoane.”

Metamang anemai

34“Metamamang! Mendeo memananai na roi kong memaeru pe, mae mendeo mesaneriru we pi metaduta anemaipa, imbaro na a wane tawa tantuma mamo piana metamang to. 35Wo a wane rama ingkai tantuma miung nyontarai na nunei engkai. 36Impaina metamamang! Mae mentandau anemai imbaro mempaya metamang mae mentapira warui piwe ingkai tawa mamo, miawo memai metoa metamang na Kumai Nyontarai renawau.”

37Yesusi denyau na Allai ne Manu wadi na raida, mae na diru I riato Wi Zaituni mae nyaina yana. 38Na ayarima wau mai, nyontarai enda to Allai ne Manu pai we entarao Yesusi denyau wau.