Lukasi 22

Apa we emung Yesusi

(Matiusi 26:1-5, 14-16; Markusi 14:1-2, 10-11; Yohanesi 11:45-53)

1Anani baba roti weragi wa, weesawi we Paska, dokikeuto. 2We embedung we imami kong kuru akama Yaudi paya esanetatuata eserai rang we emung Yesusi aididina, tutu ematai wawido nyontarai we empau wauya engkayou kong etoamuna.

Yudasi wio Yesusi

(Mat. 26:14-16; Mrk. 14:10-11)

3Interi Nyombatang wadi yepopa Yudasi, we esawi konta na anong Iskarioti, i tato koiri na we esura ea kodu we etua Yesusipaya. 4Tutu Yudasi ria kewio mai kong we embedung we imami kong maninuing na Sen ne Manu, we kewio mai kosa, we pika Yesusi weya. 5Ya emararisingkia mae etarekamana we etong pe wei. 6Yudasi rioa oa kong yerai rang we pika Yesusi weya na aidina, imbaro we empaupa enduinariawa.

Enduasasoni we anani Paska

(Matiusi 26:17-19; Markusi 14:12-16)

7Interi a wau ra mai we a retenang na anani Roti weragi wa, na a we ea engkutu pieung domba Paska. 8Impaina Yesusi demi Petrusi kong Yoanisi asaru doyo, “Munda munari roweang Paska wau manyena we tata.” 9Impaina untopana we Yesusi naria ea uroyo, “Na totoi Yai bomi andu we urong roweang wau manyenapa?” 10Yesusi doyo, “Na awe musua to bendaripai, muang we kio karabasapei we yoni maria nai ingkai muraduti, muruari wu manu we yuanai pai, 11mae muntopana we wene manu wadi muroyo: Kurui dutang we au, ‘Na rerawuanipa totoi Yau kong neu weetua Yau nea ingkai amatang Paska nai pa?’ 12Tuan we ne manu wadi denyau rerawuani na padai1 we menyena tutu piwawinta. Na yana murong roweang Paskapa ra manyena na wana.” 13Topiana Petrus kong Yoanisi unda uraduta parari we Yesusi sopana wau. Interi asaru urong roweang Paska waua manyena.

Kamang anani mamarang na Diru

(Matiusi 26:20-29; Markusi 14:17-25; Yohanesi 13:21-30)

14Ra dedu a yani wo sawa ra berorang to we eto etang roweang Paska pai, Yesusi mioi kong ne nyontarai uraya kodu we etuari paya, na rerawuani perjamuan wadi. 15Interi kewio wu ya doyo, “Eyaseune ramawami mae aneuweakia we yang roweang Paska ne kong mia kuira. 16Tutu mentarama! Yau wo yang roweang Paska ninane wa, kio ra sisu piwe denyauwa parari roweang Paska nini ingkai tawa pararia na a we Allai riama riu we Mananu pa.”

17Interi Yesusi riuwa nyopi esoni angguri pai, mae tendauoa dewa piboki kong Allai, interi doyo, “Mengko nina mae membiwo mai mia. 18Tutu mesaneaoa: Na anei Yau yunung angguri nei wa, kio Allai riuwe mananu ne rama denyauwa na nunei. 19Interi kio roti mae tendauoa dewa piboki we roti wau, interi piobabau roti na warang wau dona dimbiwoya mae doyo, “Neutaraipi nini, andi yoni yimpariri mia. Metong pinina we metingtaroang Nyau.” 20Topiyana tato etampia kai dong nyopi angguri wu weetuari wau ya mae doyo, “Nyopi angguri nini arera Allai we waworu, we kemang kepana na ne ria pai, ai tawowu we mia. 21Mana mendeoa! Nyontarai wio Yau pi meoi dampi kong Yaune. 22Kumai Nyontarai ingkai keda parari Allai kiutu pa, mana moyawa we nyontarai wewiowi pai. 23Interi etutang waweria etoyo, “Matei na ya ingkai dong wetoyana pa.”

Aminduya we matei beba raweina na yapa

24Na weetua Yesusi wauya, mantau etaminduya we matei beba raweingna na yapa. 25Yesusi kewio weya doyo, “Kawasa we endearoang Seni wa ene mananu paya, endu ene kawasapaya na paya. Mae kawasapaya esau ene Mananu paya we empata kawasa. 26Mana mia mamo mentopiyana wa, tutu ei dobeba na mia mamo ria meia ea, kong do dara mia mamo ria wemampata. 27Matei di beba raweina pa, we meoi dampi na meja pai, ete we wesarawiri pai e? Tasaneao wemeoi dampi pai. Mana enai na mene madu nina ne ewemampata. 28Mia wo menai kepang kong Yau na neu weaseungne. 29Topiyana Yau ingkai yong paya nina we mia membe mananu kong Yau, parari Yai piana dona we Yau, paya we erune. 30Topiyana mia tato mengkonta memararising kong Yau, na a we ewe mananu pa. Mae mia ingkai memayoi na pata mananu uraya kodupa, we metindu marandang uraya kodu Israeli paya.

Petrusi ingkai piora Yesusi

(Matiusi 26:31-35; Markusi 14:27-31; Yohanesi 13:37-38)

31Yesusi kewio we Petrusi doyo, Simon, Simoni, taramuma! Nyombatang piana dewarakong Seni we sou mia, parari diri pasibu tarai warui rerawa pai, impaina we wieng pai diri warui we yunawa. 32Mana piana etandau we auto imbaromi anemusarao Yau pampang. Mae Nyombatang wadi sou aupa akai, au toweri roaoa pitarai weapi Yau, imbaro puami nemetai ya we esanesarapa.” 33Petrus kewio doyo, “Sen Au, yau emanyena we erakontau pampang, eyua bui ete emung nyau kontauo yuarau.” 34Mana Yesusi kewio we Petrusi doyo, “Petruse, ekawio weau, pitarai topino, ayarima ketua we mangkuei etona wami, piana pora Yau we botoruto.”

Biningkeni, kaketa ete sondu

35Impaina Yesusi kewio we ne nyontarai uraya kodu paya doyo, “Mesaneaoa, na a we yemi mia membuwu kawio wewengpa, mengko biningkeni wa, kaketa wa, ete sapatu wa, na yanapa metadu we aseung pea wa e?” Mana engkawio etoyo, “Wereria.” 36Interi Yesusi kewio weya naria ea doyo, “Mana na a nini, na mia matei ne biningkeni pei ete kaketa mamo mengko. Kong mate au nemu sondupei wa mamo, membo mene asungpa ea we membori sondupei. 37Wo mendoaoaki, waya na Weraung Mamarang nini riotu topinina, ‘I esaneatori we nyontarai wememuna dina.’ Kawio parari Yau nina, ingkai wetarai pararia ki. Wo pipatotoi entoi kamana na Weraung Mamarangpai, yeduta na a ninato.” 38Interi ya engkawio etoyo, “Sen, sondu pe kodu ainina.” I kewio doyo, “Mainato!”

Yesusi tendau na wi Zaituni

(Matiusi 26:36-46; Markusi 14:32-42)

39Interi parari siripa, Yesusi kong ne manarua paya empika Yerusalemi mae endato wi Zaituni. 40Enda sisu raora yani, I kewio weya doyo, “Mentandau imbaro mia kuira metong sasari pa na awe nyombatang wadi aneangkari miapa.” 41Interi Yesusi ria woroi katea warui ne weetuari wauya, waketo sara woroipa piareia ura. Na yana suang tendau doyo, 42“Yai au muaya mamo, ko mambabati nini pa warui Yau; mae parari we aneuaoane wa, mana parari Yai anemuaoa pa.” 43Interi mampang koiri riawuri ma, dong paya wei. 44Yesusi ruradiduing didiwa we mambabati na anerarong pa, impaina tendau pitarai. Awiang wau parari ria we yero tekakutu to kakopa wadi. 45Yesusi tendaua kai interi teweri wu ne manarua paya. I ria taweri mamo dedu ya embaetena tutu etaidu paina. 46Interi Yesusi kewio we ya doyo, “Pitoi dona metenapa? Mentawa kong mentandau imbaro mendeo metadu auwape.”

Entapu Yesusi

(Matiusi 26:47-56; Markusi 14:43-50; Yohanesi 18:1-11)

47Yesusi kewio rai mamo, nyontarai we empau paya endama. Yudasi di wedung naya endama ne. Yudasi tato kiong nyontarai etua Yesusi paya. Yudasi ria kikeu Yesusi, interi wopeoi. 48Mana Yesusi kewio wei doyo, “Yudase, impaina wompemo yau nina mamo wo Kumai Nyontarai ne Yau e?” 49Interi weetua Yesusi weenai na yanapa endeo piwe ingkai tawa tantuma, ya engkawio etoyo, “Sen, amatamang we amatoamuna na sondu!” 50Interi nyontaraipe koiri naya yuara doamuna, sekutu Imami Baba pai ne woming pai tarakambirei paia tekutu. 51Mana Yesusi kewio doyo, “Wento!” Interi I dekara samu nyontarai wadi tarakambirei wadi mae doni penang. 52Interi Yesusi kewio we weembedung na Imami wauya, we embe maninuing na Allai ne Manu, kong nyontarai mananu Yaudi, we endama we entapuri wau ya doyo, “Metorato Yauwo nyontarai we emoyawa e? Impaina mendama mengko sondu kong aisoi nina e? 53Anemai mamo enai kong mia na Allai ne Manu, mana mentapu Yauwa. Mana a menempeinato, kong a berorang we Nyombatang denyau paya nempa peina to.”

Petrusi piora Yesusi

(Matiusi 26:57-58, 69-75; Markusi 14:53-54, 66-72; Yohanesi 18:12-18, 25-27)

54Interi ya entapu Yesusi, engkori to manu Imami Baba pai. Mae Petrusi duaya na woroi. 55Na manu wararei piana enduri adia pei mae Petrusi ria meoi kosa, kong nyontarai we emayoi wari adia paya. 56Nyontarai woming wawingpei perama Petrusi meoi kikeu adia wadi, impaina kewio doyo, “Nyontarai ninipai tato dua Yesusi.” 57Mana Petrusi piora Yesusi doyo, “Yau ereuaroang nyontarai yani kateawa!” 58Woroi wami, nyontarai pei wieiya reo Petrusi interi kewio doyo, “Au tato bua nyontarai wani.” Mana Petrusi doyo, “Wereria, yau wa!” 59Wake saraka riora we koiri naria ea mae, nyontarai pei weiya ea kewio kangkuna, “Tarai, nyontarai nini tato dua Yesusi, wo i mamo nyontarai Galilea dina.” 60Mana Petrusi doyo, “Tamane, yau wo aneukaeng piwe tamani topanapa.” Ayanito, na kewio rai mamo, mangkuei dona. 61Interi Yesusi dedai weria reo Petrusi. Mamo Petrusi aneao Sen kawio we piana sopana weipa, “Mangkuei dona na anei, au piana pora yau we botoru.” 62Interi Petrusi meti warui yana mae yaia miungbaweri.

Nyontarai etamei Yesusi

(Matiusi 26:63-68; Markusi 14:60-65)

63Interi nyontarai we endukepang Yesusi, entatipari kong endorai. 64Ya engkawung rekamiwau na asung mae etutang nindiwani etoyo, “Auwo nabi tarai Diau mamo, topang kamang we riora Aupai.” 65Entopang kawio madupei nariaea we etintatipari.

Yesusi engkori to Mananu Akama nyontarai Yaudi

(Matiusi 27:1; Markusi 15:1; Yohanesi 18:19-24)

66Na ayarima yani we embe mananu we Yaudi, we embedung we Imami pa ya, kong kuru akama Yaudi empandura, interi engko Yesusi to Mananu Akamapa ya. 67Interi ya engkawio etoyo, “Topana we ama: Impaina taraie au wo Mananu Weperiri di au e?” Interi Yesusi doyo, “Impaina Yo etopana we Yauwo Mananu Weperiri, mamo mia mendoaoa wa. 68Mae parari yo yutang mia, mamo ingkai metaoa wa. 69Na aneito Kumai Nyontarai ingkai meoina Allai we piaya waradowatang2.” 70Ya engkai engkawio etoyo, “Toyana mamo, Allai Antung diau e?” Yesusi daoa doyo, “Parari we mentopanapa.” 71Interi ya etoyo, “Tandeo taserai nyontarai pei we sopana eampe! Piana tantaraoa na mantauni to!”