Alkitab Bahasa Ansus
Lukasi 23
Yesusi na Pilatusi renawau
(Matiusi 27:1-2, 11-14; Markusi 15:1-5; Yohanesi 18:28-38)
Interi mayoi akama wauya entawa etoa kuira mae engko Yesusi wu Pilatusi1 renawau. Na yana emburi etoyo, “Nyontarai nini amataduti kewio ayara, weangkari kawasa kong yua rai amaneng wau ya we embai wiwai wa we kaisari, kong doyo iwo Kristusi, Mananu Baba dina.”
Interi Pilatusi dutang wu Yesusi doyo, “Auwo we mananu we nyontarai Yaudi wauya pane?” Yesusi kewio doyo, “Mantau au topanapa.” Pilatusi kewio we embedung we imami kong nyontarai we empau paya doyo, “Yau yedu dosara pi koiri wa, we nyontarai nini weembe wangkaipe. Mana ya etairora Pilatusi mae etoyo, “I kewioaya nyontarai paya engkai na raora Yudea tantenang we etoamuna we parenta Roma. Ne anyaupa dona retenang na Galilea kong piana ra sisu nina. Mana Pilatusi taraoa entopana toyana pa, interi dutang doyo, Impaina nyontarai ninipai nyontarai Galilea dina e?” Na awe Pilatusi rearoangna we Yesusi ria na raora Herodesi we mananu nayapa. Impaina Pilatusi denatu Yesusi wu Herodesia, Na a yani Herodesi nyaina Yerusalemi. Herodesi merarising tutu reo Yesusi, tutu piana manyona pei taroi kong anewe reoi. I anewea kangkuna we reo Yesusi dong piwe tawa tantuma wau. Herodesi dutani na autang taubaipa, mana Yesusi we raupui katea wa. Interi we embedung we imami kong kuru akama Yaudi esarota Herodesi tato na yana, mae etimbu Yesusi kangkuna we dosarapi. Herodesi kong ne pimamuna pa ya etameiri kong entatipa Yesusi, interi etoni yesung asung we mananu baba, mae etoni tawerito Pilatusi. Na awe rangpa Herodesi kong Pilatusi umbe marowa waweria, mana ayani untaweria undu umbarami umbe koiri.
Pilatusi pika Yesusi imbaro embe wangkai we keda
(Matiusi 27:15-26; Markusi 15:6-15; Yohanesi 18:38-19:16)
Interi Pilatusi riurikui we embedung we imami pa ya, kong weendu wang mananu, kong kawasa paya, interi kewio we ya doyo, “Mia mengko nyontarai nini pai we yau kong metoyo I denyau nyontarai etong amuna we parenta Roma pai. Na mendenane piana yiri, mana yauwo yedu dosara pianea wa parari we metimburipa. Mae Herodes we anetatuata toyana tato, wo i piana woretuwa Yesusi teweri we ama. Nyontarai ninipai dosara pi koiri wawiria we wangka riuti we kedapewa. Toyana yau ingkai erarubati interi epikari.” [Na anani Paskapei mamo, Pilatusi imbe pika nyontarai we embe wangkai pei we kawasa paya.] Nyontarai tau we empanduya na yana paya etanana etoyo, “Memuni! Mempika Barabasi we ama!” Barabasi aitamu riuti tutu pera nyontarai we etoamuna we parenta Roma pai kong miungbemuna.
Pilatusi do anewe pika Yesusi, impaina kewio naria ea we nyontarai we empaupa ya. Mana nyontarai we empaupa ya etanana etoyo, “Yeroi na aitabapai! Yeroi na aitabapai“
Interi we botoru pai Pilatusi kewio weya doyo, “Toyana mamo pitoai dosararapa? Yauwo yeduti we dosara pi koiri naiwa imbaro wangka riuti we keda! Impaina yauwo ingkai erarubati mae epikaria.”
Mana ya etanana kangkuna imbaro etong Yesusi yeroi na aitabapai. Mae toyana etananapa piana taoato. Impaina Pilatusi kiutu we Yesusi wangka riuti ki keda parari nyontarai pa eneawapa. Interi empika nyontarai we nyaina wangka rarong wadi wedoamuna tutu miung bemuna. Mae Yesusi empikari weya etoni topitotoi parari we esaneaoa pa.
Yesusi yeroina aitaba
(Matiusi 27:33-44; Markusi 15:22-32; Yohanesi 19:17-24)
Toyana pimamuna Roma paya engko Yesusia. Interi na rang rabuang pa etadu nyontarai we ano Simoni, riana raora Kirine, we yuato bendari wadi. Pimamuna wau endu kepang Simoni, mae etairorai yedo aitaba, riana Yesusi karupui pa.
Kawasa we empau etua Yesusi na karupui, kong na kawasa yani, wawing pea enda konta. Wawing yana paya esai esaneao Yesusi tutu ne ui deduta wau. Mana Yesusi reweria weya mae doyo, “Wawing Yerusalemipa mia! Mendeo mesai yaupe. Mae mesai waweri mia kong mene kumai paya. Wo a wane ingkai rama nyontarai engkawio etoyo, ‘Piboki we wawing we anekarawai we etaiwawingwa, ete we weetong u we ene kumaipa wa.’ Na a yanito nyontarai ingkai engkawio we wipa etoyo, ‘Tuawa mung ama!’ Mae we wi rewowai, ‘Tuawa wawawu ama!’ Toyana Yau eparari ai we doa mekae, nyontaraipa piana etona toapeina, mamo ingkai pitoai etona we nyontarai we embe sasari emparari ai wememanei pa?”
Mae nyontaraipe kodu tato umamuna, ya empapa asarua we wangka riu asaru we ungkada kong Yesusi. Interi enda sisu nu we esawi ano “Wekadadung neina“ mae ya empaku Yesusi kong nyontarai kodu we umamuna, asaruei yeroi na wara dowatang mae asaruei yeroi na wara dowiri pai.
Interi Yesusi tendau doyo, “Yai bupirandeni ene sasaripa! Tutu ya enduinari piwe etonapa wa.” Mae embiwo Yesusi ne asungpa mai ya, impaina empiwa we matei dedutapa. Nyontarai pa etoa mae esayo, na yana Mananu Baba Yaudi entatipa Yesusi mae etoyo, “I piana periri nyontarai peayato. Toyana mamo mantauni periri wawerito, tutu I wo Mananu weperiri dina, nyontarai we Allai diri.”
Nyontarai pimamuna wauya tato etongtatipa Yesusi. Ya endama etong angguri weya' wadi wei, interi etoyo, “Auwo Mananu Baba we nyontarai Yaudi diau mamo, poriri mantau Au!” Na aitaba we Yesusi yeroinai wawong yei wadi entoi topinina, “Nyontarai ninipai Yaudi ene Mananu Baba pina.”
Nyontarai we umamuna usaroi na aitaba pa, asaru ei tetipa Yesusi. I kewio doyo, “Au we Mananu poriripi di aue? Toyana mamo, Poriri mantaung au kong andu!”
Mana we memuna ei wadi yua asaru ei pai doyo, “Auwo motai Allai wae? Au bodu wangka we koda parari I. Taru wo turadu wangka tutu piwe turonapa. Mana I wo dong sasari kateawa!” Interi i kewio doyo, “Yesuse! Anemuao yau, na a we ruama we Mananu Baba wane!” Yesusi kewio wei doyo, “Roaoa! Na aneito piana au nuai kong Yau na rora-marising2.”
Yesusi keda
(Matiusi 27:45-46; Markusi 15:33-41; Yohanesi 19:28-30)
Wa' awau ra kikeuwe saraka riora uraya kodu, wo wadi deawa, mae raora wadi berorang tentenang sisu rawandeng, saraka riora botoru. Irei we yeroi na Manu Mamarang wadi, teabu we kodu. Interi Yesusi denanaera doyo “Yai! Towaramu rarong pa neu tarai nei kiai yoni tentenang weau!” I kewioa kai na yana, ne asengpa takutu na peinato. Na awe yewoi we pimamuna wadi reo pitoai tawa tantuma, I deparanding Allai. Interi i kewio doyo, “Tarai, I dong sasaripea wa!” Nyontarai we empau endamapa ya tato esayori, endeo piwe tawa tantumapa. Ya kuira entaweri esarokutuya na esanerarong. Nyontarai tau endearoang Yesusi pa ya, kong wawing etuari na Galilea pa ya, etoa na woroi mae endeo pitaubai we tawa na Yesusi pa.
Etaisata Yesusi
(Matiusi 27:57-61; Markusi 15:42-47; Yohanesi 19:38-42)
Nyontarai pei anong pei Yusupi, i riana bendari Arimatea na raora Yudea. I nyontarai we mei, nyontarai endoaoi, kong demangpi awe Allai riama riu we Mananu pa. I tato Mananu Akama Yaudi, mae i rioaoawa we kawio engkutu kamana we Yesusi pa. Yusupi ria arota Pilatusi mae dewara imbaro engko Yesusi we etaisatai. Interi i pi Yesusi warui aitabapai, mae yesani na irei we remimoma mae ne awayang baba. Impaina i kioria doni wiata na kambirei we nyontarai piana esiraia na wi we kamipa. Kambirei yani esoni wekadapei nai wami. Ayani a Jumati dina, piana do rawandeng we a Sabati3 piana kikeuto.
Mae wawing we enda kong Yesusi na Galilea paya, etua Yusupi mae endeo etaisatai wau. Ya endeo topino Yesusi etoni wiata na kambirei rarong paipa. Interi ya entaweri etong kui maning weairowu we etisepu Yesusi.
Na a yani awe Yaudi endupiwa nai, ya emanaing warui mariwa we etonapa etong parari mamba akama pai.
Source notes (3)
- Footnote Pilatusi mamo Parenta Roma enduwari we Kubernuri na raora Yudea na puda 26-36 M.
- Footnote Firdausi andi tasawi we rora-marising. Yani mamo Raora we kawasa we endoao Allai yati engkada mamo enainapeina.
- Footnote Sabati, “Awe nyontarai Yaudi endupiwanai wa. A nini mamo na nini tasauwi we a Sabtu.”
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.