Lukasi 24

Yesusi tewa warui kaidapa

(Matiusi 28:1-10; Markusi 16:1-8; Yohanesi 20:1-10)

1Na arimingku ayarima kakepang, wawing wauya endato aisata pa, engko pi weairowu we piana etona manyena. 2Na aisatapa, ya etadutapi kami aturarei piana keidui torito.

3Interi wawing wauya esua to aisata rarong apui, mana etadu Yesusi netarai wadi na yana wa. 4Na yana etoa mae embekaeng esanetatua piwawau, na tantuma nyontarai pe kodu usasung asung wewaweria uroa kikeu ya. 5Wawing wau ematai kangkuna kia, impaina entuang esomia sisu kakopa wadi, interi nyontarai wau asaru ungkawio wu wawing wauya uroyo, “Pitoi dona meserai nyontarai we wieng nei na weengkada wau ene madukuira pa? 6I wo nyaina ninane wa, I wo piana tewato. Mesaneao pitoi piana sopana we mia na awe nyaina Galilea pa. 7Sopana topino, “Kumai Nyontarai imbere etoni wu nyontarai embe sasari pa ya. Interi emuni na aitabapai mae na awe botoru I wo ingkai tewa na kaidapa.” 8Topiana wawing wau ya esaneao Yesusi ne kawio pa. 9Interi entaweri na aisata wau, embuwu tau wawau we ne rasuri uraya koiri wau ya kong taubai we etuari ea wauya. 10Wawing we entopang tau wawau wu weetua Yesusi mamo: Mariai, weriana bendari Magdala pai, Yoanai kong Yakobusi nyani Mariai kong wawing peaya weengkongsa pa ya. 11Mana rasuri wauya etorato wawing wau ya embuwu kawio tarai wa, impaina endoaoa wa. 12Mana Petrusi tewa mae depai to aisata wau. Tentuang mae reto kambirei aisata rarong. Mana reao asung webua etisasani wau. Petrusi arokutuya kia impaina teweri anengdutangbaweri tutu piwe to wawau.

Yesusi denyauwi na rang we na Emausi

(Mrk. 16:12-13)

13A' yani tato, nyontarai kodu na we etua Yesusi, undato awa wena Emausi. We tantuata mamo wake kilo pe uraya koiri woroi warui Yerusalemi. 14Na rang rarongpa unda mae ungkawio parari Yesusi ne kaidapa, kong pitau wawau we tawapa. 15Na ungkawio urutangbaweri asaru, Yesusi riatantuma ma ria kong asaru. 16Undeo Yesusi, mana pieai dona undeweroani wa. 17Interi Yesusi kewio doyo, “Pitoi andi munda mungkawiori na randarong neipa. Uroa weta mae unde asasona. 18Interi asaru we anong Keriopasi dutang wu Yesusi doyo, “Wawo Yai momeari rua waworu to Yerusalemima e? Wo ruinari piwe tupa na anisaru ne?” 19Interi Yesusi dutang doyo, “Wawo pitoina?” Uroyo, “Piwe dedu Yesusi nyontarai Nasareti pai. I wo nabi dina. Piwe sopana wau kong piwe dona wau barui kia, na Allai rena wau kong na kawasa we pau endenawau. 20We embedung we imami kong mananu tanene empikari wu parenta Romapai, we embe wangkai na aitabapai ya keda. 21Impaina I mamo na awe rampa amasanesari we ingkai andi periri Israeli ne tata warui tane marowa pa ya, mana toyana wa, a nini a we botoru na pitau we radea pa. 22Naria ea, wawing peaya na ama etonane amantantuma. Ayarima kakepang enda to aisata wau. 23Mana etadu wekada wadi na wana wa. Impaina entaweri kong entopana topino amandeo mampang pe kodu ungkawio uroyo Yesusi yuwi eampa. 24Eaya na ama interi endawu aisata wau mana etaduta parari piwe wawing bau entopana pa toapeina, mae yawo endeo Yesusi wa. 25Interi Yesusi kewio we asaru, “Maruwo muntata! Musaneaponawa we mundoao pitau we piana Allai demi nabipa ya entopana pa. 26Topino Mananu we Periri imbere dedu we moyawa pampong. Impino dedu ne dea marising wanepe. 27Interi Yesusi sopang aiwara we asaru pitoi entoi na Weraung Mamarang wadi tantenang we I pa. Retenang na weraung we Musai soi pai ra sisu weraung we Allai demi nabi wau ya entoipa.

28Topiana engkikeu we awa endawuri wadi to. Yesusi domparari we doyo ria topong. 29Mana usua weti uroyo, “Nuaiko andu na nina piana do diru to, kong do berorang pa mamo.” Interi Yesusi yua kong asaru to une manupai rarong. 30Na itoroyo itomayoi itorampi kuira pa, Yesusi kio roti wau tendau oa wu Allai, piobabau roti wau na warang wau interi dona we asaru. 31Interi usaneaiwa asaru topino Yesusi ina. Mana I nyai warui asaru na undena wau. 32Ungkawio waweria we asaru, Aoa tusanerarong ayaa na kewio kong taru na rang rabuang kong kewio anyau Weraung Mamarang wadi we taru pa. 33Na yanato untawa mae untaweri to Yerusalemi. Na wana asaru uradu we esuraya koiri weetua Yesusi enda empadura kong eaya. 34Ya etoyo, “Katu tarai Sen piana wieng taweri! I piana denyau netarai pai we Simoni!” 35Kodu we urua Yesusi we undama wau asaru, urontopana parari weuraduta tato na rangdarongpa, kong undeweroang Seni na I piobabau roti pa.

Yesusi denyau netarai pai we ne weetuari paya engkai

(Yohanesi 20:19-23)

36Emayoi engkawio piwe tawa wau, Yesusi doa tantuma na ene rabuang mae doyo, “Piboki mararising we mia.” 37Ya entantuma kong ematai, tutu etorato endeo wekada duainunung. 38Mana Yesusi doyo, “Pitoi dona memataipa? Pitoi dona mesanerirupa? 39Mendema waraune kong aeune. Mesaneao we mantau yauna, metakama kong mesairi tutu wekada duainunung wadi we netarai wa, we neina wa, parari we mendeoa na Yaune.

40Yesusi kewio towawau mae denyau warang kong aeangwau. 41Mana na yana endoaoa wami, tutu emarising kong etariaera, Yesusi dutang ya doyo, “Mene roweang pea e?”. 42Ya etona wu Yesusia diang we esora wope pea. 43Yesusi dekara kio diang wau, interi dangna endena wau. 44Impaina kewio wu yara doyo, “Pi ninane aino piana eweroana we mia na awe tanpandura pa. Tutu pitoiai entoi pararia we Yau na weraung we Musai soi pa, nabi pa entoipa kong na Weraung Masmuri wo piana tawa to.” 45Interi Yesusi yepa we esane tatuata wau imbaro esane babau Weraung Mamarang wadi. 46Yesusi kewio weya doyo, “Na Weraung Mamarang wadi soi topino, Mananu Baba we periri pai, imbere yeseung kong tewa warui kaida wadi na awe botoru pai. 47Kong na Mananu Periri nei Yau Anoune, membuwua we kawasa tau na nunei, we entaweri warui ene sasaripa. Mae we Allai dupirandeni sasari pa to. Mae arera yana, membuwua retenangra na pei Yerusalemi. 48Miati menda membuwua parari pitoai mendeoa na mendekamipa. 49Ingkai mantau Yau yenatua we mia pitoai Yai dererapa. Mana mia menai metamang na bendari nini kio paya we rana Allaipa domu mia.”

Yesusi wieita to rora-marising

(Markusi. 16:19-20; Kis. 1:9-11)

50Kai na yana pei Yesusi kio ya toriwarui bendari yani wu Betania. Na yana I riuwa warang wau mae myuang ya. 51Kaiki dong muangpa weya, I piowari wieita to rora-marising interi teriai warui ya. 52Ya entuang esomi Yesusi interi entaweri to Yerusalemi na esanerarong we mararising kia. 53Kong etaparanding Allai pampang na Ne Manu pai.