Alkitab Bahasa Ansus
Pi Rasuri Enari 1
Sen derekamana we dong Duainunung Mamarang pai
Teopilusi au we moi, na neu weraung retenangpai entoi parari pitau we Yesusi nyari kong denyauwa pa,1 na Yesusi riuwa ne mariwa pa, ma sisu a we weita to rora-marising pa. Wieita to rora-marising wami mamo, Yesusi dong arerapa we ne rasuri paya na Duainunung Mamarang pai ne mambiri pa. Piana Yesusi keda pa kong wieng taweriea, na ape piakodu mamo denyawi ne taraipai we rasuri paya pampang we kamang topino I wo keda mana taraie tewa, mamo kewio koya parariapi Allai ne riu we Mananu pa. Na apeana Yesusi penduikui ya, mae demi ya doyo, “Mendawarui Yerusalemi wa mae metamang na yana kio Yai dona we mia piwe derekamanapa. Kamang yanapa etopana we mia na pampong pato.2 Tutu na pampong pa Yoanisi webaptisi mia na maria mae ape bototoi ea mamo Allai ingkai webaptisi mia na Duainunung Mamarang pai.”3
Yesusi wieita to rora-marising
Na a we rasuri paya empandura kong Yesusi pa, etong autang wei etoyo, “Seni au, topitotoi pa na a nini pai Au boyo nuari parenta Israeli nei ea ne?”4 Yesusi rioa wea doyo, “Piana pa menduinaria wa, wo Yai mantauni di kiutu pa, parari ne mambiri pa. Mana miawo ingkai metadu mambiri pa, na awe Duainunung Mamarang pai yumao mia pa, mae mia wo ingkai membesaksi membuwu Yau na Yerusalemi kong Yudea kong Samaria ra sisu nu wope wanei tantenang.”5
Yesusi kewio ra kaipa I wieita to rora-marising na endenapa mamo mandipipai widori.6 Awe Yesusi wieita pa ne rasuri paya etoa endetatuwari, mamo na tantuma mampang pe kodu usasung asung webua uroa rurang ya. Interi mampang ne asaru ungkawio uroyo, “E! Nyontarai Galilea pa mia, pitoi dona metoa mendeto rora pei ampa e? Yesusi nini we wieita to rora-marising pai, ingkai teweri eama na mandipi parariapino mendetuwari wieita nina.”
Rasuri etamamang Sen Duainunung Mamarang
Interi rasuri paya entaweri na wi Saituni to Yerusalemi, nu yani mamo woroi kiro koiri warui Yerusalemi. Na Yerusalemi endawu manu we piana enainai pai. Interi embeita to mandarong na yei pei. Rasuri paya esanomi peino Petrusi kong Yoanisi, Yakobusi kong Andareasi, Pilipusi kong Tomasi, Bartolomiusi kong Matiusi, Yakobusi, Alpiusi ne kumai dina, Simoni na pandura Seloti 7 kong Yudasi, Yakobusi ne kumai dina.8 Mae ya engkai esanerarong koiri we empandura entandau kuira. Ya entandau kong wawing we na pampong etua Yesusi pa mae Yesusi nyani Mariai, kong Yesusi neta paya.
Nyontarai we riwang Yudasi
Na apei ea, ya empandura kuira, wake empiaring ea piarei, interi Petrusi tewa doa kewio doyo, “Neta neupa mia, piwe entoi kamana na Weraung Mamarang nei piana parariato, na pampongpa Duainunung Mamarang pai yumao Dauti impaina kewio kakera parari Yudasi. Yudasi nini di kio rai pai we entapu Yesusi. Na pampongpa mamo Yudasi nini wo koiri na tane pandura nei. I wo piana Yesusi diri kyong tata we meriwa mae piata Yesusi.” Yudasi piana wiori kakopa pea na pe moyawapa na wio Yesusi pa. Na awe nyaina kakopa yani mamo keda tebari, anengpai teabu anewaipai mentantaing kiai tori. Nyontarai tau we enaina Yerusalemi pa engkai esaneao piyana pa, impaina esau nu yani na kawio enempa we “Hakal-Dama”, aino Kakopa Weria.9
Wo na weraung mamarang Masmuri Dauti soi topinina:
topitotoio nu nyainai pai empikari menanopi ki
mae nyontarai pei nyai na wa,
eaino entoi topinina tato,
topitotoio pata nempa pikara nyontarai pea etawaraki.10
Impaina Petrusi kewio doyo, “Nyontarai pei tato dua tata konta ea i we saksi parari Sen Yesusi wieng taweri warui kaida pa. Nyontarai yani paiwo piana kyong tata na tatua Sen Yesusi, na awe Yoanisi webaptisi pai sisu awe Yesusi wieita to rora-marising,11 Impaina nyontarai we empadukui ya mane esoretuwa nyontarai pe kodu, Yusupi nini endearoni na anong pe kodu Barsabasi, esawi konta we Yustusi kong Matiasi.” Interi ya entandau etoyo, “Sen, Au rembau nyontarai nea esanerarong pa, Yudasi piana sawa na pata we rasuri pa kong piana kedato. Impaina bonyawa we ama, matei na nyontarai kodu ne asaru, we Seni biri we riwang Yudasi we mampata kong amapa.” Impaina nyosanong kodu yana ya empiwa oa, wa yopi Matiasi, toyana enduwari we rasuri we duara kong rasuri uraya koiri paya.
Source notes (11)
- Cross-reference Luk. 1:1-4
- Cross-reference Luk. 24:49
- Cross-reference Mat. 3:11; Mrk. 1:8; Luk. 3:16; Yoh. 1:33
- Footnote Nyontarai Israeli paya endoaoa we Kristusi memeari we Mananu we ya, parari na pampompa Mananu Dauti riu we mananu pa
- Cross-reference Mat. 28:19; Mrk. 16:15; Luk. 24:47-48
- Cross-reference Mrk. 16:19; Luk. 24:50-51
- Footnote Seroti mamo pandura pei na nyontarai Israeli paya anong pi na.
- Cross-reference Mat. 10:2-4; Mrk. 3:16-19; Luk. 6:14-16
- Cross-reference Mat. 27:3-8
- Cross-reference Mzm. 69:26, 109:8
- Cross-reference Mat. 3:16; Mrk. 1:9, 16:19; Luk. 3:21, 24:51
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.