Pi Rasuri Enari 2

Allai Duainunung riama

1Na a Pentakosta1 pai wo rasuri kong, nyontarai we endoao Yesusi paya empandura na nu pe koiri.2 2Na tantuma entarao piwe riotu na rora pai parari wanang we wia era, we riotu wadi domuo yana manu we empadui ya nai wadi. 3Interi ya endeo piwe dea parariapi adia we tebaboa kong sa na ya koiri-koiri. 4Impaina ya engkai Duainunung Mamarang pai yumao ya, impaina dong ya engkawio na kawio tau pea weiya, parari Duainunung Mamarang pai dona engkawiora pa.

5Na a yani tato nyontarai emamarang na kawasa Yaudi tau enda na nunei tantenangma, enai na Yerusalemi, ya wo nyontarai we esanesa Allai di ya. 6Na awe entarao piwe riotu wadi, mamo enda wu manu we rasuri kong nyontarai endoaoa paya enai nai wadi. Ya enukaeng we entarao rasuri kong we endoaoa paya engkawio na kawio enempa. 7Interi esarokutuya kia engkawio etoyo, “Nyontarai engkawio nisaya wo endapi raora Galilea tato? 8Mana tata tangkai tantarao ya engkawio na kawio tangkawio nai na raora tanenei pa, topitotoi pei toyana pae? 9Tata wo nyontarai na Partia, Media, Elami, na Mesopotamia, Yudea kong Kapadokia, na Pontusi kong Asia, 10na Prigia, Pampilia, na Mesiri kong raora na nu Libia pai we kikeu we Kirene; kong ea na tata we enda na Roma, 11tata wo nyontarai Yaudi kong nyontarai we embe Yaudi wa mana esua akama Yaudi pai, nyontarai Kreta kong Arapi, tata tangkai tantarao ya engkawio na kawio tanenei kiai parari piwe aneaerai Allai dona pa!” 12Ya esarokutuya kia mae etutang waweri ya etoyo, “Pitoai tonina pae?” 13Mana na ya, eaya tato etoya we rasuri kong nyontarai endoaoa paya etoyo, “Nyontarai nea wo emaeru.”

Petrusi wiuwu arera mamarang we nyontarai we empau

14Interi Petrusi tewa doa kong rasuri ura ea koiri paya mae kewio na raupui beba we nyontarai we empau paya doyo, “E neta neu Yaudi pa mia kong nyontarai we menai na Yerusalemi pa mia, mentarakepana aiwarao piwe yo ekawiora we mia ne. 15Nyontarai nisa ya emaeru parari we metaoapa wa, wo nina ne saraka denyawa a riora bo enjatang ayarima peinina. 16Na awe rampa piana Allai kewio kakera na nabi Yoeli topinina;

17Allai doyo, ingkai tawa na a ria menaing na wane, Yau ingkai Ewuwu Duainunung Mamarang pai wu nyontarai nea engkai,

mene kumai muang paya kong mene kumai wawing paya, ingkai engkakera,

mene aimiomang paya ingkai etadu pi anyawa pa,

mene paituampa ya ingkai etadu ami yona weya pa.

18Wu neu woming muang paya kong wawing paya,

ingkai Ewuwu Duainunung Mamarang nei na a ria menaing yani.

Mae ingkai ya engkakera pitaubai we etopana weya pa.

19Yau ingkai yong pitantuma pau na yei na rora peidi,

kong pianeaerai pa na ung na nunei:

ingkai dedu ria pei kong adia, wiou kong sona.

20Wo wanei ingkai berorang,

Yembai wanei merai parari ria.

Pi yanapa tawa wo, imbaromi Seni ne a baba mamarang3 wadi ingkai rama pa.

21Na a yani matei di yau we Seni anompa,

ingkai dedu pariripa.4

22E nyontarai Israeli pa mia, mentarama kawio we etopana nina: Yesusi nyontarai Nasareti pai piana Allai demi we mia ma. Piya na pa denyawa na paya kong pitantuma pa kong kamang we Allai nyari na Yesusi na mene madu kuira pa. Piyana pa mendeoa eampa. 23Parari we Allai mantauni dapa pa. I kiutu we dong Yesusi we mia, interi memuni kong mempikari we nyontarai emamuna paya etoni yeroi na aitaba pai.5 24Mana Allai doni tewa taweri na kiori warui kaidapa, wo I andi kaidapai riuwai pampamba.6 25Dauti piana kewio kakera parari Kristusi kawio ingkai sopanapa doyo,

Yau erewo Seni pempong yau pampang;

I wo yirii yau, impana edidora na pianea wa.7

26Topiana pa aneurarong nei merarising

woreunei yeparandin Au,

neu tarai kakopa we ingkai keda nei i wo nyai na we medori piboki na kaida wau.

27Wo Auwo pika duainunungnei nyaina maring karuari wanei rarong pe wa.

Au wo pika nemu woming we emamarang neya enai na kaida pai wa.

28Au ingkai tuba anyaupa we yau, rang we depai to wieng ki woroi-woroi wane.

Au ingkai bong neu mararising ne ra baba tutu Au borua yau.

29Maneta pa mia ekawio na anyuing wa parari Dauti i tantamami woriai pai, I wo keda esirai to ne aisata pai nai kong tataki a nina. 30Allai dong apa pei wei kong pepora parari we I ingkai riuwa nyontarai pei na Dauti ne tapung woriai pai we mananu. Dauti mantauni rearona piyana pa tutu mantauni tato nabi dina.8 31I wo aneao pitoai Allai ingkai donapa, impaina i kewio kakera we Mananu Mampariri we Allai derekamani pai, I ingkai wieng taweri na kaidapa. Dauti kewio doyo,

I wo Allai pikari nyaina maring karuari wa;

netarai pai menaing na kambireipai rarong wa.

32Yesusi nini Allai doni tewa taweri na ne kaida pa, amangkai piana mantau amandeo piwe tawa yana. 33I piana wieita to rora-marising, Yai Allai doni meoi na ne wara-dowatang pai. Interi dedu Duainunung Mamarang we piana Allai derekamani pai. Impaina I wuwu Duainunung Mamarang yani pai wiama yumao ama, Duainunung yani di mendeoi kong mentaraoi nina. 34Dauti wo wieita to rora-marising wa, mana Dauti kewio doyo,

Allai kewio we neu Seni doyo,

35Moyoi na neu dowatang nei

kio Yau yong we embemarowa we Aupa entuang esopeo aemupa!9

36Impaina nyontarai Israeli pa mia mengkai mesaneoa kangkuna, wo Yesusi we metoni yeroi na aitaba pai, Allai piana riuwari we Sen kong Kristusi to.”

37Na awe nyontarai tau we entarao pi yana impaina etatuwa ya kia interi ya etutang Petrusi kong rasuri ea wauya etoyo, “Maneta pa mia, pitoai topitotoi ingkai amatona pae?” 38Interi Petrusi kewio weya doyo, “Mia mengkai mesane taweri warui mene sasaripa mae embebaptisi mia na Yesus Kristusi anongpa, imbaro sasari menempa Allai dupipira, toyana maneta pa mia ingkai metadu Allai Duainunung Mamarang pai. 39Wo Allai ne arera nina we mia tutu mentapumi paya, kong nyontarai we enai na raora we woroi pa, aino nyontarai tau we Sen Allai yau ya pa.” 40Topiana Petrusi kewio we nyontarai tau paya, kong derekamana kangkuna imbaro ya empika enetarai warui kawasa we emamuna nisa, yatino kawasa we ingkai Allai dong mambabati weya pa. 41Impaina nyontarai tau we endoao kawio we Petrusi sopana pa, ya embebaptisi. Toyana nyontarai we endoaoa pa empau ea na ayani embe piaura we ring we toru (3,000) konta ea. 42Na yana empandui ya pampang, kong etadu anyau na rasuri paya, mae etampi kuira kong entandau kuira.

Nyontarai we esanesa Allai esanewaweria

43Nyontarai tau esarokutuya kong ematai tutu pitantuma tau we rasuri etona pa. 44Interi nyontarai tau we endoao Allai pa empanduiya pampang kong piwe enempa emariwa kuira na,10 45kong na ya mamo ei dewayang pitau nempa toratoraia interi embiwo pe yana maiya parari pitoai koiri-koiri esanewea pa. 46Na esanerarong koiri anemai mamo empandui ya na Allai ne Manu Mamarang pai na Yerusalemi we entandau, kong na manu enempa koiri to koiri etampi kuira na emararising kong esaneaiwa ya. 47Ya etaparanding Allai pampang tutu nyontarai tau esaneweng ya, impaina anemai Seni dong nyontarai endoaoa pa empau ea tutu nyontarai tau Allai periri ya ea.