Skip to content
BibleKenya

Alkitab Bahasa Ansus

Pi Rasuri Enari 3

Petrusi dong we Piaya penang

Na apeana saraka a riora botoru rawandeng, awe Yaudi entandau pa, Petrusi kong Yoanisi unda wu Allai ne Manu Mamarang pai we untandau na yana. Na Aturarei Baba esawi we Aturarei Weng pai, na yana nyontarai muang pei piaya na nyani dawini pa, anemai mamo nyontarai pea engkori na kewang pei we meoi na yana imbaromi dewa pe pea wei, na nyontarai we esua wu Allai ne Manu Mamarang pai na Yerusalemi pa. Na yana nyontaraipai reo Petrusi kong Yoanisi undama we uro usua to Allai ne Manu Mamarang pai mamo i dewa asaru imbaro urong pianea wei. Petrusi kong Yoanisi undekakepani mae Petrusi kewio wei doyo, “Remumao andu!” Interi nyontarainei rekakepang asaru, i anesara we dedu pianea na asaru. Mana Petrusi kewio wei doyo, “Yau neu pe pea wa wiria, mana pitoai neu pa ingkai yona we au: Na Yesus Kristusi nyontarai Nasareti pai Anong pa, rua.” Interi Petrusi riu na nyontarainei wara dowatang pai piataria doa, nayana to aempa kong aeng kamain pa paya. Nyontarainei yero doa mae ria towana tonina, interi yua kong Petrusi kong Yoanisi asaru to Allai ne Manu Mamarang rarong pai, ria yeraropi mae deparanding Allai. Nyontarai tau endeoi we ria mae deparanding Allai. Ya endearoani we nyontarai nini andi anemai meoi deiwiewa na Aturarei Weng pai na Allai ne Manu Mamarang wadi, impaina esarokutuya kia tutu endeo piwe tawa na nyontarai wadi pa.

Petrusi denyau nyontarai tau na Seni ne Manu waraseta repom pai

Nyontarai we piaya mana penang yani dua Petrusi kong Yoanisi asaru pampang, ra sisu Sarabi wepiang Seni ne Manu wadi we esawi we Sarabi Salomoi, nyontarai tau we na yasa, ya esarokutuya impaina endama we esoriwari itoru. Awe Petrusi reo nyontarai we empau paya, impaina kewio weya doyo, “E nyontarai Israeli pa mia, pitoi dona mesarokutuya we piwe tawa nina pae? Pitoi dona mamo mendekakepang ama pampang pae? Metorato nyontarai we piaya nini tewa ria ne tutu paya na andu e? Ete tutu andu usomi Seni na wemai pae? 1 Andu wa mana Allai. Allaio Abrami, Isaki, kong Yakupi itosomi wei pai, Allai we tane woriai paya esomi wei pai, Allai di piana riuwa ne Woming Yesusia tedai raweina. Yesusi nini piana metoni we mananu paya kong mentampiri, mia tato membateta Pilatusi na awe anewe pika Yesusi pa. 2 I memarang kong mei, mana miawo membatetari kong metairorai imbaro Pilatusi warapika nyontarai we piana miung nyontarai pa we mia. Maneta pa mia, miati memuni pa, I wo andi dong aseng ne we nyontarai ne tata kuira pa, mana Allai doni wieng taweri warui kaida pai, mantau amandeoa na amandekamine. Piwe piana mendeoa kong mendearoani nina na we piaya nini, wo i piana penang to, tutu I wo rioaoa na Yesusi anong pa kong ne paya pa. Impaina na Yesusi Anong yani pai donane i piana penang mae doa na mendenawau nina.

Manetapa mia, ereukamana we pitoai mia kong mananu paya mengkai menari we Yesusi pa, tutu mia wo mendearoang piwe metonapa wa. Mana na rang yani, pitoai Allai sopana pampong na ne nabi paya pa, wo Kristusi iwo topitotoi pa ingkai didiwa, piana tawa parariato. Topiana mamo manetapa mia, topitotoi pa mesanetaweri warui mene sasari pa kong topitotoi mentaweri wu Allai ma imbaromi I dupirandeni mene sasari pa, imbaro Seni dong mia mesanerarongpa paya, kong demi Yesusi ria wu miama, Yesusi nini na retenangpa Seni doni we Mananu Mampariri we mia eampa. I andi nyaina rora-marising pai kio awe Allai dong pitau yana waworu parari we Allai sopana na ne nabi emamarang paya na pampong pa. 3 Musai kewio doyo, ‘Allai, mene Seni pai, ingkai demi nabipei na mandarong menempai we mia, parari Yai demi yau pa, pitoai sopana we mia pa, mendekakepana na wemai. Wo ingkai tawa ki, we matei di reokakepana wa pitoai nabipai sopana pa mamo, nyontarai yani ingkai Allai keai tori warui Ne nyontarai paya.’ Mae nabi pitau entopang kawio we rana Allai na pampong pa, retenang na nabi Semueli kong nabi peaya we endatuwari ema pa, ea kia entopang kakera parari awa pui nini. 4 Allai ne arera we nabi paya engkawio kakerai pa, arera yani we maneta pa mia, na arera we Allai nyari kong tantapumi woriai paya, I kewio we Abrami tonina doyo, ‘Na nemu tapumu woriai paya, Yau ingkai emyuang kawasa taubai na nunei tantenang.’ Arera nini pai we mia tato. Impaina Allai diri Ne Woming pai, demi riama we mia pampong, imbaro miuang so mia memanaing warui piwe moyawa pa kong mesanetaweri we Seni.”

Source notes (4)
  1. Cross-reference Kel. 3:15
  2. Cross-reference Mat. 27:15-23; Mrk. 15:6-14; Luk. 23:13-23; Yoh. 19:12-15
  3. Cross-reference Ul. 18:15,18-19
  4. Cross-reference Kej. 22:18

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.