Skip to content
BibleKenya

Alkitab Bahasa Ansus

Pi Rasuri Enari 4

Petrusi kong Yoanisi uroa na Majelisi Akama endena wau

Na awe Petrusi kong Yoanisi uroa ungkawio rai we nyontarai we empau paya pa, interi imami peaya kong wewedung we weetaiwai Allai ne Manu Mamarang pai kong nyontarai we embe Saduki peaya endawu Petrusi kong Yoanisi asaru ma. Ya engkayou kia tutu entarao Petrusi kong Yoanisi umbuwua we kawasa paya we Yesusi piana wieng taweri warui ne kaidapa, nina ne denyawa we nyontarai we engkadapa tarai ingkai embeng taweri ea. Impaina ya entapu rasuri pa asaru etong asaru to wangka rarong pai, tutu piana diruto, impaina ya endukepang Petrusi kong Yoanisi asaru ki kamai pai. Mana nyontarai we entarao rasuri pa asaru une anyau pa, madupea yati endoaoa, impaina nyontarai endoao anyau parari Yesusi pa empau ea embe piaura we ring we ring (5,000).

Kamai ea Majelisi Akama paya kong we embedung na Yaudi paya kong kuru akama Yaudi paya, empanduikui ya na Yerusalemi. Empandu ya kong Imami Baba Hanasi kong Kayafasi, Yoanisi, Aleksanderi, kong tau we esua mandarong imami baba pai. Interi engko Petrusi kong Yoanisi asaru wu mananu paya interi etutang asaru etoyo, “Naina paya matei kong matei anong pa murong nyontarai we piaya nini riampa e?” Interi Duainunung Mamarang pai yumao Petrusi paina kewio doyo, “Tuani mia, we membedung we Yaudi pa, kong we membe Majelisi Akama pa mia! Na a nini undoa na mendena ne, etutangkakewa we andu tutu urong pi we mai we umpata nyontarai we piaya wadi, mae mia meto meserai we na paya matei nyontarai yani pai penampa, toyana mamo tuang mananu pa mia mengkai kong nyontarai taubai Israeli pa mia, mentarama! Nyontarai piaya nini tewa doa na mendenape nina, i penang nina tutu Anong Yesusi Kristusi nyontarai Nasaretio metoni yeroi na aitaba pai, mana Allai doni wieng taweri eampa. 1 Yesusi nini pai di na waya na Weraung Mamarang entopani etoyo,

Diri we menari manu pai mengkaipiri pi, ria ea we diri wepyang to.

Impaina na Yesusi memeari tato, nyontarai ne tata tatadu pariri pa, wo na nunei tantenang, na nyontarai nea koiri tato anong ne dedu paya pea wa, mana na Allai we periri nyontarai pa.” Na awe Majelisi Akama paya endeo Petrusi kong Yoanisi ungkawio na umataiwa mae esaneao we asaru mamo uradu anyau we tadai pea wa, impaina ya esarokutuya kia, mae ya endearoang Petrusi kong Yoanesi asaru mamo urua Yesusi. Mana Majelisi Akama paya entopang pianea we etintarura Petrusi kong Yoanesi asaru wa, tutu nyontarai we uroni penang yani pai doa rurang rasuri pa asaru na endena pa. Impaina etami rasuri kodupa asaru unda tori warui mayoi sidang pai, interi engkawio mai we pitoi etona we asaru eampa. Etoyo, piwe topitotoi ai ingkai tatona we nyontarai ne asaru pae? Nyontarai pa engkai we na Yerusalemi nini piana esaneoa na wemai wo pi aneaerai we tawa na yana we rasuri pa asaru urona pa, pi yana tatawo tampora wa. Imbaro we ninane endeo entopana ra baba pe, mamo mendema tasua asaru na paya, imbaro undeo ungkawio we nyontaraipei tato ete we nyontarai peaya na Yesusi anompa pe. Impaina esau rasuri pa asaru usua taweria ea, interi ya esua rasuri pa asaru we uranyau ete ungkawio we matei ea tato na Yesusi anompa wa. Mana Petrusi kong Yoanisi uroa uroyo, “Mantau mesanetatuata, pitoi we pitarai na Sen Allai renapa pa; urong parari kawio menempa ete urong parari Allai ne kawio pae? Wo amangkawio manaimba parari we piana amandeoa kong amantaraoa meari pa.” Majelisi Akama paya etadu kawio pea wa we etong mambabati we Petrusi kong Yoanisi asaru pa, impaina etamindui asaru interi empika asaru unda ea, tutu ematai nyontarai madupei paya etaparanding Allai tutu pi we tawa yana pa. Nyontarai piaya we dedu panang na tantuma yani pai piana ne puda pe piakodu to.

Nyontarai we endoaoa pa ya etewa Seni we dong mambiri

Impaina na awe Mananu Agama paya empika Petrusi kong Yoanisi asaru pa untaweri wu uneta paya kong we empandui ya paya, mae ungkawio parariapi pitau we weembedung na imami pa kong mananu Yaudi paya entopana we asarupa. 2 Na awe uneta empandu ya pai entaraoa piyana pa, ya kuira entandau na esanerarong koiri we Allai, ya engkawio etoyo, “Seni, Au nuari rora kong nunei kong rawanang kong pitau pai. 3Na Dumuainunung Mamarang pai piana kowio na nemu woming Dauti amane woriai pai, kowio boyo,

Pitoai kawasa we endearoang Seni wa engkayou pae?

Pitoai nyontarai tau na nunei asenetau we unawa pa nina e?

Mananu na nunei etamamang we etoamuna,

kong we embedung empandui ya

emarowa we Seni kong Kristusi pai. 4

Wo taraie Herodesi kong Pontiusi Pilatusi urong mayoi pei kong nyontarai we endearoang Seni wa kong nyontarai Israeli ya na bendari nini. Mae ya esanetatuata we embemarowa we Yesusi, Nemu Woming Mamarang pai, we piana Au ruwari we Kristusi. Esanerarong koiri we etong pitau yana pa, Au piana anemutatua na pampong wo ingkai piyana tawa pararia, mae Au kutu yanapa na yei parariapi paya kong we aneaoa pa meari. Na ninato Seni, reaoa topino ya emamuna we ama nina, mae bong mambiri we nemu woming ne ama, imbaromi amambuwu Nemu Arera ne na matai wa. Bong waramu paya pai ma imbaromi nyontarai we esui pa empanang kong nuari piwe tantuma pa na nemu paya pa naina Yesusi anong pa, Au nemu woming Mamarang pai.” Mae ya entandau akai pa, nu we empandu yanai wadi medidou, kong Duainunung Mamarang pai yumao ya, impaina na yana to ya engkawio kangkuna parari Allai ne Arera pa.

Piwe nyontarai we endoaoa pa etonapa

5

Nyontarai tau we endoaoa pa esanerarong koiri kong esanetatuata koiri tato, na ya koiri tato anetatuata we piwe nempa we memeari wa. Mana pitoai ei nempa weya kuira. Na paya we baba pa, rasuri paya etanyau topino Yesusi wieng taweri warui kaida pa, Impaina Seni myuangso ya raweina. Impaina nyontarai pe koiri na ya na meoi pa ne pianea wawiria, tutu ya etamamang we embo ene kakopa pa kong manu pa, mae pe yana engko wu rasuri paya, interi embiwo pe pa tate nyontarai we weesanewea paya. Topiana parari we na Yusupi, i wio kakopa we nempa yana, interi pe we dedutapa dona we rasuri paya, Yusupi nini mamo wia na marandang Lewi na nu Siprusi. Rasuri wauya esawi anong pei Barnabasi ete kumai dong mararising.

Source notes (5)
  1. Cross-reference Mzm. 118:22
  2. Cross-reference Kel. 20:11; Neh. 9:6; Mzm. 146:6
  3. Cross-reference Mzm. 2:1-2
  4. Cross-reference Mat. 27:1-2; Mrk. 15:1; Luk. 23:1,7-11; Yoh. 18:28-29
  5. Cross-reference Kis. 2:44-45

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.