Pi Rasuri Enari 5

Ananiasi kong Sapirai

1Nyontaraipei ea anongpei Ananiasi, i kong ne wawini Sapirai umbo une kakopa pa ea. 2Usanerarong koiri we umbarakepang pe pa ea wata we asaru mae Ananiasi kio ea dona we rasuri paya. 3Mana Petrusi kewio we Ananiasi doyo, “Ananiase, pitoi pika Nyombatang pai yumao anemurarong pai pa, impaina weangkari Duainunung Mamarang nei, mae warakepang pe we muraduta na murawayang kakopa pa wau ea wata we aupa e? 4Na awe bowayang kakopa pa wami mamo kakopa pa au nemupa kong awe bowayang na pa mamo pe pa au nemupa tato, mae bona parari we anemutatuata pa, pitoi anemutatua we weangkari tonina pe, wo weangkari nyontarai wa mae piana weangkari Allai!” 5Na Ananiasi tarao kawiopa tebari tantuma mae ne asengpa takutu, impaina nyontarai we entarao piwe tawa tantuma pa ematai kia. 6Interi aimiomang peaya esuama esasan Ananiasi netarai kakopa pai interi engkori toria we etaisatai.

7Waketo saraka riora toru dapira mamo Ananiasi wawini Sapirai riama, mae i riuinari piwe tawa yana wa. 8Petrus kewio we Sapirai doyo, “Topana we yau, pe we muraduta na kakopa we murawayana pei nina kie?” Sapirai kewio doyo, “Pe we uraduta peinaki.”

9Interi Petrusi doyo, “Pitoi au kong awamui mungkawio mai we muntou mumbeangkari Duainunung Mamarang pai pa e? Remua! Aimiomang we etaisata awamui peati etoa na aturarei ri pe wana, wo ingkai engko nentarai pai tato toria.” 10Na yanato Sapirai aseng pa takutu na Petrusi renawau, na awe aimiomang paya esuamapa etadu Sapirai piana kedato, interi engkoria etaisatai rurang awani. 11Impaina jemaati we endoaoa we Yesusi paya, kong nyontarai peaya tato we entarao piwe tawa tantuma pa mamo ematai kia.

Kamang kong pi aneaerai kong pi tantuma

12Rasuri paya enari kamang pitau kong pitantuma na Allai pa na nyontarai tau pa ene madu pa, nyontarai tau we endoaoa paya esanerarong koiri kong anemai mamo empandu ya na Seni ne Manu Mamarang pai ne sarabi we esawi Waraseta Salomoi pai. 13Kong nyontarai we na ri peaya, ya ene barui pea we endama empandura kong nyontarai we endoaoa paya, topiana nyontarai tau paya entuang we nyontarai we endoaoa paya. 14Impaina anemai mamo nyontarai we endoao Seni paya ya empau ea, mamo muang kong wawing. 15Tutu nyontarai we endoao Seni empau kia donane we esui paya etosa embata na andaung pa ete kewang pa, enduwa we esui paya na kewang wu rang wanea imbaromi Petrusi riana yanapa mamo duainunungpai dedu ya waro empanang. 16Kawasa tau enda na raora kikeu na bendari Yerusalemi, ya engko nyontarai we esui kong we semi-semi yumao yapa, kong nyontarai yasa rasuri paya etosa empanang.

Mananu Yaudi etong rasuri wau ya esua to wangka rarong

17Interi Imami Baba pai kong ne weetuari paya, yatino nyontarai we pandura Saduki paya, ya esane kayou we rasuri wauya. 18Impaina ya entapu rasuri wauya interi etoya esua to wangka baba pai rarong pa. 19Mana na diru wadi Seni ne mampang pei riama yepa aturarei na wangka wadi mae kio ya emati tori, kewio weya doyo, 20“Mendara metoa na Allai ne Manu Mamarang pai mae mentopana we nyontarai paya, parari topitotoi pa embeng waworu pa.”

21Impaina rasuri wauya etong parari arera we mampang wadi sopana weya pa, interi ayarima kakepang pa, ya enda esua to Allai ne Manu Mamarang pai mae etanyau na yana.

Na ayari yani tato, Imami Baba pai kong ne we etuari wauya endara ekonta we embedung we Yaudi wauya. Ya wo Majelisi Akama diya. Interi etami nyontarai peaya we engko rasuri wauya na wangka rarong paia. 22Mana nyontarai we etami ya pa enda sisu wangka pai, mamo endeo rasuri paya na wana wa, impaina entaweria entopang piwe tawa yana pa we Majelisi Akama paya. 23Ya engkawio we Majelisi Akama paya etoyo, “Amanda sisu wangka pai mamo amandeo aturarei pa emparemana na we piboki, kong maninuing paya etoa na aturarei pai repong, mana na awe amasepa aturareipai, amandeo rasuri paya na wangka rarongpai wa.” 24Impaina maninuing Allai ne Manu Mamarang paya kong we embedung we imami paya entarao kawio yanapa, esarokutuya kong ematai piwe tawa yana. 25Interi nyontarai muang pei riama sopang arera pea doyo, “Yai pa mia Mentarama! Nyontarai we metosa enaina wangka rarong pai, nina wo etanyau nyontarai madu peaya na Allai ne Manu Mamarang pai.”

Rasuri paya etoa na Majelisi Akama endenapa

26Impaina we etaiwai Seni ne Manu Mamarang pai kong we wedung weya pa, enda we engko rasuri pa asaru taweri, mana engko asaru na etawaya wa, tutu ya wo ematai nyontarai empau paya esoya na kami pe. 27Interi engko rasuri wau asarua uroa na Majelisi Akama endenawau, mae Imami Baba pai dong autang we asaru. 28I kewio doyo, “Ama wo piana ama sua mia na kangkuna to we mendeo metanyau na nyontarai yani Anong pa eampe, mana mentarao piwe amantopanapa wa. Mae menda membuwu mene anyau nina na Yerusalemi tantenang. Yana meari wa mae mia wo mentubakepang ama tutu amati amatonane Nyontarai yani kedapa.”1 29Toyana Petrusi kong rasuri ea paya etoyo, “Topitotoi pa, amawo amatong parari piwe Allai daoapa ki, wo we nyontarai pei wa. 30Allai o tane woriai pa esomi wei pai, piana dong Yesusi wieng taweri warui kaidapai. 31I piana Allai riuwaria tedai, we Mananu kong we Mampariri, imbaromi rai Israeli emanaing warui ene sasari pa mae Allai dupirandeni ene sasari pa. 32Impaina amati amambuwu piana pa, ama kong Duainunung Mamarang Allai doni we nyontarai we etong parari Ne arerapa.”

33Majelisi Akama paya entarao kawio yana pa impaina engkayou kia mae ya wo esanetatuata we emung rasuri paya. 34Mana nyontarai pei na Majelisi Akama pai, i wo nyontarai embe Farisi dina, anong pei Gamalieli, i tato nyontarai we denyau Kawio we Musai soi kong kawasa entuang wei kia. I tewa doa interi demi engko rasuri wauya toria. 35Mae kewio we Majelisi Akama ea wauya doyo, “Neta neu nyontarai Israeli pa mia! Mesanetatuata aiwarao pitoai ingkai metona tawa we nyontarai nisa ya pa. 36Wo na awe rampa nyontarai pei anong pei Teudasi, doyo i wo nyontarai baba dina, impaina wake nyontarai pe embe piaura we kodu (400) etuari konti, mana pimamuna Roma pea emuni kong tau we etuari paya entatera kong pandura yani menaing. 37Na apeana ea, awe entoikamang nyontarai pa esanomi pa mamo, nyontarai pei anong pei Yudasi, iwo riana raora Galileai, i anemangkusi kia we dona nyontarai madupei etuari, mana i tato emuni kong nyontarai tau we etuari paya entatera tato. 38Impaina piwe tawa ninane yona yisua mia, imbaromi mendeo metong pianea we nyontarai nisa pe, mempika ya ki, topino ene anyau ne na nyontarai, mamo anyau nina kong we entonapa ingkai manaing. 39Mana parari kawio yana rana Allai mamo mia wo mene barui pea we mesua nyontarai nisa ya wa, topino donane membarui we Allai pe.” 40Interi ya etami nyontarai peaya engko rasuri wau ya esua taweri we etutang we ya kong esua ya etoyo, mendeo metanyau na nyontarai yani anompa naria eampe, topiana etairora nyontarai peaya endaruba rasuri wau ya interi empika ya. 41Na yanato rasuri wauya enda tori warui Majelisi Akama wauya na emararising tutu Allai dorato ya emai we etadu didiwa, wo etua Yesusi. 42Interi anemai ya etanyau pampang na Allai ne Manu Mamarang pai kong nyontarai paya ene manu pa, mae ea embuwu Arera Weweng pai parari Yesusi Kristusi, topino I wo Mananu Mampariri we Allai derekamani pina.