Alkitab Bahasa Ansus
Pi Rasuri Enari 6
Nyontarai pe embeitu etiri ya we empata we engkiaripi
Nyontarai we etua Yesusi pa empau ea, mae na a yani nyontarai Yaudi we engkawio na kawio Yunani pa, ya esaneung Yaudi tarai wauya yatino we etong parari kanang Iberani paya, tutu wiwai etona we etingpata nyontarai we engkiari pianea wa pa, ene wawing kabong paya etadu ea wa tato. Topiana pa rasuri ura ea kodu wauya empandu nyontarai tau we endoao Allai paya interi engkawio weya etoyo, “Neta pa mia, roweang pa donane amandewaria impaina amambuwu Allai ne Arera nei wa pe, yana pa wo moya wa. Impaina neta pa mia metiri nyontarai pe embeitu na mia, we tandearoang ya wo emai kong Duainunung Mamarang pai yumao ya kong esanekurayang, imbaro amanduwa ya we endu mariwa nina we etimpata nyontarai we engkiari pi paya. Imbaro amawo piana amantandau kong amambuwu Allai ne Arera ne meari ki.”
Nyontarai paya kuira endoawe piwe rasuri paya entopana pa, interi ya etiri Stepanusi, nyontarai we rioao Yesusi kia mae Duainunung Mamarang pai yumaoi, kong etiri Pilipusi, Prokorusi, Nikanori, Timoni, Permenasi, kong Nikolausi na Antiokia; iwo nyontarai Yaudi dina wa mana i yua Akama Yaudi. Nyontarai we embeitu paya enda entoa na rasuri pa endenawau, interi rasuripaya entandau enduwa embaramipa embarawawu ya kong etewara we myuang pa na Seni so ya. Impaina Allai ne Arera ne embuwua tate nupa kong we etua Yesusi na Yerusalemi paya empau ea, kong imami taubai paya endoaoa we Yesusi.
Entapu Stepanusi kong entubakepani na Majelisi Akama endena wau
Mae Stepanusi dedu Allai ne weweng dona pinoma pa kong dedu Ne paya pa, impaina nyari pitantuma na Allai kong piwe aneaera pa na kawasa tau endenawau. Mana nyontarai peaya na jemaati Yaudi pei entawa embatetari. Nyontarai yani paya esau ya we jemaati Libertini1 yatino Jemaati Yaudi o embe woming ea wa. Ya wo nyontarai Yaudi na Kirene kong Areksanderia. Ya engkong nyontarai Yaudi we na Kilikia kong Asia paya, embateta kong Stepanusi. Mae ya wo enebarui pea we etimbateta piwe Stepanusi sopanapa wa, tutu Duainunung Mamarang pai yumaoi paina anekurayang na kawio dingkawiora pa. Impaina ya embai nyontarai peaya we engkawio aya ya etoyo, “Amawo amantarao nyontarai nini pai kengkani Musai kong Allai!” Topiana ya engkawio aya nyontarai peaya kong mananu Yaudi peaya, tutu kuru akama Yaudi paya, interi ya enda we entapu Stepanusi, interi engkori wu Majelisi Akama paya. Interi ya engko nyontarai we embai ya paya ma etong kawio we mai wa we etimbu Stepanusi, nyontarai yani engkawio etoyo, “Nyontarai nini pai wo tetipa Allai ne Manu Mamarang pai kong tetipa Kawio we Musai soi pa. Wo amati piana amantarao i kewio doyo, Yesusi nyontarai Nasareti pai ingkai pyambari Allai ne Manu Mamarang pai kong riwang kanang we wiana Musai we tata pa.” Nyontarai tau we endama na mayoi Majelisi Akama paya endekakepang Stepanusi, mae na a yani endeo Stepanusi rekami pa dea waweria parari mampang pei rekami peina.
Source notes (1)
- Footnote Jemaati Libertini mamo, nyontarai na pampong embo ya we woming, mana na pui nina ya embai ya to impaina embe woming ea wa.
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.