Alkitab Bahasa Ansus
Pi Rasuri Enari 7
Stepanusi kewio na Majelisi Akama ende na wau
Imami Baba pai dutang Stepanusi doyo, “Pitau we nyontarai pa entopana pa wepitarai e?” Interi Stepanusi kewio doyo, “Neta neupa mia kong iyai pa mia, mentarama! Topino tantapumi woriai Abrami dedaung to Harani wami, na awe nyaina Mesopotamia pa, Allai we tedai raweina piana denyawi wei to.1 Mae Allai kewio wei doyo, ‘Pika mandarong nemu pai kong kakopa nemu pa kong ruato raora we ingkai Yenyawa we au pa.’ 2 Impaina Abrami pika raora nyontarai Kasdimi, interi dedaung to Harania. I nyaina yana ki tamani keda, interi Allai demi Abrami dedaung warui nu Harani ma nyaina nina, na kakopa ninawo mia yai kong neta pa mia menai na nina. Na a yani pai Allai dong pianea wa na raora yani we Abrami kio wei we ne wa, mae kakopa katea ki we ne wa, mana Allai derekamana we ingkai dong kakopa yana pa wei kong we ne tapung woriai wanea, a yani pai wo dedu kumai pei wami.3 Mana Allai sopana wei tonina doyo, ‘Nemu tapumu woriai wanea ingkai enai we nyontarai embeiya na kakopa ea enempa. Nyontarai we na raora yani ingkai etong pampinong ya na kangkuna kong embe woming we ya pudape piaura we kodu.’4 Allai kewio pampang we Abrami doyo, ‘Toyana ki, mana kawasa we etong nemu tapumu woriai neaya embe woming pa, Yau yong mambabati oya, impaina ya ingkai enda warui nu yani kong esomi we Yau na nina.’ 5
Interi Allai dona we Abrami kamana sunati wadi; toyana na awe Isaki nyani meoituturi pa ne ape injatoru mamo Abrami kioria wesunati, mae Isaki tato we sunati ne kumai Yakupi, kong Yakupi tato we sunati ne kumai ura ea kodu we embe entapumi woriai we rai Yaudi wauya pa.6
Tutu tantapumi woriai paya esane kayou Yusupi, impaina ya embowi we woming to Mesiri mana Allai deruari,7 kong warapikari warui uira taubai we deduta pa, Allai dong ne weweng dona pinoma pa wei kong anekurayang pa we Yusupi na awe doa na Firauni8 mananu Mesiri pai renapa. Impaina Firauni riuwari we gubernuri na raora Mesiri kong i wedung we pitau Firauni nempa. Interi piwawi baba pei riama miung raora Mesiri kong Kanani impaina nyontarai wauya esuira kia. Aidonane tantapumi woriai paya etadu roweang peawa. Mana Yakupi taraoa we na Mesiri wo pasibu pe madupea, i demi ne kumai paya yatino tane woriai paya enda to Mesiria, enda we retenang pina. Na awe enda we kodu pai mamo, Yusupi weroana we neta wauya topino i wo Yusupi dina. Na ayani to mananu Mesiri wadi rearoana weya wo Yusupi ne mandarong pina. Topiana Yusupi dong arera we tamani Yakupi, dewara imbaro ne mandarong pai kiai etadaung to Mesiri, empau kuira piatoru ea uraya ring (75). Impaina Yakupi dedaung to nu Mesiria, na yana pato, i kong tantapumi woriai paya enai na raora yani ki engkada. Tantapumi woriai paya eneina pa engko to aisata na Sikemi kong esiraiya na aisata we Abrami wiori warui Hemori ne kumai paya na bendari Sikemi, na pe pau pea pa. Mana na awe Allai ne apaa we Abrami pa ra kikeu pa mamo, nyontarai Israeli pa empau ea na Mesiri.9 Interi rakio mananu Firauni pei eiya tewa ea we deirora raora Mesiri pai, nyontarai yani wo rearoang Yusupi wa. Mananu yani weangkari ya kong dongkangkani tantapumi woria paya, parari deirora ya engkayai kumai mararia paya toria embata na yana pa ki engkada. Na ayani paidi Musai nyani dawini pa kong i tato weng na Allai renawau. Na yembai pe botoru woroi ampa iwo etongsaiwari na tamani ne manupai. Interi ungkoria umpikari na mariapai, na yana to Firauni antuwawing pai deduti kioria dosaiwari parari mantauni ne kumai dina. Toyana etanyau Musai na anyau taubai we na Mesiri pa, impaina i piaya kia, na kawio sopana pa kong piwe donapa. Awe Musai ne pudape piakodu pa mamo na anerarongpai anewe do ria reo neta nyontarai Israeli paya. Interi i reo nyontarai Mesiri pei miungtati nyontarai na mandarong Israeli pei, impaina i piata nyontarai wadi mae miung nyontarai Mesiri paia keda. Musai dorato rai nembadi esaneaoa we Allai dirii we andi periri ne rai wadi pa, mana ya esaneaoa wa. Interi kamai wadi i reo nyontarai Israeli pe kodu undora waweri asaru, impaina i dosaera we imbaro usanetaweri we umbekoiri ea, i kewio we asaru doyo, Maruwo mambenetai di maru mana pitoi dona mundora maru pae? Mana nyontarai we riora neta wadi sampi Musai tori mae kewio wei doyo, ‘Matei riuwa au we mananu kong we kutu kawio we amapa ne? Ete au bo mung yau tatoe parari rawandempe mung nyontarai Mesiri pai pae?’ Na awe Musai tarao kawio we nyontarai wadi sopana yana, impaina meti ria to Kakopa Midiania nyai na yana, nayana didau mae dedu kumai muang pe kodu.10
Puda pe piakodu ea, mampang pei riawurima na mapangpai we kikeu we wi Sinai, na adia we dang meti na waikiri we weneina pai. Musai arokutuya kia reo pi yani, impaina i ria kikeu we reo pitoina, interi tarao Seni kewio wei doyo, ‘Yau wo Allai o mentapumi woriai, Abrami, Isaki, kong Yakupi itosomi wei pai andi Yau,’ Musai metai mae didora tutu iwo ne barui pea we reto waikiri we dang wadi wa. Interi Allai kewio wei doyo, ‘Pika sandaripa warui aemupa, wo nu we boanai pai mamo kakopa mamarang pina. Yau wo piana erewoa pitarai neu kawasa na Mesiri ene uira pa to, yau wo piana etarawo etaiwau pa, aidonane Yau ewia we epika ya, impaina taramuma! Yau yemia au toweri to nu Mesiri wanea.’ Musai nini piana ya empiri to na kawio we entopana etoyo, ‘Mateidi dong puaya au we ruwai kong pika ama pae?’ I to, Musai we Allai demi we mananu kong wemampariri pa, na paya we mampangpai denyawi netaraipai wei na waikiri weneina pai pa. Andi kio ya entori warui nu Mesiri pai na nyari pitantuma pa kong piwe aneaerai pa, na Mesiri, na rawanang Merai pai kong na mapangpai we puda pe piakodu pa.11 Musai nini paidi kewio we nyontarai Israeli paya doyo. ‘Allai ingkai dirii nabi pei na mentapumi woriai wanea parari I diri yau nina pa.’ 12 Musai nini pai nyaina rai Israeli paya ene madu kiuira pa na mapang pai, andi mampang pai riama kewio konti na wi Sinai pai we tantapumi woriai paya, I tato kio Allai ne Arera pa we sopana we tata pa.13 Mana tantapumi woriai paya emaidai entuang wei pe, ea kong entampiri mae esanewe entaweri to kakopa Mesiri pai ea. Interi ya engkawio we Haruni etoyo, ‘Au nuari nyombatangnai pea we ama imbaro amato ya we seng we etara ama, wo amawo amanduinari pitoai tawa na Musai pa, i wo nyontarai we kio amatori warui kakopa Mesiri tonina ma pa!’14 Interi ya enari nyombatangnai pei parari sapi antung pei imbaro etong pikika pa we etisomi wei, kong etong munara we etaparanding nyombatangnai we mantau enari wadi. Impaina Allai dedaiweria karutarea kong pika ya esomi piori we na rora pai we endoaoa we seng, piana parari pitoai entoi na weraung mamarang na nabi paya topinina,
‘E kawasa Israeli pa mia! Na pudape piakodu menai na mapang pai, mengkutu piaung pa metona we pikika,
metorato pikika yana pa metona we Yau e?15
Wereria wiria, mana yawa nyombatangnai Moloki pai
mia kuira mengkori kong nyombatangnai piori Refani,
nyombatangnai yani pai wo mantau menari we mesomi wei, wo Yau ingkai Ekai mia woroi rasisu nu Baberi.’
Stepanusi kewio pampang doyo, Yawa denyawa we Allai nyainai pai, wiata kong tane woriaipa ya na mapang wadi, Yawa Mamarang yani pai Allai demi Musai nyari parari kambari we Allai denyawi wei pa.16 Interi Yawa yani pai tane woriai paya, engkori pampang na ene rangpa ra sisu awe Yosuai kio ya etawa kakopa nini warui kawasa eaya ene paya pa, yatino Allai dedawa ya warui tane woriai pa endenawau, yawa nini pai wiata ra sisu awe Dauti riu we mananupa. Allai dong ne weweng dona pinoma pa we Dauti, impaina Dauti dewara we I rioa wei we nyari manu pei we Allaio Yakupi yomi wei pai.17 Mana Salomoi di nyari manu pai we Allai pa.18 Toyana ki, mana Allai we Tedai raweinapai nyaina manu we nyontarai enari pai wa; wo na weraung we nabi pa entoi pai riotu topinina,
‘Rorapai wo pata mananu we Yau emayoi nai pina,
kong nunei wo nu aeune doanai pina,
Impaina mia menari manu pei we Yau wa
ete manari nu pea we emayoi na wa.19
Interi Allai kewio doyo,
Wo mantau Yau enari pitaubai ninane pa.’
Mia mendukami maitui mae menukepana we Allai wa kong mentarakambireipa mengkowu we Allai ne kawio pa. Mia wo membateta Allai Duainunung Mamarang pai pampang, memparariapi mentapumi woriai paya na pampong pa.20 Na nabi na pampompa paya engkai mentapumi woriai paya piana etong pampinong ya na kangkuna, mae emung nyontarai na pampong Allai demi ya embuwua parari Allai ne Woming we mei ingkai riama pai, mae Andi na nina pa miati metoni emuni pa. Mia wo piana metadu Allai ne kawio pa we Musai deduta warui mampang paya pa, mana metong pararia wa.”
Stepanusi esoina kamia keda
Na awe Majelisi Akama paya entarao pitau we Stepanusi sopana yana pa, esanerarong pa ui mae engkayou wei kia. Mana Stepanusi we Duainunung Mamarang pai yumaoi pai, reto rora pai, I reo Allai ne wedea pai kong reo Yesusi doa na Allai ne dowatang pai. Interi Stepanusi kewio doyo, “E mendema, Yau erewo rora-marising teparera kong Kumai Nyontarai pai doa na Allai ne dowatang.” Impaina Majelisi Akama paya engkowu entarakambireipa mae ya etanana kia interi ya endawu Stepanusi. Na yanapa ya empapari warui bendari wadi tori interi esoi na kami. Nyontarai we endekamana parari Stepanusi pa, entuba ne asung na ri pa wata kong aimiomang pei anong pei Saulusi. Eso Stepanusi na kamipa toyana mae tendau doyo, Sen Yesusi e! Ko neu duainunungnei. Interi sanang aebu pa mae dewara na weraupui kangkuna mae doyo, “Sen remo sasari ninane bona tawa we ya pe!” Na kewioa kaipa mamo ne aseng pa takutu.
Source notes (20)
- Cross-reference Kej. 11:27, 17:14
- Cross-reference Kej. 12:1
- Cross-reference Kej. 12:7, 13:15, 15:18, 17:8
- Cross-reference Kej. 15:13-14
- Footnote Kejadian 15:13-14
- Cross-reference Kej. 21:2-4, 25:26, 29:31, 30:40, 35:16-18
- Cross-reference Kej. 37:1, 50:14
- Footnote Firauni mamo, nyontarai anong peina wa, mana anong we Mananu Mesiri pina
- Cross-reference Kel. 1:7, 3:10
- Cross-reference Kel. 18:3-4
- Cross-reference Kel. 7:3, 14:21; Bil. 14:33
- Cross-reference Ul. 18:15,18
- Cross-reference Kel. 19:1—20:17; Ul. 5:1-33
- Cross-reference Kel. 32:1-6
- Cross-reference Am. 5:25-27
- Cross-reference Kel. 25:40
- Cross-reference 2Sam. 7:2
- Cross-reference 1Raj. 6:1-38
- Cross-reference Yes. 66:1-2
- Cross-reference Yes. 63:10
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.