Pi Rasuri Enari 8

1aMae Saulusi tato rioa we Stepanusi emunia keda pa.

Saulusi dongkangkani nyontarai we endoaoa paya

1bNa a yani paito nyontarai Yaudi paya etongkangkani kangkuna we kawasa endoaoa pa na Yerusalemi, impaina nyontarai we endoaoa paya embawu tatera to raora na Yudea kong Samaria, mana we rasuri pa yati entoriwa. 2Nyontarai esomi we Allai paya esai etaidu tutu Stepanusi kaida nempa kong engkoria esirai. 3Mana Saulusi yemupa kangkuna we rioya nyontarai we endoaoa paya, I yua meti na manu pa mae piapa muang kong wawing paya tori interi demi nyontarai pa etosa esua wangka rarong pa.1

Arera weweng rana Allai pa Pilipusi wiuwua na Samaria

4Nyontarai endoaoa we piana entatera paya, embuwu Arera Weweng pa, na nupa tantenang. 5Mae Pilipusi ria to bendari pei na Samaria kong wiuwu Yesusi, Mananu Mampariri we Allai derekamani pai we nyontarai paya na yana. 6Na awe kawasa paya entarao Pilipusi ne anyau pa kong endeo piwe aneaerai pa, taubai na yapa endekakepana na wemai kia. 7Wo semi-semi paya etanana kangkuna mae emati tori warui nyontarai we semi-semi yumao ya pa, kong nyontarai we empaya pa kong we esaetaberi paya empau dong ya empanang. 8Impaina nyontarai we na bendari yani pai emararising kia. 9Na bendari pai mamo nyontarai pei anong pei Simoni. Piana woroi ampa na paya na semi-semi pai i nyari pi we aneaerai kia, donane nyontarai Samaria paya esarokutuyao pi we nyari yana, i kewio weya doyo, “Yau wo nyontarai pampinoma di yau wa.” 10Impaina nyontarai taubai na bendari yani pai, baba kong maia paya etuari mae etaparandini etoyo, “Nyontarai nini pai Allai ne paya dina, i we anong we ‘Paya Baba pa.’ ” 11Piana woroi to paina na semi-semi ne paya pa, donane nyontarai paya endekakepani kong etuari. 12Mana nina wo endoao Arera we Piboki Pilipusi wiuwua weya pa, parari Allai ne riu we Mananu pa kong parari Yesus Kristusi, Mananu Mampariri pai anong ne, interi ya etong enetarai pa we Piripusi webaptisi ya, muang kong wawing. 13Simoni mantauni rioaoa, impaina Pilipusi webaptisi i tato, interi i dua Pilipusi pampang, Simoni reo piwe aneaera kong piwe tawa tantuma na Allai we Pilipusi donapa, donane i arokutuya kia. 14Na awe rasuri paya na Yerusalemi entaraoa topino nyontarai Samaria paya piana endu Allai ne Arera pa, interi etami Petrusi kong Yoanisi unda ra. 15Na awe Petrusi kong Yoanisi usaetiapa, asaru untandau we nyontarai Samaria paya imbaro ya etadu Duainunung Mamarang pai. 16Tutu Duainunung Mamarang pai riama we yumao nyontarai pei na ya wami, wo ya embebaptisi na Sen Yesusi anongpa meari peina. 17Interi Petrusi kong Yoanisi urong umbaramipa wata na nyontarai Samaria paya, impaina etadu Duainunung Mamarang pai. 18Na awe Simoni reoa topino rasuri pa asaru urong umbarami pa wata na nyontarai paya mamo, ya etadu Duainunung Mamarang pai, impaina kio pe pea we dona wu Petrusi kong Yoanisi asarua. 19Interi i kewio doyo, “Murong paya yanapa we yau tato, imbaro yau tato yong warau ne wata na nyontarai pei mamo i dedu Duainunung Mamarang pai.” 20Mana Petrusi kewio doyo, “Au koda kong pe nemu pa to! Tutu borato piwe Allai dona pa wori na pe pae? 21Au wo konta na mariwa nini pai wa, wo anemurarongpai mei wa na Allai renawau. 22Impaina au anemutaweri warui piwe bona moyawa pa we anemurarong unawa pa, mae tondau we Seni imbaro I dupirandeni we anemutatuata moyawa pa warui anemurarong pai. 23Wo yau wo erewo au mamo anemurarongpai parari neopi we dawiri kong wemoyawa pa dawi au.” 24Interi Simoni dewara we Petrusi kong Yoanisi doyo, “Maruwo muntandau we Seni imbaro pitaubai we muntopana moyawa yana reo dedu yau pe.” 25Petrusi kong Yoanisi untopana parari Allai ne Arera pa rakai na yana, interi untaweri to Yerusalemi ea, na undataweri pa mamo umbuwu Arera Weweng na awa tau na raora Samaria pa.

Pilipusi kong nyontarai baba pei na Etiopia

26Seni ne mampangpei kewio wu Piripusi doyo, “Pilipuse towa rua! Rua to do matani to rangkapung wia na Yerusalemi to Gasa, rang yani menanopi.” 27Interi Pilipusi ria, na a yani nyontarai sida-sida2 pei, i riu wang wetadai, wewedung na mandarong Kandake, wawing mananu na Etiopia pai pitaubai nempa, i ria yomi we Allai na Yerusalemi. 28Mae teweri na wa we piaung empapari pai, i meyoi na wa rarongpai mae detora na weraung nabi Yesayai. 29Impaina Duainunung Mamarang pai kewio we Pilipusi doyo, “Rua kikeu wa we rianai pai.” 30Topiana pa Pilipusi ria kikeu wei interi i tarao nyontarai wadi detora na weraung nabi Yesayai, Pilipusi dutani doyo, “Yai e! Anembau piwe botora pae?” 31Nyontarai pai kewio doyo, “Topitotoi yau ingkai aneubawi pa, mana ei kewio anyawi we yau wa paina?” Interi i kewio aya Pilipusi imbaro umbeita na wa we depairi pai mae meyoi kikewi. 32Waya detori na weraung mamarang pai riotu topino,

“I perari domba we empapari we engkutui

parariapi domba antung we esea netuing pai mana weraupui wa,

topiana I kewio wa perari woretamung.3

33I entatipari kong etongpampinomi na wemai wa.

Ne asengpa takutu warui na nunei wawonei

impaina nyontarai pei kewio parari woriai nempai wa.”

34Interi mananu na Etiopia wadi kewio we Pilipusi doyo, “Eyutang au, mateidi nabi nini kewio parari pa? Sopang parari mantauni ete parari nyontarai pei ea ne?” 35Impaina na Pilipusi retenang kewiopa na rirang weraung mamarang pai yana, i wiuwu Arera Weweng parari Yesusi we mananu wetedai pai. 36Na rang rabuang pa, ya enda sisu nu pei etadu maria pea, mananu Etiopia wadi kewio doyo, “Remua maria piwani, pitoai dona mamo webaptisi yau wa pae?” [37Pilipusi kewio wei doyo, “Parari Tuane roaoa na anemurarong pai tantenang, mamo au ingkai webaptisi.”

Mananu Etopia wadi kewio doyo, “Yau eroaoa we Yesusi Kristusi wo Allai Antung pina.”]4 38Interi nyontarai Etiopia wadi demi we yiru wapai we pioweta, interi asaru umbia, Pilipusi kong nyontarai Etiopia wadi umbia to maria pai rarong pa, interi Pilipusi webaptisi nyontarai wadi. 39Na awe umbeita warui maria wadi pa, na tantuma Sen Duainunung Mamarang wadi kio Pilipusi warui nu yani, impaina mananu Etiopia pai riuinari Pilipusi eawa, anerarongpai merarising kia interi i yana wa we yanai pai kiori teweri. 40Na tantuma Pilipusi nyai na Asdoti, i ria topong na ne rang rarong pa wiuwu Arera Weweng pai parari Yesusi, na bendaripa tantenang ra sisu bendari Kaisarea rau.