Pi Rasuri Enari 9

Saulusi anetaweri warui ne sasari pa

1Na a yani pai Saulusi wo anekangkuna we doamuna kong miungtati nyontarai we etua Seni wauya, i ria kewio we imami baba pai,1 2we dewa weraung parenta pei kiori to we embedung we manu Yaudi esominai pai na Damsiki, imbaromi na wana dedu nyontarai we enda na Rang Yesusi pai eaya mamo, tepu ya dawi embaramipa mae kio ya to Yerusalemi.

3Impaina Saulusi ria to bendari Damsiki paia, ria kikeu we bendari wadi mamo, na tantuma wedeapei na rora pai dea wari raora we Saulusi doanai pai. 4Interi i sawa to kakopa pai, na yana tarao nyondaupui pei kewio wei doyo, “Saulus, Sauluse! Pitoai donane mungtati Yau pa?” 5Saulusi kewio doyo, “Mateidi au, Seni?” Nyondapui pai doyo, “Yau Yesusi we piana muntatiri pai. 6Mana towa boa, ruato bendari rarong waneia, na wana ingkai entopana we au pitoiai topitotoipa bongpararia pa.”

7Toyana nyontarai we endakong Saulusi paya entantuma kong embe endaupui kateawa, tutu ya entarao nyondaupui pai mana endeo nyontarai pei wa. 8Interi Saulusi tewara doa, mana rekamipa piana renawa reo pianea wa, na yana ya enduna warang pa etinti esua to Damsiki. 9A tantenang pe botoru mamo reoa katea wa kong i dampi wa mae dunung maria wa.

10Na Damsiki nyontarai pei, iwo dua Yesusi anong pei Ananiasi, Seni denyau netarai pai parari ami mae kewio wei doyo, “Ananiase!” Ananiasi kewio doyo, “Seni yau nina!” 11Interi Seni kewio doyo, “Au ruato rang we anong pei Rang Yeriwang to Yudasi manu nempai, na wana butang we nyontarai pei anongpei Saulusi we riana awa Tarsusi, nyontarai yani wo andi tendau pa. 12Mae na pi parari ami pei, mamo i reo nyontarai we anong pei Ananiasi yuara pui riuwa warampa warawawuri, imbaromi i reoa naria ea.” 13Mana Ananiasi kewio doyo, “Sen, yau wo piana etarawo nyontarai tau engkawio kakera nyontarai nini, we dongkangkani nemu nyontarai endoao na Yerusalemi paya. 14Kong Saulusi piana riama we do dewara kong we embedung na imami paya, we tepu nyontarai we endoao Au paya engkai.” 15Mana Seni kewio we Ananiasi doyo, “Ruaki, wo Yau piana yirii we piata Yau, imbaro i wiuwu Anoune we kawasa peaya, ya wo Yaudi diya wa, kong we mananu paya tutu rai Israeli pai tato. 16Mantau Yau ingkai yenyawa wei, uira pitaubaio topitotoi dedutapa tutu wiuwu Anoune.”

17Impaina Ananiasi ria yua to Yudasi manu nempai, i riuwa warangpa mae warawawu Saulusi mae doyo, “Sauluse netaneupa au, Sen Yesusi we remoi na rang rabuangpa na awe ruamapa, andi demi yau eramapa imbaromi au remuna ea kong Duainunung Mamarang pai yumao au.” 18Na a yanito parariapi diang neuna pei tepa warui Saulusi rekamipa interi i reoana taweri, toyana i tewa mae webaptisi. 19Mae dampia kaipa mamo netaraipai paya taweri ea.

Saulusi denyau na Damsiki

Saulusi nyai na Damsiki ape bototoi ea kong we etua Yesusi paya. 20Na yanato i riato manu Yaudi esominapa mae wiuwua we Yesusi wo Allai Antung dina. 21Nyontarai paya engkai esarokutuya we entarao Saulusi kewio toyana paina, impaina engkawio etoyo, “I wo nyontarai we na Yerusalemi piana miung nyontarai pitau we endoao Yesusi pa to? Kong ria toninama we tepu nyontarai endoaoa paya mae kio ya wu we embedung na imami paya to?”

22Mana Allai dong paya we Saulusi we nyari nyontarai paya endoaoa na kawio sopana pa, Kawio we sopana yana pa denyawa we na Yesusi tarai I wo Mananu Mampariri dina, impiana nyontarai Yaudi we enai na Damsiki paya etadu piea wa we etimbatetari.

23Wepira ape bototoi manyonapa, nyontarai Yaudi paya engkawiotatuata we emung Saulusi.2 24Impaina diru kong raida ya etamamang na aturarei baba na bendari pai we emuni, mana piwe engkawiotatuata yana pa, ei piana sopana we Saulusi to. 25Mana na diru peandina, we etua Saulusi paya engkoria, interi empiri na rawangpei rarong pai to umbaua.

Saulusi na Yerusalemi

26Saulusi ria to Yerusalemia, mae na yana pa i meriwa we ingkai kionta kong we etua Yesusi paya, mana ya emataiti tutu ya wo endoaoi wa topino taraie dodua Yesusi. 27Mana Barnabasi ria wuria, mae kiori wu rasuri paya, mae i tato kewiora we ya parari topino Saulusi mantauni reo Seni na rang rabuang pa mae Seni kewio wei, Barnabasi tato kewio pararia we Saulusi piana denyau na Damsiki na Yesusi anong pa na metai wa. 28Topiana pa Saulusi nyai kong ya mae denyau na metai wa na Yerusalemi tantenang na Seni anong pa. 29I kewio derura kong nyontarai Yaudi we engkawio na kawio Yunani pai parari Yesusi, mana esamupa we eto emuni. 30Impaina nyontarai we endoaoa peaya, engko Saulusi to Kaisarea, interi etanatui pampani to Tarsusi. 31Topianapa jemaati taubai na Yudea, Galilea, kong Samaria tantenang enaina we piboki, Allai ne Duainunung pai piata ya, mae ematai Seni, jemaati paya empaya ea kong empau naria ea.

Petrusi na Lida kong Yope

32Petrusi ria waria piaio jemaati paya, na apeana i piaio Seni ne nyontarai emamarang we enai na Lida paya. 33Na yanapa i dedu nyontarai muang pei anong pei Eneasi, i piana piaya pudape injatoru mae tewa warui nu denanai pai wa. 34Interi Petrusi kewio we Eneasi doyo, “Enease, Yesusi Kristusi dong au ponang, towa mae bosaiwa andaung we buenanai pai.” Na yanato i tewa doa. 35Impaina kawasa taubai na Lida kong Saroni endeo Eneasi penang pa, mamo engkai endoao Seni.

36Na raora Yope mamo nyontarai wawing pei anong pei Tabitai, i wo nyontarai we rioao Seni, (anongpa esawa na kawio Yunani aino Dorkasi, nina ne topino rusa), i wo dong piwe mai kia mae piata nyontarai we enepianeawa paya. 37Na a yani yuia keda, interi etoni kiuwira, mae etonia wiata na mandarong we na yei pai. 38Na Yope mamo woroi kaira wa warui Lida, impaina awe weetua Yesusi na Yope paya entarao Petrusi nyaina Lida, interi esoretuwa nyontarai pe kodu unda wu Petrusi kong ungko arera ninane, “Rua moraru to nu amaneng wanea.” 39Interi Petrusi tewa mae ria kong asaru, enda sisu wanapa engko Petrusi to mandarong we na yeipai, wawing kabong paya engkai esoriwari Petrusi mae esai kong etanyawa asung tanang kong asung tarimbai we Dorkasi dawa we ya na awe i wieng pa. 40Mana Petrusi demi ya enda tori engkai, interi meoi sanang aebu pa mae tendau. Impaina arota we Dorkasi netarai kakopa wadi mae kewio doyo, “Tabita towa!” Toyana Dorkasi rekamipa tapira mae tewa, na awe reo Petrusi mamo tewara meoi. 41Interi Petrusi riu na warang pa mae riupiataria doa, toyana Petrusi yau nyontarai we endoaoa paya kong wawing kabong paya interi dong Dorkasi we piana wieng taweri pai wu yara. 42Arera parari piwe tawa na Tabitai pa, embuwua na bendari Yope tantenang, impaina nyontarai madupei endoaoa we Yesusi wo Mananu Mampariri dina. 43Interi Petrusi nyaina bendari Yope pai ape bototoiea na Simoni ne manu wadi, i wo nyontarai we nyari piaung rerawapa raka kong manyena we dawa we pianea ea.