Alkitab Bahasa Ansus
Pi Rasuri Enari 10
Petrusi kong Korneliusi
Na bendari Kaisarea mamo nyontarai muang pei anong pei Korneliusi, i wo ne pangkati perwira we “Rai pimamuna Italia pai.” I kong ne mandarong pai tantenang ematai we Allai kong esomi wei, i tendau pampang we Allai. Korneliusi nini wo piata nyontarai Yaudi taubai we ene pianea wa pa.
Na apeana saraka riora botoru raida pai, i reoa na pitarai pianea parari ami, wo Allai ne mampang pei riama yauwi doyo, “Korneliuse!” Interi Korneliusi rekakepang mampang wadi na metai interi kewio doyo, “Pitoipa Seni e?”
Mampang wadi kewio doyo, “Nemu tondau kong warangbampa taparera we nyontarai paya piana Allai reoa to kong Allai tato anekakepang auto. Impaina na ninato bomi nyontarai peaya to Yope we engko nyontarai we anong pei Simoni we esawi na Petrusi. I nyaina Simoni ne manupai, Simoni nini dong piaung rerawa pa ra kaa kong manyena we pianea ea, ne manupai sura na kareng arawa pa.” Na a we mampangpai ria warui Korneliusi pa, i yau ne we empatari na manu pa kodu kong nyontarai pimamuna maninuing we mei pei, na pimamuna we etuari pampang paya. Interi Korneliusi kewio parariapi piwe tawapa, interi demi ya to Yope. Kamai eampai mamo nyontarai ne itoru itonda sisu rang rabuang we piana kikeu na Yope, wa saraka riora ura ea kodu mamo Petrusi wieita to manu mangkawawuani paia we tendau. Interi Petrusi wewi kia impaina anewe dampi, mana roweang pe emanyena toyana pa, na tantuma i dedu pianea parari demi. I reo rorapai tebau kong pianei perariapi irei we teparera enpiri wu nunei, yawa na beou manuapa. Na irei rarompai mamo dedu piaung we esae manuapa yatino we ena ri paya, piaung we esawaya pa kong aya we esapo pa. Interi nyondaupui pei kewio wei doyo, “Petruse towa kutui buani!” Petrusi doyo, “Wengki Seni, yau wo yang roweang we ewe tapua pa wa.” Mana nyondaupui yani kewio wei ea doyo, “Pitoi ai Allai sopana we mamarang pa, mamo remo topana we wetapua wau pe.” Interi pi reoa yana, kong nyondaupui we kewio pa we botoru mae irei pai wieita to rorapai. Petrusi anerarongpai dutang waweri tutu piwe reoa pa, na yana nyontarai we Korneliusi demi ya pa enda sisu manu we Petrusi nyainai pai. Interi esau nyontarai peima etutani etoyo, “Simoni we esawi we Petrusi andi nyai manu nini e?” Na awe Petrusi anetatua piwe reoa pa toyana mana Duainunung Mamarang pai kewio wei doyo, “Nyontarai pe itombe toru itoru itosera au. Towa wiara weu kong anemuriru we ruakong ya pe, wo Yau yemia endama pa.” Interi Petrusi wia raweu mae kewio we ya doyo, “Yauno mesera yau pa; Pitoi donane mendama mesera yau pae?” Engkawio etoyo, “Korneliusi, i wo perwira we anerarong weng mae metai Allai, kong kawasa Yaudi paya entuang wei we andi wieng pa, Allai ne mampang mamarang pei ria wuria sopana wei, we dewara we au rua wuri to nemanu pai we tarao pitoi ai topana wei pa.” Impaina Petrusi kewio weya doyo, “Diru nini metena na nina pa.”
Kamai wadi Petrusi tewa ria kong ya, nyontarai we endoaoa na Yope pa embetotoi endakonta. We pira apai ya enda sisu Kaisarea. Na yana Korneliusi kong neta paya kong nyontarai we dewara we ya pa piana empandura etamamangto. Na awe Petrusi ria sisu yana, Korneliusi ria wuria demamamani kong suang yomi wei na renawau. Mana Petrusi riuwaria doa interi kewio doyo, “Towa! Mantau yau wo nyontarai di yau tato.” Petrusi kewio kong Korneliusi toyana, mae yua to manu pai rarong pa, na yana reo nyontarai madu pei empandura kuira to. Interi kewio weya doyo, “Manetapa mia, mantau mia mesaneaoa we, na Akama Yaudi pai yuara kangkuna we nyontarai Yaudi paya empandura wa kong Yaudi wa paya pe, ete esua to ene manupa pe, mana Allai piana denyawa we yau to, yau wo erewo etopana we nyontarai pea ya we ya engkararia pe. Piyana pa donane na awe wau yau we erama pa, yau emaidai wa we erama pe, impaina yo etarawo pitoai donane Tuane wau yau tutura pa.”
Korneliusi kewio doyo, “Ape botoru we rampa parari anei, yau etandau na manupai na saraka botoru rawandeng pa. Na tantuma nyontarai pei doana reuna wau, asung we yesuna pa waweria. I kewio doyo, ‘Korneliuse! Allai piana tarao nemu tandau pa to kong aneao waramu tapira we bingpata nyontarai enepianea wa pa to. Impaina bomi nyontarai pei riato Yope, yau nyontarai pei we anompe Simon Petrusi, i nyaina Simoni ne manupai na kareng arawa pa, Simoni nini we nyari piaung rerawa raka manyena we pianea ea.’ Toyana mamo yemi nyontarai peaya wu au ma kong anemu rarong pai merarising we ruama nina, wo piana amanda kuira tonina ma na Allai renane, imbaromi amantarao piwe Allai demi au topana we amapa.”
Interi Petrusi kewio doyo, “Nina wo yau erewoarona tarai we Allai riukui nyontarai we esomi wei paya kuira na wemai.1 Nyontarai we na kawasa totoi ea na Yaudi ete Yaudi wa e, yati ematai Allai kong enari piwe maipa mamo nyontarai yasa ya Allai riukui ya. Maneta pa mia mentarakamang piana Allai ne Arera wiuwua we ne rai Israeli paya, arera yani wo Arera Weweng parari wemadori piboki we rana Yesusi Kristusi, i andino we Seni we nyontarai nea engkai. Mia wo mesaneaoa to piwe tawa na raora Yudea tantenang, we retenang na Galileapa na awe wepiana Yoanisi wiuwu kakera baptisangpai, yana wo parari Yesusi na Nasareti topino Allai dupi na Duainunung Mamarang pai kong ne mambiri pa. Andi ria wari raorapa tantenang dong weweng pa kong dong nyontarai we nyombatangpai yumao yapa empanang, wo Allai nyai konti. Amawo nyontarai we piana amandeo meari pitaubai we I dona na raora nyontarai Yaudi paya kong na bendari Yerusalemi, topianapa tato emuni etonia yeroi na aitabapai. Mana na awe botoru pai Allai doni tewa nariaea warui kaidapai kong Allai doni denyawi we nyontarai neya. We nyontarai paya engkai wa mana we ama, nyontarai we Allai diri ama pampong we ambesaksi parari I pa, amati piana amatampi kong amatunung konti na awe tewa warui kaidapai. Kong I demi ama amambuwu ne Arera Weweng ne we nyontarai taubai kong amambesaksi we, I wo Allai riuwari we Mananu we kiutu kawio we nyontarai we embeng paya kong nyontarai we engkada paya. Andi nabi pa engkai engkawio parari pa etoyo, ‘Nyontarai pa matei kionta we rioaoa we Yesusi mamo, i ingkai Allai dupirandeni ne sasaripa tutu Anong pa.’ ”
Nyontarai embe Yaudi wa etadu Duainunung Mamarang pai
Na awe Petrusi kewio rai mamo Duainunung Mamarang pai wiama yumao nyontarai taubai we entarao arera yana. Nyontarai Yaudi we endoao Yesusi mae endakong Petrusi warui Yope ma pa, esarokutuya we endeo Allai dong Duainunung Mamarang pai we nyontarai na ri we embe Yaudi wa pa. Wo ya entarao nyontarai paya engkawio na kawio pea weiya we mantaung ya enduinaria wa kong etaparanding Allai, interi Petrusi kewio doyo, “Mendema nyontarai nini ya, piana etadu Duainunung Mamarang pai parari we tataduta pa, impaina nyontarai pa mateidi yuara we embebaptisi na maria pa wae?” Impaina Petrusi demi ya embebaptisi na Yesusi Kristusi Anong pa, interi etewara we Petrusi imbaro nyai kong ya ape bototoi woroi ea.
Source notes (1)
- Cross-reference Ul. 10:17
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.