Alkitab Bahasa Ansus
Pi Rasuri Enari 11
Petrusi kewio parariapi Korneliusi we baptisi pa we Jemaati na Yerusalemi
Rasuri paya kong nyontarai taubai we endoao Yesusi na Yudea tantenang, entaraoa we nyontarai tau we embe Akama Yaudi wa piana etadu Allai ne Arera pa to. Impaina na awe Petrusi ria wu Yerusalemi ampai, nyontarai Yaudi we embe sunati paya etimbatetari. Ya engkawio etoyo, “Pitoi dona wua na nyontarai we embe sunati wami paya ene manupae? Kong pitoi dona buampi kuira kong ya pae?” Mana Petrusi doyaoa weya parari pitaubai we tawa pa, na retenangpa ra kai napa mae doyo, “Yau piana etandau na bendari Yope, mamo na tantuma Allai ne mambiri pa yumao yau impaina erewo piea parari ami. Piana perari irei we dererai yeroi na beou manua pa, wia na rora pai ma menaing na reuna wau. Mae yau ereukakepani apuipa mamo erewo piaung we esaemi manua pa, kong piaung we eteung ya wa, piaung esawaya kong aya we eteung ya wa. Interi etarawo nyondaupui pei kewio we yau doyo, ‘Petruse towa kutui buani!’ Mana yau ekawio yoyo, ‘Seni e, wengki! Topino yau wo yang roweang we ewe tapuapa wa.’ Interi nyondaupui yani kewio we yau ea doyo, ‘Pitoi ai Allai sopana we mamarang pa, remo topana we piana wetapua pe.’ Toyana piwe ereoa yana ereoa we botoru interi irei pai wieita to rora-marising. Na yana to nyontarai toru we etami itoru itonda na Kaisarea ma pa itonda sisu na manu we enai nai pai. Interi Duainunung Mamarang pai kewio we yau doyo, ‘Towa rua kong ya menda kuira mae remo anemuriru pe.’ Kong neta embe wonang nisa etua yau to Kaisarea, nayana amasua kuira to nyontarai pei ne manupai apui. Impaina muang pei kewio we ama topino i reo mampang pei doa na ne manu wadi rarong pa mae kewio doyo, ‘Bomi nyontarai peaya to Yope esau nyontarai muang pei anong pei Simoni we esawi tato we Petrusipai. I ingkai sopang arera we kio pariri pa we au, kong we nemu mandarong pai.’ Mae na eruwa kawio pa, Duainunung Mamarang pai yumao ya, parari we tawa na tata pampong pa. Na yana to yau aneuao Seni ne kawio sopani we doyo, ‘Yoanisi webaptisi na maria mana Allai ingkai webaptisi mia na Duainunung Mamarang pai.’1 Impaina Allai dong Duainunung Mamarang pai we nyontarai embe akama Yaudi wa pa parari doni we tata na awe tandoao Sen Yesus Kristusi pa, impaina topitotoi pa yongwido Allai e?” Na awe ya entarao piyana pa, ya aidisa interi etaparanding Allai etoyo, “Toyana mamo nyontarai we embe Yaudi wa paya tato Allai dong a pea we ya imbaro esanetaweri warui ene sasari pa interi etadu wieng ki woroi-woroi pa.”
Barnabasi kong Saulusi uronta to Antiokia
Na awe Stepanusia emuni ampa, nyontarai we etongkangkani we endoao Yesusi pa etadawa ya. Impaina we endoaoa paya embawu enaitatera na nu wau tantenang. Enaitatera sisu raora Fenisia, Siprusi kong bendari Antiokia. Mae ya embuwu Arera Weweng pai we nyontarai Yaudi paya ki.2 Mana na nyontarai we endoao paya, we na raora Siprusi kong Kirene embetotoi ya enda to Antiokia. Mae ya embuwu Arera We Wieng pai we nyontarai we embe akama Yunani paya, topino Yesusi wo Seni ina. Seni ne paya pa derua ya impaina nyontarai madupei yati endoaoa kong esanetaweri we Seni.
Impaina kawio parari piwe tawa na Antiokia pa kawasa na Yerusalemi pa entaraoa. Interi ya etami Barnabasi to Antiokia we reo ya. Na awe Barnabasi ria ampai i reo Allai dong Ne weweng dona pinoma pa we nyontarai nayana pa. I merarising mae kewio denyau ya imbaro endoaoa we Seni na tarai. Barnabasi ninipai wo anerarong pai weng mae Duainunung Mamarang pai yumaoi kong rioao Seni na pitarai, donane rai paya etua Seni. Interi Barnabasi ria to bendari Tarsusia we yerai Saulusi. I dedu Saulusi interi kio Saulusi to Antiokia, na yana unai puda-dediru pei tantenang kong jemaati pai mae uranyau nyontarai tau paya. Na Antiokia wo nyontarai we endoao Yesusi pa we retenang esau ya we nyontarai keresteng. Na ayana nyontarai nabi pa embetotoi enda na Yerusalemi to Antiokia ra. Koiri na nabi paya anong pei Agabusi, Duainunung Mamarang dong paya wei impaina kewio kakera doyo, “Na nunei tantenang ingkai piwawi baba pei tawa ki.” Ninane tawa napei Kaisari Klaudiusi riuwe mananu pa.3 Interi nyontarai we etua Yesusi paya engkai engkutua we empandui pe pea parari pitoai koiri-koiri enempa, mae etanatua we etimpata eneta we enaina Yudea paya. Apa yani etong pararia, interi etami Barnabasi kong Saulusi asaru ungko piwe etongkuirapa we weembedung we jemaati na Yudea paya.
Source notes (3)
- Cross-reference Kis. 1:5
- Cross-reference Kis. 8:1-4
- Cross-reference Kis. 21:10
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.