Pi Rasuri Enari 12

Rasuri pa ya etadu amuna baba na Herodesi

1Na a yani pai to mananu Herodesi dongkangkani nyontarai we endoao Kristusi na kangkuna. 2I deirora ne we empatari paya we emung Yakobusi, Yoanisi neta pai na sondu. 3Na awe Herodesi reo piwe tawa yanapa, waua nyontarai Yaudi pa esanerarong pa. Impaina i dong we moyawa yana ea. Interi demi ne we empatari paya entapu Petrusi ea. Piwe yanapa tawa na A Baba Roti Weragi Wa. 4Entapu Petrusi engkori to wangka rarong pai. Pimamuna pandura pe manua we etongwido Petrusi, pandura koiri mamo pimamuna pe embe manua. Herodesi anetatuata we a Paska paia kai mamo, i dutang kakewa Petrusi na nyontarai we empau paya endenawau.1 5Toyana pa Petrusi nyai na wangka rarong pai, mana nyontarai endoaoa paya entandau pitarai we Allai we Petrusi.

Petrusi meti warui wangka pa

6Kamai pai wami we Herodesi dutang waweri Petrusi na kawasa tau endenapa, diru yani Petrusi we piana etawiti na wai besipa wiata na pimamuna pa asaru une madupa na wangka rarong pai. Kong na aturarei pa tato pimamuna peaya etoa widori na yana. 7Interi na tantuma Seni ne mampang pei doa rurang Petrusi, mae wedea wadi wieria na mandarong wangka pai. Mampangpai waratia na Petrusi mae byauni doyo, “Towa moraru!” Na yanato wai besi etingkae Petrusi warang pa makakekutua. 8Mae mampang wadi kewio wei doyo, “Wosung asung pa kong woya sandari pa!” I dong pararia. Interi mampang wadi kewio wei ea doyo, “Wosung asung pampang pai mae bua yau!” 9Interi Petrusi dua mampang wadi toria mae i riuinari pitoai mampang wadi dona pa tarai tawato, i dorato we pi reoa pa parariapi demi. 10Na unda toripa ra sisu we etoa widori na retenang pa kong we kodu pa, mae undara uradu aturarei baba besi pina we tete bendari wadi. Na yana aturarei wadi esepari parariapi ea esepari we asaru. Piana umati nari wau to, interi unda sisu na rang kapung wadi mamo na tantuma mampang wadi nyai warui Petrusi. 11Interi Petrusi tentumao piwe piana tawa naipa mae kewio doyo, “Anei piana ereuaroana we Seni demi mampangnei pika yau warui Herodesi ne mambiri pa kong nyontarai Yaudi ene apa we esaipaya we yau pa.” 12Na awe Petrusi aneao piwe tawa pa, i ria wu Mariai, Yoanisi nyani ne manu paia, Yoanisi we esawi tato na Markusi. Na yana nyontarai madupei empandura mae entandau we Allai. 13Awe Petrusi ria dedu manu wadi, i so aturarei repong wadi impaina wawing mampata pei anong pei Rodei riama we reo matei so aturareipai pa. 14Petrusi doa weraupui na riwau, toyana wawing mampata wadi taraaroang Petrusi kewio towani, mana tutu merarising kia paina teweri to rarong we sopana wu nyontarai we empau nea we Petrusi doa na ri pa impaina perandeni yepa aturarei neipe. 15Interi ya engkawio we wawing wadi etoyo, “Au wowawipe!” Mana Rodei kewio kangkuna doyo, “Taraie, Petrusina!” Interi ya engkawio wei etoyo, “Mampang we deruari pinape.” 16Toyana pa Petrusi so aturarei wadi pampang interi nyontarai we empanduiya wau esepa aturarei kong endeoi, ya entantuma mae esarokutuya. 17Mana Petrusi dong kamang na warangpa weya imbaro endeo engkawio erape. Interi i kewio pararia weya topino Seni deruari meti tori warui wangka wadi. Mae i kewio doyo, “Mentopana we Yakobusi kong neta ea paya”, interi i meti ria to nu pea ea.

18Na kamai wadi pimamuna wau ya etutang waweria kia tutu piwe tawa na Petrusi pa. 19Interi Herodesi demi pimamuna paya eserai Petrusi, mana etadutiwa. Impaina demi etutangkakewa pimamuna we empata na wangkapai ya kong emusa. Interi Herodesi ria warui Yudea to Kaisarea mae nyaina wana.

Herodesi keda

20Mananu Herodesi keou kia we nyontarai na bendari Tirus kong Sidoni paya. Impaina ya engkai endama we eto esarota mananu Herodesi. Interi engkawio aya Blastusi tutu i wedung we Herodesi mandarong nempai, interi Blastusi anerarong sawa weya imbaro kewio ko Herodesi mamo, ya emadori kongti tutu ya wo roweang enempa etaduta na Herodesi raora nempa.

21Na apeana Herodesi kewio kamang we ingkai kewio we ne rai paya. Na ayani i yesung ne asung mananu pa, meoina ne pata mananupa mae kewio weya. 22Kawasa we entarao Herodesi ne kawio pa emararising mae etoyo, “Nina wo nyondaupui piami dina, mae nyondaupui nyontarai watang dina wa!” 23Na ayani to Seni ne mampangpai riora Herodesi tutu i yomi we Allai wa, impaina piaorapa etania keda.

24Impaina Allai ne Arera pa embuwua tate nu pa mae nyontarai pa madupei endoao Allai. 25Barnabasi kong Saulusi urong mariwapa ra kaipa, mamo untaweri na Yerusalemi kong ungko Yoanisi we esawi na Markusi ria kong asaru.