Alkitab Bahasa Ansus
Pi Rasuri Enari 13
Etiri kong etanatu Barnabasi kong Saulusi
Na a yani, na jemaati Antiokia pai, nabi pe embetotoi kong kuru pe embetotoi, aino Barnabasi kong Simoni we esawi Bometani, Lukiusi nyontarai Kirene pai, Saulusi, Manaheni we eteuni kong mananu Herodesi. Na awe embenadi we Seni kong embe puasa pa, Duainunung Mamarang pai riama kewio weya doyo, “Metiri Barnabasi kong Saulusi asaru we Yau, imbaro asaru unduwai mariwa we piana Yona we asaru we ingkai undupa.” Impaina embepuasa kong entandau mae enduwa embarami etimbarawawu asaru interi etami asaru unda.
Saulusi kong Barnabasi asaru na nutakutu Siprusi
Tutu Duainunung Mamarang pai demi Barnabasi kong Saulusi asaru paina, usa to Seleukia arau. Na wana urapai to nutakutu Siprusi. Na awe uradu bendari Salamisi pa, asaru umbuwu Allai ne Arera pa na manu Yaudi esomi na pa. Yoanisi we esawi tato we Markusipai ria kong asaru we piata asaru. Itondawari nutakutu paia sisu bendari Paposi. Na yana itoradu nyontarai Yaudi pei anong pei Baryesusi. I dedu paya na Nyombatangpai kong i wo nabi tarai dina wa. I wo maneta we piata Sergius Paulusi, gubernuri na nu takutu yani, i wo anemainuanung. Gubernuripai yau Barnabasi kong Saulusi asaru tutu do tarao Allai ne Arera pa. Mana Elimasi we anong na kawio Yunani mamo Baryesusi we ne paya na nyombatangpai dongwido Barnabasi kong Saulusi asaru, imbaromi gubernuri na nutakutupai reo rioao Yesusi pe. Mana Saulusi we esawi we Paulusipai Duainunung Mamarang pai yumaoi paina doa yeori. Interi kewio wei doyo, “Auwo kumai nyombatang di au, au weangkakari barui, au wemarowa we weuna pa. Pitoi dona mamo bongwawido Allai ne anetatuata we periri nyontarai neya pae? Interi remua Seni dong mambabati o au! Au ingkai rempipu, mae remuao wo pai ne aikarare peawa ape bototoi ea.” Na yana pato Elimasi ruradiduing na rekami pa parariapi piwe mietang yekowi ma kewung rekamipa, impaina ria deka-aera we yerai nyontarai we riupatari. Na awe kubernuri pai reao piwe tawa yanapa, i rioao Yesusi, wo retantuma tarai Seni ne anyau pai.
Paulusi kong Barnabasi unda to Antiokia na raora Pisidia
Interi na Paposi, Paulusi kong neta paya etapaikutua na kapari pai, interi enda to Perga na raora Pampilia. Na yana Yoanisi we esawi Markusi pai ria warui asaru mae teweri to Yerusalemi. Na Perga Paulusi kong Barnabasi unda pampang to Antiokia na nu Pisidia pai. Na a Sabati pai unda umayoi na manu Yaudi esomi nai pai. Na awe etato Weraung Mamarang na nabi paya entoi pa kong parari Kawio we Musai soi pa rakai, we embedung we manu Yaudi esomi nai pai ya esoretuwa nyontarai peaya etutang Paulusi kong we endakonti paya etoyo, “Manetapa mia parari mene pianyau pea we nyontarai nina ya mamo, katu mentopanato!” Paulusi tewara doa riuwa warang pai interi kewio doyo, “Maneta nyontarai Israeli pa mia kong neta neu Yaudi wa pa mia we mematai Sen Allai pa, mentarama! Allai nyontarai Israeli pai, piana diri tantapumi woria paya, kong nyari ya empau ea na awe enaina Mesiri we nyontarai ea pea embei ya. Na warang we mambiri pa kio ya emati warui kakopa Mesiri pai.1 Allai aidini retantawang pitau we etonapa na mapang pai woroi pudape piakodu pa.2 Marandang pe boitu we ene nupa na kakopa Kanaani pai, Allai miung ya ra engkai warui raora Kanaani, mae wiwo raora yana we kawasa Israeli paya imbaromi etaduta we ene.3 Na awe embiwo kakopa Kanania eampa, Allai dona we ya mananu esau ya we Hakimi we embe mananu weya puda pe piaura we kodu ea piakodu ea ura (450), kiao awe Semueli we nabi pa.4 Interi ya etewara we mananu pei. Impaina Allai dong Sauli we mananu weya. I riu mananupa pudape pia kodu. Sauli nini tamani anong pei Kisi. I riana marandang Benyamini nempai.5 Na awe Allai pika Sauli warui we mananupa, I riuwa Dauti we mananu we Israeli paya. Mae Dauti nini pai, Allai piana sopang parari na pampong pa doyo, ‘Yau yedu Isai ne kumai Dauti eampa to, we i kio aneurarongnei kong dong parari piwe aneutatuata pa na wemai.’ 6 Na Dauti ne tapumi woriai wanea, Allai piana riuwa Mananu Mampariri pai we nyontarai Israeli neya parari ne kawio derekamana pa. Yatino Yesusi andi we Mananu Mampariri pa. Yesusi riuwa ne mariwa pa wami, piana Yoanisi yau we nyontarai Israeli paya imbaromi ya esanetaweri warui sasari enempa kong embebaptisi.7 Yoanesi mariwa we riupa ra do kaipa, kewio doyo, ‘Mesanetatuata we matei di yau pa e? Yau wo Mesiasi metamamani pi di yau wa, mana katea katu I ingkai riama pa. Nyontarai yani eyepa ne sandari pa mamo emaiwa.’8
E, neu neta na Abrami ne mandarongpai mia kong neu neta Yaudi wa we mematai Allai pa mia kuira. Allai piana dong ne kawio we kio pariripa we tata to. Wo nyontarai tau we enai na Yerusalemi kong ene mananu paya endoa we Yesusi wo Mananu Mampariri pai dina wa. Anyau na nabi paya anemai na Sabati pa etatora pa entapu wa, impaina ya etong mambabati kaida pa we Yesusi. Mana na pi enari toyana pa, aidonane pitoai na pampongpa nabi paya engkawio kakerapa nina wo piana parariato. Topitotoi ya etadu piwe dosarara pea wa na Yesusi, we dedu mambabatio kaida pai, mana ya wo etewara kangkuna we Pilatusi we imbaro I emunia keda.9 Kong etong parari piwe entoi na Weraung Mamarang pai rarong parari I pa kuira akai, ya etong netarai we kedapai toung warui aitabapai mae engkoria wiata na kambirei esirai we aisata na wi we kamipa. Mana Allai doni wieng taweri warui kaidapai. 10 Na a peara woroi anto I ria denyawi netarai pai we nyontarai we piana enda konti na Galilea to Yerusalemi pa. Yati nina mamo embe saksi tutu I we rai Israeli paya pa. Impaina nina mamo amambuwu kawio we weng yani pai we mia; pitoai Allai derekamana we tantapumi woriai paya pa, 11 piyana I dona we tata na dong Yesusi wieng taweri ea warui kaida pai. Wo na weraung mamarang Masmuri kodu we entoi topino,
‘Auwo Neu Kumai di Au.
Na a nini Yau wo piana ewe Tamamui pa.’ 12
Allai piana doni wieng taweri warui kaida pai. Nina I wo netarai pai tepapising na aisata rarong eawa; weo piana Allai kewio doyo,
‘Yau ingkai yona we mia arera we mamarang we ingkai yona pararia we piana yerekamani we Dauti pa.’ 13
Topiana tato na rirang pea kewiora topino,
‘Au pika Nemu Woming Memarang pai wiatara tepapesing na aisata pa rarong wa.’
Dauti piana nyari piwe Allai demi nyari pa na wemaito, interi keda tato kong ne tapumi woriai mae esirai na aisata pai. Kong ne taraipai piana tepapesing kiaito. Mana Yesusi we Allai doni wieng taweri warui kaida pai, Yesusi yani paiwo tepapesing wa. Impaina netapa mia, topitotoi pa amambuwua we na Yesusi memeari sasari tane nei dupirandeni pa. Kong naina I nyontarai we endoaoa paya koiri-koiri dedu pariri warui sasari pa, we metaduta wa na Kawio we Musai pai. Impaina mendekakepana aiwara, imbaro donane metadu piwe nabi paya entopanapa pe, pi entopana etoyo, 14
‘Mendekakepana pitarai nyontarai we mengkawio mengkakani nyontarai pa mia!
Ingkai tawa tantuma mae mengkada!
Wo na puda dediru nini pai Yau enari pianea we mia.
Pi we ingkai mendoaoa wa Kong nyontarai pei sopana we miaki mana mendoaoa wa.’ ”
Na awe Paulusi kong Barnabasi unda tori warui manu we esomi nai pai, nyontarai tau etewara kong asaru imbaro untaweri ma na a Sabati we riama wanei untopang parari anyau yana pa ea. Interi embe nadi akaipa, nyontarai Yaudi paya kong nyontarai ea ya, yawo nyontarai Yaudi diya wa, mana esua akama Yaudi. Empau kia enda kong Paulusi kong Barnabasi. Impaina rasuri pa asaru uranyau ya imbaro endu Sen Allai ne weweng dona pinoma pa ra maitui.
Na a Sabati eampai wareto nyontarai tau na bendari yani enda engkaima entarao Allai ne Arera pa. Mana nyontarai Yaudi pa endeo nyontarai we empau paya, ya esaneung we rasuri pa asaru wa. Impaina ya entatipa Paulusi kong embateta kawio we sopana pa. Mana na umataiwa, Paulusi kong Barnabasi ungkawio kangkuna uroyo, “Allai ne Arera we topitotoi kia umbuwua we mia pampong wo, mana memaidai metaduta kong mesaneaoa wa, impaina mantaung mia mengkutu we metadu wieng ki woroi-woroi pa wa. Aidonapa na a ninipai amampika mia, amanda wu kawasa pea weiya. 15 Wo, Seni dongkawio we ama, kewio doyo,
‘Yau piana ekawio kamana we au wepadamara wedea kawasa Yaudi wa paya,
imbaro ko pariripa we nunei tantenang.’ ”
Na awe nyontarai Yaudi wa pa entaraoa pi yana pa, ya emararising kia mae etaparanding Allai ne Arera pa. Kong nyontarai we piana Allai diri ya we etadu we wieng kio woroi-woroi pa, ya endoaoa. Interi Seni ne Arera pa embuwua na nunei tantenang.
Nyontarai Yaudi engkawio aya wawing pampong peaya we piana ematai Allai, kong mananu baba na bendari yani, mae etong kangkania we Paulusi kong Barnabasi mae etadawa asaru warui raora yani. 16 Interi Paulusi kong Barnabasi untatai wawu na usaebampa we urisua nyontarai paya, mae unda to Ikoniumia. Na Antiokia we etua Yesusi paya emararising kia kong Duainunung Mamarangpai Yumao ya.
Source notes (16)
- Cross-reference Kel. 1:7, 12:51
- Cross-reference Ul. 1:31
- Cross-reference Ul. 7:1
- Cross-reference Hak. 2:16; 1Sam. 3:20
- Cross-reference 1Sam. 10:17-21
- Cross-reference 1Sam. 13:14; Mzm. 89:21
- Cross-reference Luk. 3:3
- Cross-reference Yoh. 1:20,27
- Cross-reference Mat. 27:22-23,57-61
- Cross-reference Kis. 1:3
- Cross-reference Mzm. 2:7
- Cross-reference Yes. 55:3
- Cross-reference Mzm. 16:10
- Cross-reference Hab. 1:5
- Cross-reference Yes. 49:6
- Cross-reference Mat. 10:14
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.