Pi Rasuri Enari 14

Paulusi kong Barnabasi Na Bendari Ikoniumi

1Paulusi kong Barnabasi urong piwe mai kia na Ikoniumi pa tato, aino asaru unda wu manu Yaudi esominai pai, uranyau Kawio Mamarang pa na wengkia impaina nyontarai Yaudi madu peaya kong Yaudi wa pa endoaoa we Yesusi. 2Mana nyontarai Yaudi we entampi rasuri pa asaru une anyaupa, endara engkawio aya nyontarai embe Yaudi wa pa, imbaromi engkayou nyontarai we endoao Yesusi paya. 3Topiana pa mamo Paulusi kong Barnabasi unai manyona pei na yana pa. Mae asaru ungkawio na we mambiri tutu undoao Seni. Impaina Seni dong ne paya pa we asaru we unari pi aneaerai pa kong pi tantuma pa. 4Mana kawasa taubai na bendari pai mamo empibau ya we pandura pe kodu; ea aino esaneweng nyontarai Yaudi wauya kong ea ya tato esaneweng rasuri wau asaru. 5Interi nyontarai Yaudi paya kong ene mananu paya kuira kong nyontarai we embe Yaudi wa paya, engkawio mai we etong pampinong rasuri pa asaru kong eso asaru na kami. 6Mana rasuri pa asaru usanetatua piyana pa, interi umbawu aididina to Listra kong Derbe, aino bendari na Likaonia, mae raora na yana pato. 7Na wanapa asaru umbuwu Arera Weweng pai ea.

Na Listra kong Derbe

8Na Listra mamo nyontarai muang pei aengpa paya na nyani meyoituturi pa, impaina i wo ria wa, wo aengpa mararua. 9Nyontarai we piaya yani pai meyoi na yana pa tarao Paulusi kewio pa. Paulusi reoi kong rearoani topino i wo aneaoa kia impaina Paulusi doni penang. 10Impaina Paulusi kewio kangkuna wei doyo, “Towa boa tera!” Nyontarai piaya pai keikoparia doa, interi ria towana-tonina. 11Na awe nyontarai taubai paya endeo piwe Paulusi donapa, impaina etanana na kawio Likaonia: etoyo, “Nyombatangnai piana embia to nunei enetaraipa perari nyontarai.” 12Interi Barnabasi esawi anong pei Seusi mae Paulusi esawi anong pei Hermesi tutu andi kewio pa. 13Nyombatanai Seusi ne manu esomi wei nai pai wiata na bendari ri wane. Ne imami pai kio sapi muang peaya kong pimaranding we enari na aibopu pei to aturarei baba na bendari pai we dona pikika we rasuri pa asaru kong we empaupa pikika enempa. 14Na awe Paulusi kong Barnabasi untarao piwe nyontarai paya etona we asaru pa, ungkayou kia. Asaru usakoya asung unempa mae urapai to kawasa pa ene madupa, ungkawio na nyondaupui baba we ya uroyo, 15“Eh! Pitoai metona tonina pae? Andu wo nyontarai di andu tato parari maneta pa mia! Andu unai na ninane we umbuwu Arera Weweng pa we mia imbaro mempika piwe unawa nina mae mesanetaweri wu Allai we wieng pai. Andi nyari rorapai, nunei, rawanang rau kong pitaubai we nyai na pa. 16Na awe rampa mamo Allai pika kawasa paya etong parari piwe mantau esaneaoa pa. 17Mana Allai perandeni wa we denyawi netara pai na ne weweng we dona pa. Weweng yana denyawa na dong mamang miuna na rora we yeraru kakopa pa kong dong marepio pitantanang pa webong. Kong dong roweang we mia kong dong mesanerarong pa mararising.” 18Toyana rasuri pa asaru ungkawio pitau yana ki, mana kawio we untopana pa uraini ya tutu pikika we eto etona we asaru pa wa.

19Mana nyontarai Yaudi pe embetotoi na bendari Antiokia na raora Pisidia kong Ikoniumi enda to Ristra, interi ya engkawio aya nyontarai we empau we engkosa. Impaina ya eso Paulusi na kami, ya etorato piana kedato impiana empapari tori warui bendari wadi, 20mana awe nyontarai we endoaoa paya etoa wari pa, i tewa mae yua to bendari wadi. Kamai wadi i kong Barnabasi uronta to Derbe.

Paulusi kong Barnabasi untaweri to Antiokia

21Na yana, Paulusi kong Barnabasi umbuwu Arera Weweng pa mae nyontarai taubai endoaoa we Yesusi. Interi untaweri ea to Listra, Ikoniumi kong Antiokia na raora Pisidia. 22Na bendari wadi ungkawio usua nyontarai etua Yesusi pa, kong ungkawio kangkuna we ya imbaro endoao Yesusi pitarai. Kong uroyo, “Tatoyo tasua to Allai ne riu we Mananu pa mamo andi tatadu uira pitaubai wo.” 23Kong na jemaati pa, rasuri pa asaru unduwa nyontarai peaya we embedung na jemaati na yana na bendari undaoa pa. Interi untandau kong umbe puasa we urong we embedung na jemaati paya wu Seni. 24Interi unda topong rire raora Pisidia tantenang kong ra sisu na raora Pampilia. 25Na yana piana embuwu Allai ne Arera pa na bendari Perga, interi ya enda to Atalia. 26Na yana usataweri to Antiokia. Bendari ninipai di na pampong pa etong asaru we Allai ne weweng dona pinoma pa, we unduwa Ne mariwa pa we piana urona rakai pa nina. 27Na awe uronta ra sisu yanapa mamo usau jemaati paya ma empandura, interi asaru ungkawio parari pitau we Allai dona tawa na asaru pa. Kong I yepa aturarei we kawasa peaya imbaro endoao Yesusi konta. 28Na bendari yani Paulusi kong Barnabasi unai woroi kuira kong nyontarai endoaoa paya.