Pi Rasuri Enari 15

Mayoi sidang baba na Yerusalemi

1Nyontarai Yaudi we endoao Yesusi pe embetotoi enda na Yudea to Antiokia mae etanyau nyontarai we endoao Yesusi na yana pa etoyo, “Topitotoi mamo andi membesunati parari pitoai kanang Musai soi pa, wereria mamo metadu pariripa wa.”1 2Paulusi kong Barnabasi umbateta nyontarai pa ene anyau pa na kangkuna. Impaina nyontarai endoaoa paya engkutua we Paulusi kong Barnabasi kong nyontarai peaya na kawasa na Antiokia we endawu rasuri paya kong we embedung na Yerusalemi paya imbaro engkawio parari piwe tawa yana. 3Interi jemaati na Antiokia endatutu ya to bendari ri wadia, interi ya enda rire Penisia kong Samaria. Mae na nu yani ya entopana we nyontarai endoaoa na yana pa, parari Yaudi wa we piana esanetaweri warui ene sasaripa kong endoao Yesusi. Piyana pa donane eneta we endoaoa na yana pa emararising kia. 4Endara sisu Yerusalemi mamo jemaati na yana pa, rasuri paya kong we embedung we jemaati paya etamamang weya na wepiboki. Interi rasuri pa asaru ungkawio parari pitau we Allai nyari na asaru we Yaudi wa paya. 5Mana nyontarai pe embetotoi na pandura nyontarai embe Farisi we piana endoaoa paya, etoa engkawio etoyo: “Nyontarai we embe Yaudi wa pa andi embesunati ya kong etong parari Kawio we Musai pa.”

6Toyana pa rasuri kong we embedung we jemaati paya empanduiya engkawio parari piyana. 7Emayoi engkawio we piyana saraka riora bototoi anto, interi Petrusi tewa doa kewio weya doyo, “Eh netapa mia, mia piana mantau mendeoa to, wo na retenang pa Allai diri yau na mia, imbaromi ewuwu ne Arera Weweng pai we nyontarai we embe Yaudi wa pa imbaro entarao arera yana kong endoaoa.2 8Kong Allai we rearoang nyontarai ne esanerarong pai, piana denyawa we demang weya na wemai. Piyana pa I denyawa na dong Duainunung Mamarang pai we ya parari dona we tata pa.3 9Allai pi we nyari we nyontarai ne tata pa mai kuira. Tutu ya endoaoi impaina Seni rioipapi esanerarongpai parari pitoai nyari we tata pa. 10Impaina pitoi donane mia mentou Allai na metami nyontarai we endoao Yesusi paya etong parari kawio we memba we mentopana yana. Mana tantapumi woriaipa ma sisu tata ninane tatong pararia na we pitarai wa. 11Mae tata tandoaoa kong tatadu pariri pa tutu Sen Yesusi ne weweng dona pinoma we tata pa, toyana tato we ya konta.” 12Impaina kawasa paya aidisa interi ya entarao Paulusi kong Barnabasi ungkawio parari piwe aneaerai kong piwe tawa tantuma we Allai nyari na asaru we nyontarai we embe Yaudi wa wauya pa. 13Na Paulusi kong Barnabasi ungkawio akaipa, Yakobusi kewio doyo, “Netapa mia mentarao yau: 14Simoni katene kewio pararia topino Allai ne wewengpa we kawasa embe Yaudi wa, yatino diri nyontarai peaya na nyontarai Yaudi wa paya, we ingkai yau ya we ne nyontarai. 15Pi yanapa parari we nabi paya entoi kamana na weraung mamarang pai:

16Seni kewio doyo, ‘Interi Yau ingkai etaweri ema

kong enari Dauti ne manu we piana wemunamunai pai,

kong enari doa tera taweri;4

17imbaromi nyontarai tau we esea nea eserai Seni,

ya engkong kawasa we embe Yaudi wa paya we piana Yiri ya etua Yau.’ Seni kewio toyana,

18we piana sopang pi yana na pampong pato.”

19Interi Yakobusi kewio naria ea doyo, “Impaina na yau mamo, tandeo tatong nyontarai we embe Yaudi wa nea esaseung we endoaoa kong entaweri wu Allai pe, 20mana tatawo tantoi arera pea weya, imbaromi ya endeo etang roweang we etona etisomi nyombatangnai pai kong endeo etong maniniawari kong endeo etang pieung we emung ya mae riapa nayapa pe.5 21Wo na awe rampa kawio we Musai soipa, anemai na a Sabati pai etatora pampang na manu Yaudi esominai pa na bendari pa tantenang.”

Weraung we nyontarai Yaudi wa we piana endoaoa.

22Toyana rasuri pa kong we embedung na jemaati paya tapu nyontarai tau pa, engkutu we etiri nyontarai pe embetotoi we endato Antiokia tapu Paulusi kong Barnabasi. Impaina etiri Yudasi we esawi Barsabasi kong Sirasi. Asaruwo endearoana we umai na nyontarai we endoaoa paya. 23Interi entoi arera pei weya we riotu topinina:

“We netapa mia na kawasa ea pa we membe Yaudi wa, we menai na Antiokia, Siria kong Kilikia.

Tabea we rana rasuri kong we embedung ne ama, aino meneta pa ama.

24Amawo piana amantaraoa we nyontarai pe embetotoi na ama, endama etanyau anyau wetarai wa we mia, mana yawo amatami ya wa. 25Pi yanapa donane amangkutua we amatiri nyontarai pe embetotoi we mia kong amaneta Barnabasi kong Paulusi we amasanewiwu asaru pa. 26Nyontarai kodu ni asaru wo piana umpika unduainunung pai we Seni tutu Yesus Kristusi anong pa. 27Impaina amawo piana amatami Yudasi kong Sirasi we maneta pa mia, asaru ingkai utopana konta we mia parari piwe amantoi na weraung nini pai we mia pa. 28Na Duainunung Mamarang pai ne paya pa, amangkutua we amamaidai amatong mia metong parari mambabati mamba warui we ingkai we metonapa pe. 29Aino: mia wo metang roweang we etisomi nyombatangnai pa pe, metang ria pe, metang pieung tarai we riapa matiwa kong mendeo menari piwe maniniawari pe. Topino mia meteung menetaraipa warui piyana pa mamo metong parari we mai pa peina.

Topiana wo, mae tabea we mia.”

30Etopang tabea we ya rakai pa, we etamiya pa enda to Antiokia. Na yana esau jemaati paya empandu ya interi etong weraung wadi we ya. 31Jemaati pai emararising tutu etato arera we wana weraung wadi wiaua ya. 32Yudasi kong Silasi nabi di asaru tato, na a yani ungkawio uranyau uneta we endoaoa paya manyona pei kong urong ya esanemangkusi. 33Mae unai nayana manyona pei, uneta paya empika asaru na wemadori interi untaweri wu nyontarai we etami asaru pa ea. [ 34Mana Silasi kiutu we do nyaina yana.]

Paulusi kong Barnabasi Untatera

35Paulusi kong Barnabasi unai woroi ape bototoi na Antiokia. Asaru ungkong nyontarai we empau peaya etanyau kong embuwu Seni ne Arera pa. 36Mana ape bototoi ea interi Paulusi kewio we Barnabasi doyo, “Weng peino tuntaweri wu tuneta na bendari wanea, we piana pampong pa tumbuwu Seni ne Arera pai we tundeo topitotoi pi naya pa.” 37Interi Barnabasi anewe kio Yoanisi we esawi Markusi pai. 38Mana Paulusi do moyawa we kio Markusi, we meidai meriwa kong asaru kong pika asaru na Pamfilia pa.6 39Impaina Paulusi kong Barnabasi ungkayou asaru mae umbeyeya: Barnabasi kio Markusi mae uronta to Siprusi. 40Mana Paulusi tato diri Silasi we donta konti interi neta paya etong asaru to Seni ne weweng dona pinoma pa. 41Asaru undawari Siria kong Kilikia, na wana umpata jemaati paya imbaro endoaoa kangkuna.