Skip to content
BibleKenya

Alkitab Bahasa Ansus

Pi Rasuri Enari 16

Timotiusi riakong Paulusi kong Silasi

Paulusi ria pampang to Derbe kong to Listra. Na yana nyontarai we duara Yesusi anong pei Timotiusi; nyani wo nyontarai Yaudi we piana rioao Yesusi, mae tamani wo nyontarai Yunani dina. Na Listra kong Ikoniumi mamo nyontarai endoaoa paya endearoang Timotiusi nyontarai we mei dina. Paulusi anewe Timotiusi duari; impaina i wesunati Timotiusi. I dong piyana tutu nyontarai Yaudi na raora yani paya, ereuaroana we Timotiusi tamani wo nyontarai Yunani dina.

Paulusi wiera to Makedonia

Paulusi kong neta pa asaru, itonda waria na bendari pei to bendari pei ea, mae itontopana parari kawio we rasuri pa kong we embedung na Yerusalemi paya engkutua pa, imbaro jemaati pa etong pararia. Topiana jemaati paya endoaoa pa maitui ea kong anemai mamo empau ea.

Duainunung Mamarang yuara we Paulusi kong Silasi asaru we umbuwu Arera Weweng pai na Asia pe. Impaina itonda waria na raora Prigia kong Galatia. Na awe itonda sisu na raora we dapii Misia pai, eto esua to raora Bitinia, mana Yesusi Duainunung pai Yua ya we esua to wana pe. Impaina ya enda rire raora Misia topong ki sisu na Troasi. Na diru yani pai Paulusi reo pianyawa pei, i reo nyontarai Makedonia pei doa na renawau mae kewio doyo, “Ruakutuama we puata ama!” Paulusi reo pianyawa yani paia, kamai pai amanduasasoni we amandato Makedonia. Tutu amandoaoa we Allai di yau ama we amambuwu ne Arera Weweng nei we nyontarai na wana paya pa. Interi amampika Troasi mae amatapai to Samotrake, mae kamai wadi amampapa na Neapolisi. Na yana amandatorei to bendari Pilipi, bendari retenang na raora Makedonia pina. Bendari nini piana nyontarai Roma enainaito kong etongwawidori. Amanai ape bototoi na yana.

Paulusi na Pilipi

Na a Sabati pai amanda to maria arawa na aturarei baba ri na bendari wadi, tutu ama amanduradiduing we na yana nu we nyontarai Yaudi entandau nai pei rai. Interi amamayoi amangkawio kong wawing we empandura na nu yani. Nyontarai wawing pei na ya, i wo wawing we dewayang irei we keu, anong pei Lidiai mae ria na Tiatira ma. I anewiwu we Allai, impaina Seni yepa anerarong pai imbaro yewawa anyau we Paulusi sopana pa. Impaina Lidiai kong ne mandarong pai embebaptisi. Interi dewa ama, doyo, “Netapa mia mendearoana pitarai we piana eroao Yesusi mamo, mendama memayoi kong yau na neu manu nei.” Interi i deirora imbaro amatong parari piwe dewara pa.

Na apeana amanda to nu we entandau nai pai, amatadu woming wawing pei. Wawing yani semi-semi pai dawi impaina kewio kakera piwe ingkai tawa pa. Na pidona pa kio pe pau we ne tuang paya. Wawing wadi dua Paulusi kong andu mae kewio yeau kangkuna doyo, “Nyontarai nisa wo Allai ne woming we Entadai raweina di ya! Ya endama entopana we neta pa mia, rang we metadu pariri pa.” Pi yanapa wawing wadi dona woroi we ape bototoi to. Impaina Paulusi demioming paina reweria kewio we semi-semi pai doyo, “Na Yesus Kristusi anompa yemi au moti warui wawing nini.” Na yanato semi-semi pai meti warui.

Wewedung we wangka Pilipi

Na awe wawing wadi ne tuang paya endeoa we piwe esanesara we etingtadu pe weya pa nai warui ya pa to, impaina ya entapu Paulusi kong Silasi, interi empapa asaru to mananu parenta endena wau na nu awayang we kekawiri na bendari wadi. Ya engko Paulusi kong Silasi asaru we mananu parenta Roma paya, interi engkawio etoyo, “Nyontarai nini asaru wo nyontarai Yaudi di asaru. Ya etong amuna na bendari tane nei. Mae asaru uranyau kanang we bia tane mamba Roma nei pa. Kanang yani wo tataduti ete tatong parari wa.” Nyontarai we empau paya tato embateta Paulusi kong Silasi. Interi mananu parenta paya entami nyontarai peaya esayabu une asung pa warui unetarai pa interi endaruba asaru na karipiapa. Piana ya endaruba kangkung asarua kaipa, ya eso asaru to wangka rarong pai. Mae etami we wedung na wangka wadi rekakepang asaru na pitarai. Impaina we wedung we wangka wadi riukepang asaru na mandarong wangka rarong wiri puidi, mae rerai aitamu na usaemi wau. Wa diru rabuang to Paulusi kong Silasi untandau kong undoi uraparanding Allai. Nyontarai we na wangka wau ya entarao undoipa. Na tantuma mundi we piaya era, ki kakopa wawong na wangka wadi medidou. Aturarei tau na wangka wau tapapa kong wai rante besi we etingkae nyontarai na wangka paya makaketua. We wedung na wangka wadi tentuma tewa. Awe reo aturarei na wangka pa tapapa, i piating sondu we miung waweri tutu i dorato nyontarai na wangka paya piana etapai engkaito. Mana Paulusi denana kangkuna doyo, “Remo mung aupe! Wo amangkai amati nina rai!” Wewedung na wangka wadi dewa padamara pei interi depai to rarong, mae na didora i meoi aebu na Paulusi kong Silasi undena wau. Interi i kio asaru tori mae kewio doyo, “Tuani e maru! Pitoai eyona imbaro yedu pariri pa e?” Paurusi kong Silasi ungkawio uroyo, “Roaoa we Sen Yesusi! Au ingkai bodu pariri pa, au kong nyontarai we na nemu mandarong pai kiai.” Interi Paurusi kong Silasi untopang parari Seni ne Arera pa we wewedung na wangka wadi kong we nyontarai tau we na manu neng wadi. Na a yani pai to wewedung na wangka wadi kio asaru mae dongpapi une kapapowau. Na yana tato i kong nyontarai tau we na ne manu wadi ya embebaptisi. Interi i kio Paulusi kong Silasi asaru wu ne manu wadia mae dong roweang pea we asaru. I kong ne mandarong pai emararising tutu ninane ya endoaoa we Allai paina. Kamai wadi, mananu parenta Roma paya etami purisi we endupi na yana embetotoi enda wu wangka wadi we empika Paulusi kong Silasi. Wewedung na wangka wadi pempang kawio pa we Paulusi. I doyo, “Mananu parenta paya piana etamia we empika maru. Impaina nina wo mumati tori kong munda na wepiboki to!” Mana Paulusi kewio we purisi wadi doyo, “Andu wo nyontarai Roma di andu. Ya etutang kakewa andu wa, mana piana endaruba andu na nyontarai ene madu pa na endena wau kong eso andu to wangka rarong nei. Mae ninane ya eto etongpika andu na aididinae? Andu umaidai! Mia metami mananu parenta pa mantau ya endama empika andu.” Purisi wau entopangweroana we mananu parenta Roma paya. Topiyana mananu wauya entaraoa we Paulusi kong Silasi asaruwo nyontarai Roma di asaru, impaina ematai kia. Interi ya enda esomi we Paulusi kong Silasi tutu piwe etosarara we asaru pa. Topiana ya endatutu asaru tori warui wangka wadi, kong etewara imbaro unda warui bendari wadi. Na yana Paulusi kong Silasi umpika wangka wadi interi unda to manu Lidiai neng wadi. Piana umpandura kong nyontarai we endoaoa pa na yana, mae uranyau ya imbaro endoaoa pa maitui, interi Paulusi kong Silasi uronta warui bendari wadi.

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.