Pi Rasuri Enari 17

Nyontarai Yaudi na Tesalonika etauamuna

1Paulusi kong Silasi unda topong rire Ampipolisi kong Apolonia interi unda usua na Tesalonika. Na wana manu Yaudi esomi nai pei. 2Interi Paulusi ria wu manu we esomi nai pai, parari we dona na nu ea pa. Na yana kewio kong nyontarai Yaudi wauya parari Weraung Mamarang pai. I nyari piyana pa taituwari na a Sabati pe botoru. 3Na rirang Weraung Mamarang pai, i kewio kong denyauwa weya parari Mananu Mampariri we Allai derekamani pai, we ingkai andi dedu uira ki keda kong suwi warui kaidapai. Paulusi kewio topong doyo, “Yesusi we ekawiori we mia nini pai di Mananu Mampariri we Allai derekamini pina.” 4Nyontarai Yaudi pe embetotoi na yana endoaoa kong entua Paulusi kong Sirasi asaru. Kong nyontarai Yunani taubai we ematai Allai paya kong wawing pampong peaya na yana tato, ea kuira etua Paulusi kong Silasi asaru. 5Mana nyontarai Yaudi paya esanekayowi kia na esanerarong. Ya esau nyontarai we emamuna we anemai mamo emayoi pampinoma na manu awayang wane. Imbaro embateta Paulusi kong Silasi asaru. Interi ya etong amuna na bendari wadi kuira mae esabu Yasoni manu nempai we eserai Paulusi kong Silasi asaru na yana, we empapa asaru wu nyontarai empau paya endenawau. 6Mana etadu Paulusi kong Silasi asaru wa, impaina ya empapa Yasoni kong nyontarai we endoaoa pa embe totoi to parenta baba na bendari yani mae esayau etoyo, “Nyontarai nisaya wo etoamuna na nupa totoi ea, nina wo bendari tane nei endamaoi to. 7Kong Yasoni piana pendukui ya na ne manupai. Ya engkai etosara piwe kaisari Roma kemang pa tutu ya etoyo mananu ei pei yatino Yesusi.” 8Na kawio we entopana yana donane nyontarai madu pei kong we embedung na bendari yani pai yuira kia. 9Mana mananu paya etami Yasoni kong nyontarai we endoao Allai paya embai pe pa we etingpariri imbaromi empika ya.

Paulusi kong Silasi na Berea

10Na diru yani pai tato, nyontarai endoaoa na bendari yani pai etami Paulusi kong Silasi unda to Berea. Unda sisu nu yani Paulusi kong Silasi unda wu manu Yaudi esomi nai pai nayana. 11Nyontarai Yaudi we enai na Berea paya esanerarong pa wengkia warui nyontarai Yaudi we enai na Tesalonika paya. Na esanerarong we mararising entarao arera parari Yesusi pa, kong anemai ya esaneatori Weraung Mamarang pai we etintatua anyau Paulusi sopana pa wepitarai ete wereriae. 12Impaina madu peayati nayana endoao Yesusi kong nyontarai Yunani empau kia we embe pampong paya endoaoa, wawing kong muang. 13Na awe nyontarai Yaudi we enai na Tesalonika paya entaraoa we Paulusi sopang Allai ne Arera pa na Berea, impaina ya enda to Berea ma we engkawio aya nyontarai tau paya kong etong ya esanerarongpa yai. 14Mana nyontarai na Berea paya endatutu Paulusi to kareng rau mana Silasi kong Timotiusi unai na Berea. 15We etua Paulusi paya etadung ya sisu Atena interi entaweri to Berea mae engko arera we Paulusi sopana wu Silasi kong Timotiusi asaru imbaro unda tuwari umararu.

Paulusi na Atena

16Paulusi demang Silasi kong Timotiusi asaru na Atena toyana, mana i anerarongpai yai tutu reo bendari yani pai donung na nyombatangnai paya. 17Aidona pa na manu Yaudi esominai pai Paulusi nini riwang kawio pa kong nyontarai Yaudi kong nyontarai Yaudi wa we esomi we Allai paya. Toyana tato na manu awayang pai, anemai mamo riwang kawio pa kong we dedu ya na yana pa. 18Kuru we entanyau Epikorusi ne anyau pa kong we etanyau Stoai ne anyau pa etarura we Paulusi, kong embetotoi na ya engkawio wei etoyo, “Nyontarai nini kewio barui mana rekamang kateaki?” Mana embe totoi eaya engkawio etoyo, “Parariapi i kewio kakera nyombatangnai na rai pea.” Yati engkawio topiana, tutu Paulusi kewio kakera Arera Weweng parari Yesusi kong tewa pa. 19Interi engko Paulusi wu sidang Areopagusi na wi pai, mae engkawio wei etoyo, “Amasane we amantarao anyau waworu we topana pa. 20Tutu au topang piwe amantarao mamo weia kia parari we amantaraoa pampongpa wa na amantarakambireine pa. Impaina amasane we amantarakamana.” 21Impaina nyontarai Atena paya kong nyontarai we enda na nu pea weiya ma we enai na Atenapa ya emararising we anemai mamo etong a pea we entarao kawio waworu yana pa.

22Interi Paulusi tewara doa na sidang Areopagusi endenapa mae kewio doyo, “E nyontarai Atena pa mia! Yau erewo pitaubai we metonapa denyawa we miawo nyontarai mesomi na tarai we nyombatangnai di mia. 23Tutu yau erawari mene bendari nei kong mene nu we mentandau napa. Yau erewo piwawinta pikika pei, na yana mentoi topinina: ‘We Allai we amandekamani wa pai.’ Impaina Allai we mesomi wei mana mendekamani wa yani, andi etopani we mia nina pa. 24Allai we doyao nunei nini kong pitaubai we watanai nei, andi we Seng we rora peidi kong nunei. I wo nyaina manu nyombatanai we nyontarai pea enari pa wa.1 25I tato dosanewe nyontarai peaya we empatari wa tutu Andi dong we weweng kong aseng kong pitau pa we nyontarai neya pa. 26Na nyontarai pe koiri, Allai nyari kawasa paya etonung na nunei, kong dong nu pea weya we enai nai pa, na nunei tantenang. I tato na retenang pa kiutua parari apatotoi kong na totoi ya embeng napa. 27Allai nyari toyana pa, imbaro nyontarai ne tata taserai I kio tataduti. Toyana ki mana Allai meyoi woroi kia warui tata koiri-koiri wa. 28Parariapi kawio we nyontarai pea entopana pa; ‘Na I, tambeng mae tamariwa na nunei tutu Allai ne mambiri pa.’ Konta parari mene nyontarai we endoi pa etoyo, ‘Tata tangkai Allai Antung di tata.’ 29Tutu tatawo Allai Antung di tata, impaina tandeo tatorato Allai perariapi nyombatangnai we nyontarai enari na masi pe ete peraki ete kami we enari parari we nyontarai ene manuanung pa pe. 30Na awe tandearoang Senipa wa, donane tanari sasari aino tasomi nyombatanai paya. Piyanapa Allai reaoa ea wa, mana na a nina pai dayoa we nyontarai ne tata kuira na nunei we tasanetaweri warui sasari tatona pa. 31Wo I kiutu a pei we dutangkakewa parari pitau we na nunei tantenang na wemai. Piyana pa nyontarai we piana Allai diri ampai andi nyari pa. Kong imbaro nyontarai ne endoaoa pi yana pa, mamo Allai piana doni tewa warui ne kaida pai.”

32Na awe nyontarai paya entaraoa parari nyontarai entawa warui kaidapai pa, ea yati emari Paulusi mae ea yati etoyo, “Apei eambo ingkai amasane we amantarao maneta pa au kowio parari pinina pa naria ea.” 33Interi Paulusi ria warui sidang yani pai. 34Mana na ya mamo ea yati engkong Paulusi kong endoao Yesusi, aino; Donisiusi ei na majelisi Areopagusi pai kong nyontarai wawing we anompei Damarisi kong nyontarai pe embetotoi naria ea.