Pi Rasuri Enari 18

Paulusi Na Korintusi

1Interi Paulusi donta warui bendari Atena to bendari Korintusia. 2Na Korintusi i dedu nyontarai Yaudi pei anongpei Akwilai, i wo nyontarai na raora Pontusi dina. I kong ne wawini Persekilai unda na raora Italia ema, tutu Kaisari Kladiusi dong kawio parenta, imbaromi nyontarai Yaudi paya kuira enda warui Roma. Impaina Paulusi ria rewawa asaru na manu unempai. 3Interi nyai kong asaru na yana mae itondu pi kuira tutu mariwa unempa mai parari mariwa Paulusi nempa, aino itonari tenda we itombowa. 4Anemai na a Sabati pai mamo Paulusi ria kewio Seni ne Kawio pa na manu Yaudi esomi nai pai, we kewio kakepang nyontarai Yaudi paya kong Yunani paya imbaromi endoao Yesusi.

5Na awe Silasi kong Timotiusi unda na Makedonia ma pa, Paulusi dedu a we denyau Allai ne Arera pa we nyontarai Yaudi paya, we Yesusi wo Mananu Mampariri we Allai derekamani pina. 6Mana nyontarai paya etimbatetari kong engkangkani, impaina i tetai wawupa warui ne asungpa mae kewio doyo, “Metadu wemoya pa mamo, mantaung mia mene sarara pina, yau emamarang! Impaina na a nini to yau ingkai era we nyontarai Yaudi wa paya.”

7Interi Paulusi ria warui ya na manu Yaudi esomi pai mae ria meyoi na nyontarai pei anong Titius Yustusi na manu nempai. Manu yani wiata kikeu we manu nadi na yana pai. Titiusi nini pai nyontarai Yaudi dina wa, mana yomi we Allai. 8Mana Krispusi, we wedung we manu Yaudi esominai pai, rioao Sen Yesusi, i kong ne mandarong paya kuira. Mae kawasa tau na nyontarai Korintusi paya, we entarao Paulusi ne anyaupa, endoaoa kong engko enetaraipaia embebaptisi.

9Na diru pei, Seni kewio we Paulusi na pianea parari ami pei doyo, “Pauluse, remo motai pe! Wuwu Neu Arera ne pampang mae au remo aidinau pe! 10Wo Yau yerua au mae nyontarai pei ingkai dong wemoyawa pa we au wa, wo nyontarai tau na bendari nini pai mamo, Neu nyontarai diya pa.” 11Impaina Paulusi nyai na yana puda pe koiri yembai pa bowonang, mae denyau Allai ne Arera parari Yesusi na ene madupa. 12Mana na awe Galioi we kubernuri na raora Akaya pai, nyontarai Yaudi paya embekoiri we etimbateta Paulusi mae engkori to kubernuri renapa we kiutu kawio parari i. 13Engkawio etoyo, “Nyontarai nini denyau kawasa paya we esomi we Allai na anyau waworu pea. Anyau yana biateta we Kawio we Musai soi pa.”

14Na awe Paulusi doyo kewiopa, mamo kubernuri Galioi piana kewio pampong we nyontarai Yaudi paya doyo, “Nyontarai Yaudi pa mia, metimbu nyontarai nini we pi dosararapa ete wemoyawa pea mamo, ekutu mene kawio pa, 15mana ninawo parari kawio pa tutu anompa tutu mene mamba pai mamo, mantaung mia mengkawio pararia, yau emaidai ekutu wa.” 16Interi i dedawa ya tori warui mandarong we engkutu kawio nai pai. 17Impaina nyontarai paya entapu Sostenesi, nyontarai wewedung we manu Yaudi esomi pai. Interi endorai na nu we engkutu kawio nai pai yani; mana Galioi aneaoa wa we pi etona toyana pa.

Paulusi teweri to Antiokia

18Paulusi nyai na Korintusi woroi katea ea. Interi sopana we neta paya na yana we depai to raora Siria. Persekilai kong Akwilai uronta konti. Itorapai to Siria wami, mana na bendari Kengkrea Paulusi kiutu duandaung pa we piana pikari terimbai pai na yana tutu arera dona we Seni eampa.1 19Interi ya etapaia empapa na Epesusi. Paulusi pika Persekilai kong Akwilai asaru unai na bendari yani, mae Paulusi ria yua na manu nadi pai mae kewio kong nyontarai Yaudi paya parari Seni ne Arera Mamarang pai. 20Etutani we nyai kong ya na yana woroi katea wo mana meidai. 21Toyana mana na awe dontapa, kewio weya doyo, “Wo Allai aneaoa mamo, ingkai etaweri ea ema ki.” Kewio toyana weya interi donta warui bendari Epesusi. 22Dontara wia na Kaisarea, i ria to Yerusalemia rewawarao jemaati na yana pa mae doyo, “Tabea we neta pa mia,” interi ria pampang to bendari Antiokia ea. 23Nyai nayana ape bototoi ea, interi i donta ea. Ria wari raora Galatia tantenang kong raora Prigia we kewio kong nyontarai endoaoa paya we endoao Yesusi na maitui.

Apolosi denyau na Epesusi kong Korintusi

24Na yana pato nyontarai Yaudi pei anompi Apolosi, i na awa Aleksanderi. I anemanuainung kia na kewio pa mae rearoang Weraung Mamarang pai na wemai. 25I piana yewawa anyau we rearoang anyau parari Sen Yesusi Ne Rang wemai. Impaina na merarising kia i kewio mae denyau na kangkuna parari Yesusi, mana i wo rearoang baptisang Yoanesi mameari. 26I denyau kawasa paya na manu Yaudi esominai pai na metai wa. Na awe Persekilai kong Akwilai untarao ne anyau pa, urutani ria kong asaru to manu unempaia. Na yana ungkawiora na wemai wei parari Allai ne Rang we periri nyontarai neya na Yesusi pa. 27Apolosi anewe tepira to Akaya, impaina neta paya na Epesusi entoi weraung pei wu nyontarai endoaoa paya nayana, imbaro etamamani na wemai. Apolosi dontara wia na Akaya mamo, ne anyau pa, piata nyontarai we endoao Yesusi paya, tutu Allai ne weweng dona pinoma weya pa. 28Wo Apolosi kewio kangkuna mae biateta nyontarai Yaudi paya na kawasa endenawau kong denyawa na Weraung Mamarang pai we Yesusi mamo Mananu Mampariri dina.