Skip to content
BibleKenya

Alkitab Bahasa Ansus

Pi Rasuri Enari 19

Paulusi na Efesusi

Na awe Apolosi nyaina Korintusi pa, Paulusi piana ria waria na raora na wi pa interi ria dedu Efesusi. Nayana dedu nyontarai endoao Yesusi pe embebototoi. I sopana weya doyo: “Mia piana metadu Duainunung Mamarang paia na awe mendoao Yasusi pa ete wereria e?” Mana endoa wei etoyo, “Wereria rai, kong amantarao parari Duainunung Mamarang pai wa.” Interi Paulusi kewio weya doyo, “Toyana mamo membebaptisi pa na matei ne baptisang pai e?” Endoa wei etoyo, “Parari Yoanesi ne baptisang pai.”

Interi Paulusi kewio doyo, “Yoanesi webaptisi kawasapa denyawa we nyontarai yani paya piana esanetaweri warui ene sasaripa to. Mana na awe embebaptisi yana, Yoanesi sopana we nyontarai Israeli paya we, topitotoi ki endoao nyontarai we ingkai ria tuwari ma pai, andino Yesusi.”1 Na awe entarao Paulusi sopana toyana pa, ya embebaptisi na Sen Yesusi anompa. Mae na awe Paulusi riuwa warangpa so yapa, Duainunung Mamarang pai yumao ya, interi engkawio na kawio pei weiya we mantaung ya enduinaria wa kong engkawio kakera parari kawio we ra na Allai pa. Ya kuira empaupa embe urayakodu.

Na yembaipe botoru, Paulusi kewio na metaiwa we nyontarai paya na manu nadi pai mae aneatora kong nyontarai paya we dong ya endoaoa parari topitotoi Allai ne riu we Mananu pa. Mana nyontarai pa embetotoi esanerarongpa maitui kong endoaoa wa, kong na kawasa empanduiya na yana pa endenawau, ya engkangkani anyau parari Allai ne anetatua we periri nyontarai neya na Yesusi pa. Aidona pa Paulusi ria warui ya, kio nyontarai etua Yesusi paya, enda to Tiranusi ne mandarong baba na pampongpa doni we manu sikora pai. Na yana anemai mamo Paulusi denyau ya parari Seni ne Arera pa. I nyari piyana pa manyona pudape kodu, impaina kawasa na nu Asia pai entarao Seni ne Arera pa, Yaudi kong Yaudi wa.

Na Paulusi, Allai nyari pitantuma pitau, impaina nyontaraipa engko ne asungpa ete ne rensopa ra etona wata na we esui pea kong we semi-semi dong ya pea mamo nyontarai yana paya empanang.

Skewai ne Kumai paya

Nyontarai Yaudi embetotoi, ya wo nyontarai etong nyontarai empanang na ene ubapa diya, enda wu nu tantenang, mae etoyo etadawa semi-semi warui nyontarai we semi-semi yumao ya pa parari Paulusi. Impaina etoyo, “Na Sen Yesusi we Paulusi kewio parari pai anompa, amatadawa mia.” Nyontarai we enari toyana pa mamo, imami wewedung pei na Yaudi paya anong pei Skewai, ne kumai embeitu pa diya. Mana semi-semi pai kewio weya doyo, “Yesusi mamo ereuaroani, mae Paulusi tato ereuaroani, mana matei di mia pa e?” Interi nyontarai we semi-semi yumaoipai kiopara kong yauayabu ene asungpa kong enetarai paia weria, mae etapai na enetarai kakawiri warui manupai tutu asung enempa pioayabua paina.

Nyontarai Yaudi paya kong Yaudi wa paya we enai na Epesusipa ya entarao pitawa yana, donane ematai kia. Impaina kawasa madu pei etaparanding Sen Yesusi anompa. Kawasa empau we endoao Yesusi pa endama endoa we Paulusi parari ene sasari uba we etona na pampompa. Nyontarai we engko arawi paya, empau engko ene weraung we entoi parari ene arawipa, empandura ma enunung na kawasa endenawau. Ene weraung pa etintatuata na pe mamo ne harga pe peraki2 50,000. Na pitoyana pa Seni ne Arera parari Yesusi pa, embuwua na nu pa tantenang kong nyontarai pa empau endoaoa ea.

Demetriusi dong amuna na Efesusi

Pi toyana pa ra kaia mamo, Paulusi kiutu we donta to Makedonia kong Akhaya mae na yana donta to Yerusalemi. Kewio doyo, “Yontara yedu nu yana pa mamo andi yontara erewo bendari Roma tato.” Interi demi nyontarai kodu we umpatari pa asaru aino Timotiusi kong Erastusi. Asaru umpamponi to Makedonia ra, mae mantauni wo nyaina raora Asia ape asaru ea.

Na a yani paidi nyontarai tau nayana pa engkayou etong amuna baba na Efesusi tutu anyau parari Yesusi ne Rang pai. Wo na bendari yani nyontarai pei anong pei Demetriusi, i mamo menuanung nyari piwe na peraki. Andi nyari manu nyombatanai wawing Artemisio esomi wei we ene sen dina pa. Na piwe donapa dedu pe pa pau kia we ne nyontarai endupi wei paya. Impaina pendukui ne nyontarai endupi paya kong nyontarai eaya we emanuanung enari pi na peraki parari ya pa, interi kewio weya doyo, “Netapa mia! Mesaneoa we tatadu pe pau na pitanari nina pa. Mana nina wo piana mendeoa kong mentaraoa pitoai Paulusi dona pa. I kewio doyo nyombatangnai nyontarai ne enari pa Sen dina wa. Mae na kewio toyana pa donane kawasa tau endoao ne anyaupa, na Efesusi memeari wa mana katea ea mamo raora Asia nei tentenang. Mae ne toyana pa donane pi tandu ne anompa wemoyawa. Pitandu ne meari wemoya wa, mana manu nyombatangnai Artemisi, sen tedai pai tato ingkai nyontarai esawi we sen tarai dina wa. Mana I wo nyombatanai tedai, we sen na raora Asia nei kong nunei tentenang.”

Na awe entarao pi Demitiriusi sopana toyana pa, esanerarongpa kayou kia, interi etanana kia mae etoyo, “Artemisi au momeari kia, au we seni we kawasa na bendari Efesusi nei pa!” Impaina ya endawari bendaripai tantenang esayau mae etanana kia. Interi entapu Gayusi kong Aristarkusi, nyontarai Makedonia we urua Paulusi na ne rang rarongpa, kong empapa asaru to manu baba we kawasa empandui ya naina bendaripai. Paulusi do riawu rai we pau paya we kewio kakera weya, mana nyontarai endoao Yesusi paya esuari. Kong nyontarai baba pe embetotoi na raora Asia pai, we esanerarong wieng we Paulusi pa, etami nyontarai pea entopana we Paulusi imbaro ria we denyawi netaraipai na manupai we kawasa paya pe.

Na yana tato nyontarai we empandui ya na manu baba pai etanana kangkuna; ea entopana tonina, ea ya entopana toyana, wo ya enduinaria pitoai dona mamo empadui ya pa. Nyontarai Yaudi paya esanetatuata we Aleksanderi andi dona mamo kawasa pa etong kawio toyana pa. Impaina entantubari topongna we kewio we rai madu pai. Interi Aleksanderi riuwa warangpa we kamang we kewio parari pitoi entubakepana weipa. Mana awe endeoi we i wo nyontarai Yaudi dina pa, impaina etanana kangkuna kia woroipa saraka riora kodu mae etoyo, “Artemisi au momeari, au we sen we nyontarai na Efesusi pa!”

Impaina sekertarisi na bendaripai deimindui ya doyo, “E nyontarai Efesusi pa mia! Matei konta na nu totoi pa, ya esaneaoa to we bendari Epesusi memeari di deung manu sen wawini Artemisi pa kong ne nyombatanai wia na rorapai maweupa. Matei ea konta kong embateta piyana pa wa. Impaina mia aidimia mae metong pampinong mia pe. Wo mengko nyontarai nina ya toninama pa mamo ya etawara nyombatangnai tanenei wa kong entatipa sen wawini wa. Impaina Demetiriusi kong ne we endupi wei paya entubakepang ene piea mamo, engko ene kawiopa wu we engkutu kawiopa ya kong we kubernuria, ya etamamang. Mana mesanetatuata we mene kawio pea ea mamo, mengko wu nyontarai we parenta pai riuwa ya we engkutu kawiopa ya. Wo pitoai metona nina pa, imbaro kio wemoya wapa kia. Nyontarai paya ingkai etubakepang tata we tatong marowa, wo piwe tatona nina pa tarai wa.” Interi na kawio we sopana pa donane rai we pitau pai ria tatera. Sekretarisipai kewioa kai toyana pa, i demi kawasa tau pai entaweri to ene manupa ea.

Source notes (2)
  1. Cross-reference Mat. 3:11; Mrk. 1:4,7-8; Luk. 3:4,16; Yoh. 1:26-27
  2. Footnote peraki peraki: pe peraki koiri mamo ne harga pa parari we riupi ne gaji a koiri. (Mat 20:2)

Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.