Alkitab Bahasa Ansus
Pi Rasuri Enari 20
Paulusi ria to Makedonia kong Yunani
Na awe uira na Efesusi pa madori taweri, interi Paulusi penduikui nyontarai we etua Yesusi na yana paya mae denyau ya imbaro esanerarongpa paya. Interi i kewio dewara kong ya we ria to Makedonia. I ria wari raora yani kong kewio denyau neta wauya na yana imbaro esanerarongpa paya. Interi ria ra sisu na kakopa Yunani. Piana nyai nayana woroito yembai pe botoru na yana interi depai to Siria. Mana na awe do donta to Siria yana, tarawoa na nyontarai pei we nyontarai Yaudi paya esanewe emuni. Impaina i kiutu we teweri rire raora Makedonia pai. Nyontarai pe embetotoi endakonti, yatino Sopateri, Pirusi na Berea ne kumaipai. Aristarkusi kong Sekundusi, asaru mamo nyontarai Tesalonika di asaru, kong Gayusi na Derbe, mae Timotiusi kong nyontarai pe kodu na Asia, aino Tikikusi kong Tropimusi. Ya wo enda pampongna kong etamang ama na Troasi. Mana na a baba Roti Weragi wa pai akai pa amatapai warui Pilipi. Pira ape boring amampapa na Troasi mae amampandura kong nyontarai embeitu paya. Nayana amanai woroi ape boitu ea. Na a retenang na arimingku yani, amampandura we amambabau rotipa we amatang kuira. Paulusi kewio we neta we endoaoa paya nayana tutu anetatua we do donta na kamai ayarima, impaina kewio pampang ki diru rabuang to. Na mandarong na yeipei, mandarong amampandura nai pai padamara pe maduapei etona dea. Nyontarai aimiomang anong pei Eutikusi meoi na yendera pai. Tutu Paulusi kewio pa manyona kia, impaina aimiomang wadi ayena doni kapara paina meoi denaera, impaina sawa na jendera na mangkawawuani toru pai na manu wadi toung. Na awe enduwari pa mamo piana keda to. Mana Paulusi wiaweu meoi na aebu pa mae tepuwari interi kewio doyo, “Mesaneriru pe, wo andi wieng ne rai.” Paulusi wieita taweri aeipa, bebau rotipa mae wiwo tate nyontarai we empandura paya mae etampi kuira. Na etampia kaipa i kewio ki ayari ketua. Interi i donta. Interi nyontarai we endoao paya engko aimiomang we wieng taweri pai to ne manupaia, mae ya kuira emararising kong endiroi kia.
Paulusi donta na Troasi to Miletusi
Ama amanda pampong to kaparipai we amasanai we amatapai to Asosi, nawana amatamang we Paulusi, wo i kiutu we ria na rang rei pai to Asosi. Na awe riama dedu ama na Asosi pa, amanda kuira to kaparipai, interi amatapai to bendari Metilene. Nayana amatapai topong ki kamai wadi mamo amendeo nutakutu Kiosi kikeu we ama. Na kamaipai ea mamo amampapa na Samosi mae na kamai wadi ea amampapa na Miletusi. Paulusi piana kiutu we reo amampapa na Epesusi wa, tutu i meidai a nembau akai na raora Asia pe. Wo emararu keto era sisu na Yerusalemi na a Pantekosta pai.
Paulusi tepiratori kong penatua na Efesusi
Impaina na Miletusi Paulusi denatu nyontarai pei to Efesusi we kio arera pea we dewa we embedung we jemaati paya enda wurima. Awe endama pai, Paulusi kewio doyo, “Mia mendearong yau to, parari pitoai yona na mene madu kuirapa na raora Asia nei pa, na retenang erama yedu nu nini ra sisu a we yepai warui nu nini ea ne. Yedu uira taubai na nyontarai Yaudi paya tutu esanetatuata we emung yau. Mana na aneutoung kong apea mamo reukaru takutu, eruwa Seni mariwa nempa pampang. Toyana ki mana yau wo eyutopui wa we eyanyau mia pitoai una we mia pa. Pitau nina piana etopana kong yenyau mia na awe tapandura na nyontarai we empaupa endena pa kong na mene manupa kuira. Yau ekawio eyanyau pampang we nyontarai Yaudi paya kong nyontarai Yunani wauya, imbaro ya esanetaweri warui ene sasari pa mae enda we Allai kong endoaoa we tane Sen Yesus Kristusi. Mana anei na yongparari kawio Duainunung Mamarang demi yau wea pa, impaina yau erato Yerusalemi mae eruinari pitoai ingkai nyontarai pa etona tawao yau pa. We yau ereuaroana na bendari we epaioa pa kai, wo Duainunung Mamarang pai sopana kangkuna we nyontarai paya ingkai etong yau eyua wangka pai kong etong yau yedu uirapa. Toyana mana yau ematai katea wa we ekadapa, wengki maina mamo Sen Yesusi ne mariwa we demi yau yonapa, enari na we mai, aino ewuwu Arera Weweng pai parari Allai ne weweng dona pinoma we nyontarai pa, kio engkada wane.1 Yau wo piana reuwawa mia mengkai na mene jemaati pa kong ewuwua parari Allai ne riu we Mananupa we mia. Nina ereuaroana we mia ingkai mendeo reukamine ea wa. Aidonane na a nini etopana kangkuna we mia, na awa puiwane ei dedu wemoyawa mamo yau neu sara pina wa. Wo yau eparandengwa we ewuwu Allai ne weanetatuata tantenang we miapa. Impaina Paulusi kewio we weembedung paya doyo, Metosaiwa mia kong metosaiwa jemaatipai, tutu Duainunung Mamarang kemang mia we metongwido Allai ne jemaati we dedu ya na mantauni ne ria pai pa. Yau wo ingkai era warui mia mana ereuaroana we nyontarai emparari wona emamuna we ingkai esua to mene pandura pa. Kong etongkangkani nyontarai we Allai demi mia metongwido yapa. Mana na mantau mia, nyontarai pe embetotoi ingkai entawa we etanyau jemaati wauya na anyau we mai wa, esamupa we engko nyontarai we endoaoa paya entaweri warui rang wemai pa, imbaro etua ya. Impaina mesaneaiwara kong mesaneaoa na wemai! Piana pudape botoru, yau yenyau mia koiri-koiri pampang, diru raida na reukarupa takutu.
Nina ne yau yong mia we Allai imbaro deung mia kong mendua maitui na Allai ne Arera parari ne weweng dona pinoma pa. Allai ne mambiri we dong mia mempaya kong dona we mia muangpa we piana dona manyena we ne nyontarai neya pa. Yau wo aneuwe yedu pe ete asung na nyontarai pei wa. Mia wo mesaneaoa we mantau yau na mariwa endu eampa, yedu pe pa we yau kong we enda kong yau nea. Yau piana yenyawa we mia to na piwe pau, mamo na tamariwa kangkuna toyana pa, tampata nyontarai we empaya paya. Kong tasaneaoa we Sen Yesusi ne kawio sopana pa doyo, ‘Piboki kia we tatong pi we nyontarai, warui tataduta na ya pa.’ ” Interi Paulusi kewioa kaipa meoiaebu ko ya mae tendau kuira. Na yana ya engkai esai kong entapuwari Paulusi mae entopang au bonta pa. Ya etaidu kia, tutu Paulusi kewio topino mia wo ingkai mendeo yau eawa, interi ya endatuturi wu kapari wadia.
Source notes (1)
- Cross-reference 2Tim. 4:7
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.